நான் சிறுவயதிலேயே தமிழ் மொழியைக் கற்றிருக்க வேண்டும் என்று இப்போது ஆசைப்படுகிறேன் - பிரதமர் மோடி!

அப்போது அவர், "நான் சிறுவயதிலேயே தமிழ் மொழியைக் கற்றிருக்க வேண்டும் என்று இப்போது ஆசைப்படுகிறேன்" என்று கூறியது அங்கிருந்தவர்களை நெகிழச் செய்தது.

தமிழில் ஈர்த்த விவசாய சங்கத் தலைவர்:

விவசாய சங்கத் தலைவர் பி.ஆர். பாண்டியன் அவர்களின் உரை மிகச் சிறப்பாக இருந்ததாகக் குறிப்பிட்ட பிரதமர், "அவரது உரை ஆக்கப்பூர்வமாக இருந்தது. 

ஆனால், எனக்குத் தமிழ் தெரியாததால் அதை முழுமையாகப் புரிந்துகொள்ள முடியவில்லை.

ஆளுநர் ஆர்.என். ரவி அவர்களிடம் அந்தப் பேச்சை எனக்கு ஆங்கிலத்திலோ அல்லது ஹிந்தியிலோ மொழிபெயர்த்துச் சொல்லுமாறு கேட்டுக்கொண்டேன். 

இந்தத் தருணத்தில், நான் சிறுவயதில் தமிழ் கற்காமல் போனதை நினைத்து வருந்துகிறேன்" என்று உருக்கமாகத் தெரிவித்தார்.

விவசாயிகளுக்கு ரூ.18,000 கோடி நிதியுதவி:

மூன்று நாட்கள் நடைபெறும் இந்த மாநாட்டைத் தொடங்கி வைத்த பிரதமர், விவசாயிகளுக்கான மத்திய அரசின் நலத் திட்டங்கள் குறித்துப் பேசினார். 

குறிப்பாக, பிரதான் மந்திரி கிசான் சம்மான் நிதி (PM-KISAN) திட்டத்தின் சமீபத்திய தவணைத் தொகையை இந்த மேடையிலிருந்தே விடுவித்தார்.

"இன்று நாடு முழுவதும் உள்ள விவசாயிகளின் வங்கிக் கணக்குகளில் நேரடியாக ரூ.18,000 கோடி செலுத்தப்பட்டுள்ளது. 

இத்திட்டத்தின் மூலம் இதுவரை மொத்தம் 4 லட்சம் கோடி ரூபாய்க்கும் மேல் விவசாயிகளுக்கு வழங்கப்பட்டுள்ளது" என்று அவர் பெருமிதத்துடன் கூறினார்.

கிசான் கிரெடிட் கார்டு மற்றும் இதர சலுகைகள்:

கிசான் கிரெடிட் கார்டு (KCC) திட்டத்தின் விரைவான விரிவாக்கத்தையும் பிரதமர் சுட்டிக்காட்டினார். 

இந்தத் திட்டத்தின் மூலம் இந்த ஆண்டில் மட்டும் விவசாயிகள் ரூ.10,000 கோடி மதிப்பிலான பலன்களைப் பெற்றுள்ளதாக அவர் குறிப்பிட்டார்.

மேலும், கால்நடை வளர்ப்போர் மற்றும் மீனவர்களும் KCC வரம்பிற்குள் கொண்டுவரப்பட்ட பிறகு கணிசமான நன்மைகளைப் பெற்றுள்ளதாக அவர் கூறினார். 

இயற்கை உரங்கள் மீதான ஜிஎஸ்டி (GST) குறைப்பு விவசாயிகளுக்குக் கூடுதல் நன்மைகளை அளித்துள்ளது என்றும் அவர் தெரிவித்தார்.

மாறி வரும் கோவை:

கோயம்புத்தூர் நகரின் சிறப்பை எடுத்துரைத்த மோடி, "நீண்ட காலமாக ஜவுளித் தொழிலுக்குப் பெயர் பெற்ற கோவை, இன்று மற்றொரு காரணத்திற்காகவும் பெருமை கொள்கிறது. 

அதுதான் இயற்கை விவசாயம். இந்த மாற்றத்திற்கு வழிகாட்டியாக இருந்த முன்னாள் எம்பியும், பாஜக தேசியத் துணைத் தலைவருமான சி.பி. ராதாகிருஷ்ணனைப் பாராட்டுகிறேன்" என்றார்.

முருகப்பெருமானும் சிறுதானியமும்:

தமிழகத்தின் கலாச்சாரத்தைப் பற்றிக் குறிப்பிட்ட பிரதமர், "முருகப்பெருமானுக்குத் தேன், தினை மாவு போன்றவை படைக்கப்படுகின்றன. 

தமிழகத்தின் இந்தச் சிறந்த சிறுதானிய உணவுகளை உலகச் சந்தைக்குக் கொண்டு செல்ல எங்கள் அரசு முனைப்புடன் செயல்பட்டு வருகிறது" என்றார்.

முன்னதாக, அங்கு அமைக்கப்பட்டிருந்த இயற்கை விவசாயக் கண்காட்சியைப் பார்வையிட்ட அவர், பொறியாளர்கள், இஸ்ரோ விஞ்ஞானிகள் மற்றும் இளம் தொழில்முனைவோர் விவசாயத்தில் ஆர்வத்துடன் ஈடுபடுவதைக் கண்டு வியந்ததாகவும், "நான் இன்று இங்கு வராமல் இருந்திருந்தால், ஒரு மிகப்பெரிய அனுபவத்தைத் தவறவிட்டிருப்பேன்" என்றும் கூறினார்.