NMC-யின் புதிய அறிவிப்பு: 2025-26 கல்வி ஆண்டுக்கு 7006 புதிய MBBS சீட்டுகள்..!

கடந்த 12 ஆண்டுகளில் MBBS இடங்கள் 137% அதிகரித்திருப்பது, மருத்துவக் கல்விக்கான புதிய வழிகளைத் திறந்து வைத்துள்ளது. இந்த ஆண்டு MBBS இடங்கள் மற்றும் அதன் கலந்தாய்வு செயல்முறையில் ஏற்பட்டுள்ள மாற்றங்கள் குறித்து காணலாம்.

இந்த ஆண்டு, இந்தியா முழுவதும் உள்ள மொத்த MBBS இடங்களின் எண்ணிக்கை 1,24,756 ஆக அதிகரித்துள்ளது.

இது கடந்த ஆண்டை விட 7,006 புதிய இடங்கள் அதிகம். ஆனால், இந்த 7,006 புதிய இடங்களில், 1,056 இடங்களுக்குத் தற்போது மாணவர் சேர்க்கை நடைபெறாது.

இந்த இடங்கள் சில கல்லூரிகளில் சட்டரீதியான பிரச்சனைகள் அல்லது புதுப்பித்தல் ஒப்புதல் நிலுவையில் இருப்பதால் நிறுத்தி வைக்கப்பட்டுள்ளன.

எனவே, தற்போது கலந்தாய்வு மூலம் 1,23,700 இடங்களுக்கு மட்டுமே சேர்க்கை நடைபெறும்.

நிறுத்தி வைக்கப்பட்ட 1,056 இடங்கள்

மொத்தம் நிறுத்தி வைக்கப்பட்ட 1,056 இடங்கள் 16 கல்லூரிகளில் உள்ளன. இந்தக் கல்லூரிகளுக்கு இன்னும் NMC-இன் ஒப்புதல் கிடைக்கவில்லை.

இந்த 1,056 இடங்களில், 4 இடங்கள் 4 அரசு மருத்துவக் கல்லூரிகளில் உள்ளன. மீதமுள்ள 1,052 இடங்கள் 12 தனியார் மருத்துவக் கல்லூரிகளில் உள்ளன.

அரசு மற்றும் தனியார் கல்லூரிகளில் உள்ள இடங்கள்

புதிதாக சேர்க்கப்பட்ட 7,006 இடங்களில், தனியார் கல்லூரிகளுக்கே அதிக பங்கு கிடைத்துள்ளது.

• தனியார் கல்லூரிகள்: 4,680 புதிய இடங்கள் சேர்க்கப்பட்டுள்ளன. ஆனால், அவற்றில் 1,052 இடங்கள் தற்காலிகமாக நிறுத்தி வைக்கப்பட்டுள்ளன.

• அரசு கல்லூரிகள்: 2,326 புதிய இடங்கள் சேர்க்கப்பட்டுள்ளன. இதில் 4 இடங்கள் தற்காலிகமாக நிறுத்தி வைக்கப்பட்டுள்ளன.

இதன் காரணமாக, அரசு மற்றும் தனியார் கல்லூரிகளுக்கு இடையிலான இடங்களின் விகிதம் கிட்டத்தட்ட சமமாகியுள்ளது.

கடந்த 12 ஆண்டுகளின் வளர்ச்சி

MBBS இடங்களின் எண்ணிக்கை கடந்த ஒரு தசாப்தத்தில் மிகப்பெரிய அளவில் அதிகரித்துள்ளது.

• 2013-ல் வெறும் 52,110 இடங்கள் மட்டுமே இருந்தன.

• 2025-ல் இந்த எண்ணிக்கை 1,24,756 ஆக உயர்ந்திருக்கிறது.

இது கடந்த 12 ஆண்டுகளில் 137% அதிகரிப்பு ஆகும். குறிப்பாக, 2019 மற்றும் 2022 ஆகிய ஆண்டுகளில் அதிக எண்ணிக்கையிலான இடங்கள் சேர்க்கப்பட்டன.

நமது மருத்துவக் கல்வித் துறையின் இந்த முன்னேற்றம், எதிர்கால மருத்துவர்கள் உருவாகுவதற்கான வாய்ப்புகளை விரிவுபடுத்துகிறது. வாழ்த்துகள் வருங்கால மருத்துவர்களுக்கு...!