சிவன் கோவிலுக்காக மூண்ட போரா? தாய்லாந்து கம்போடியா போரின் பின்னணி..!

தாய்லாந்துக்கும் கம்போடியாவிற்கும் இடையே பல ஆண்டுகளாகத் தொடரும் எல்லைப் பிரச்சினையில், குறிப்பாக பிரே விஹியர் (Preah Vihear) கோவில் பெரும் சர்ச்சைக்குரிய மையமாக இருந்து வருகிறது. இந்த கோவில் 11-ஆம் நூற்றாண்டைச் சேர்ந்த பழமையான சிவன் கோவில் என்பதும், யுனெஸ்கோ உலகப் பாரம்பரிய தளமாக அறிவிக்கப்பட்டுள்ளதும் இதன் முக்கியத்துவத்தை மேலும் அதிகரிக்கின்றன. இந்த கோவில், வெறும் கட்டுமானம் மட்டுமல்லாமல், இரு நாடுகளின் தேசிய பெருமை, கலாச்சார அடையாளம் மற்றும் வரலாற்றின் நீட்சியாக பார்க்கப்படுகிறது.

போரின் பின்னணி:

பிரே விஹியர் கோவில் தாய்லாந்து - கம்போடியா எல்லையில், கம்போடியாவின் சியெம் ரீப் மாகாணத்தில் உள்ள ஒரு மலை உச்சியில் அமைந்துள்ளது. இந்த கோவில், வரலாற்று ரீதியாக கம்போடியாவின் ஒரு பகுதியாகவே இருந்து வந்தாலும், அதன் நிலப்பரப்பு, தாய்லாந்து எல்லைக்கு மிக அருகில் இருப்பதால், நீண்ட காலமாகவே இரு நாடுகளுக்கும் இடையே உரிமை கோரல் இருந்து வந்தது.

1962 ஆம் ஆண்டில், சர்வதேச நீதிமன்றம் (International Court of Justice - ICJ) பிரே விஹியர் கோவில் கம்போடியாவிற்கு சொந்தமானது என்று தீர்ப்பளித்தது. இந்தத் தீர்ப்பை தாய்லாந்து ஏற்றுக்கொண்டாலும், கோவிலைச் சுற்றியுள்ள நிலப்பகுதி குறித்த சர்ச்சை முடிவுக்கு வரவில்லை. குறிப்பாக, கோவிலுக்குச் செல்லும் பாதைகள் மற்றும் அதன் அருகிலுள்ள சில நிலப்பகுதிகள் மீது தாய்லாந்து உரிமை கோரியது.

மீண்டும் பதற்றம்:

2008 ஆம் ஆண்டில், யுனெஸ்கோ பிரே விஹியர் கோவிலை உலகப் பாரம்பரிய தளமாக அறிவித்த பிறகு, இரு நாடுகளுக்கும் இடையே மீண்டும் பதற்றம் வெடித்தது. கம்போடியா இதை தனது வெற்றி என்று கொண்டாடிய நிலையில், தாய்லாந்து இந்த அறிவிப்பை எதிர்த்து, கோவிலைச் சுற்றியுள்ள நிலப்பகுதியும் தங்களுக்கே சொந்தம் என்று வாதிட்டது. இதன் விளைவாக, இரு நாட்டுப் படைகளும் எல்லைப் பகுதியில் குவிக்கப்பட்டன.

மோதல்கள் மற்றும் உயிரிழப்புகள்:

2008 முதல் 2011 ஆம் ஆண்டு வரை, பிரே விஹியர் கோவில் மற்றும் அதைச் சுற்றியுள்ள பகுதிகளில் பலமுறை கடுமையான மோதல்கள் நிகழ்ந்தன. பீரங்கி குண்டுகளின் தாக்குதல்கள், துப்பாக்கிச் சண்டைகள் மற்றும் இரு தரப்பிலும் ஏற்பட்ட உயிர் சேதங்கள் அப்பகுதியில் பெரும் பதட்டத்தை உருவாக்கின. இரு நாடுகளும் தற்காலிக போர் நிறுத்த ஒப்பந்தங்களை மேற்கொண்டும், மீண்டும் மீண்டும் மோதல்கள் வெடித்தன. இந்த மோதல்கள் சர்வதேச அளவில் கவலையை ஏற்படுத்தின.

அந்தவகையில் மீண்டும் தற்போது கம்போடியா மீது தாய்லாந்து போர் விமானங்கள் மற்றும் பீரங்கிகள் முலமாக குண்டு வீசி வருகிறது. அதேபோல் கம்போடியாவும் தாய்லாந்து மீது தாக்குதலில் ஈடுபட்டு வருகிறது. இரு நாட்டு இரானுவ வீரர்களும் எல்லையில் கடுமையாக மோதிக் கொண்டனர். தாய்லாந்து கம்போடியாவின் இராணுவ நிலைகளை குறிவைத்து தாக்கியது. கம்போடியாவும் பதில் தாக்குதல் நடத்தி வருகிறது. இதுவரை இந்த மோதலில் 14 பேர் இறந்துள்ளதாக கூறப்படுகிறது.