இனிப்பா? உப்பா? - பாப்கார்ன் GST சர்ச்சை..!

இந்தியாவின் புதிய ஜிஎஸ்டி மாற்றங்களில், சினிமா தியேட்டர்களின் செல்லப் பிள்ளையான பாப்கார்ன் மீண்டும் ஒருமுறை கவனத்தை ஈர்த்துள்ளது.

'உப்புச் சேர்த்த பாப்கார்னா, இனிப்புப் பாப்கார்னா?' என்ற பல ஆண்டுகால வரி விவாதத்திற்கு ஜிஎஸ்டி கவுன்சில் ஒரு முடிவுக்குக் கொண்டுவந்துள்ளது. இந்த அறிவிப்பால் பாப்கார்ன் கடைகளிலும், சமூக வலைத்தளங்களிலும் ஒரே சலசலப்புதான்!

உப்புப் பாப்கார்னுக்கு 5% ஜிஎஸ்டி; இனிப்புப் பாப்கார்னுக்கு 18% ஜிஎஸ்டி.

இந்த அதிரடி அறிவிப்பு வெளியான உடனேயே, சமூக வலைத்தளங்களில் மீம்ஸ்கள் பறக்கத் தொடங்கின.

மக்கள் தங்கள் உணர்வுகளை நகைச்சுவையாகவும், சில சமயங்களில் கிண்டலாகவும் வெளிப்படுத்தினர். "எதிர்க்கட்சிகள் இனி வேறு எந்தக் கேள்வியும் கேட்க வேண்டாம்.

கேரமல் பாப்கார்னுக்கு ஜிஎஸ்டி எவ்வளவு என்று தேசம் தெரிந்துகொள்ள வேண்டும்!" என்று ஒரு பயனர் கிண்டலாகப் பதிவிட, அது வைரலானது.

மற்றொருவர், "ஜிஎஸ்டி குறைப்பால் பாப்கார்ன் விலை இறுதியாகக் குறைகிறது. ஆனால், தியேட்டர்கள் இதற்குப் பதிலளித்து, 'தங்கமுலாம் பூசப்பட்ட பட்டர் பாப்கார்ன் – ₹699' என அறிமுகப்படுத்துவதைப் பார்க்க நான் ஆவலுடன் இருக்கிறேன்.

ஏனென்றால், ஜிஎஸ்டி குறைப்பால் கிடைக்கும் சேமிப்பு ஏன் ஒருபோதும் பார்வையாளர்களைச் சென்றடைய வேண்டும்? தியேட்டர்கள் எப்போதுமே தங்கள் விலையைக் குறைக்காது, வேறு ஒரு வழியில் அதை ஈடுசெய்வார்கள்" என்று நகைச்சுவை கலந்த ஆதங்கத்தை வெளிப்படுத்தினார். இது தியேட்டர்களின் அதிக விலைக் கொள்கையைச் சாடியது.

யுபிஎஸ்சி மாணவர்கள் கூட இந்த விவாதத்தைத் தவறவிடவில்லை. "ஜிஎஸ்டி குறித்துப் பாப்கார்ன் தொடர்பான விவாதம் முடிந்துவிட்டது: உப்பு அல்லது மசாலா சேர்த்த பாப்கார்னுக்கு 5% ஜிஎஸ்டி. இனிப்புச் சேர்த்த பாப்கார்னுக்கு 18% வரி" என்று ஒரு பயனர் வேடிக்கையாகப் பதிவிட்டு, இது தேர்வுகளுக்கு முக்கிய அப்டேட் என கிண்டலடித்தார்.

இந்த புதிய வரிவிதிப்பு மூலம் இரண்டு முக்கியமான விஷயங்களை அரசு தெளிவுபடுத்தியுள்ளது:

1. சால்டட் பாப்கார்ன் (உப்பு மற்றும் மசாலா சேர்த்தது): இது ஒரு அடிப்படை மற்றும் அத்தியாவசிய சிற்றுண்டியாகக் கருதப்பட்டு, அதன் பேக்கேஜிங்கைப் பொருட்படுத்தாமல் 5% ஜிஎஸ்டி விதிக்கப்படுகிறது. இது பல வருடங்களாகக் குழப்பத்தை ஏற்படுத்திய ஒரு முக்கியப் புள்ளி.

2. கேரமல் பாப்கார்ன் (இனிப்புச் சேர்த்தது): இது ஒரு இனிப்பு வகையாகவும், அத்தியாவசியமற்றதாகவும் கருதப்பட்டு, அதற்கு 18% ஜிஎஸ்டி விதிக்கப்படுகிறது. இது இனி ஒரு ஆடம்பர சிற்றுண்டியின் பட்டியலில் சேர்க்கப்பட்டுள்ளது.

இந்த புதிய விதிமுறைகள், பாப்கார்ன் வரி குறித்த பல ஆண்டுகால குழப்பங்களுக்கு முடிவுக்குக் கொண்டுவரும் என்று எதிர்பார்க்கப்படுகிறது. இந்த முடிவு பாப்கார்ன் விற்பனையாளர்கள், சினிமா உரிமையாளர்கள் மற்றும் நுகர்வோர் என அனைவரையும் வெவ்வேறு வழிகளில் பாதிக்கும் என்பதில் சந்தேகமில்லை. இனி, தியேட்டருக்குச் செல்பவர்கள், தங்கள் பர்சைக் காப்பாற்ற உப்புப் பாப்கார்னைத் தேர்ந்தெடுப்பார்கள், அல்லது அதிக விலை கொடுத்து இனிப்புப் பாப்கார்னை சுவைப்பார்கள்!