சீனாவா, அமெரிக்காவா? இன்டெல் CEO-வை பதவி விலகச் சொன்ன டிரம்ப்..!

ஒரு காலத்தில் கணினிச் சிப்கள் தயாரிப்பில் உலகையே ஆண்டு வந்த ஒரு பெரிய நிறுவனம் இன்டெல். ஆனால், சமீப காலங்களில், அதன் புகழ் கொஞ்சம் கொஞ்சமாக மங்கிக் கொண்டிருந்தது.

போட்டியாளர்களான தைவானின் டி.எஸ்.எம்.சி (TSMC) மற்றும் என்விடியா (Nvidia) போன்ற நிறுவனங்கள் வேகமாக முன்னேறிக் கொண்டிருந்தன.

இந்த நிலையில், இன்டெல் நிறுவனத்தை மீண்டும் பழைய பெருமைக்குக் கொண்டுவர, அதன் பழைய CEO பாட் கெல்சிங்கர் (Pat Gelsinger) நீக்கப்பட்டு, புதிய தலைமைச் செயல் அதிகாரியாக லிப்-பு டான் (Lip-Bu Tan) மார்ச் மாதம் பொறுப்பேற்றார்.

லிப்-பு டான் வந்ததும் சில பெரிய முடிவுகளை எடுத்தார். நிறுவனத்தின் செலவுகளைக் குறைக்க, ஆயிரக்கணக்கான பணியாளர்களைப் பணி நீக்கம் செய்ய முடிவெடுத்தார்.

மேலும், சில புதிய தொழிற்சாலைகளின் கட்டுமானப் பணிகளையும் நிறுத்தி வைத்தார். இது இன்டெல் நிறுவனத்தை மீண்டும் வலுப்படுத்தும் என்று அவர் நம்பினார்.

ஆனால், திடீரென ஒரு புயல் கிளம்பியது. டொனால்டு டிரம்ப், "இன்டெல்லின் புதிய CEO ஆன லிப்-பு டான் உடனடியாகப் பதவி விலக வேண்டும்!" என்று தனது சமூக ஊடகப் பக்கத்தில் கோபத்துடன் பதிவிட்டார்.

இதற்குக் காரணம், லிப்-பு டானின் சீனத் தொடர்புகள். அமெரிக்க செனட்டர் டாம் காட்டன் (Tom Cotton) என்பவர் இன்டெல் நிறுவனத்திற்கு ஒரு கடிதம் எழுதினார்.

அதில், லிப்-பு டான் தனது முதலீடுகள் மூலம் நூற்றுக்கணக்கான சீன நிறுவனங்களில் முதலீடு செய்திருப்பதாகவும், அவற்றில் சில சீன இராணுவத்துடன் தொடர்புடையவை என்றும் சுட்டிக்காட்டினார்.

இது அமெரிக்காவின் தேசிய பாதுகாப்புக்கு ஆபத்தானது என்று அவர் கூறினார்.

டிரம்பும் அதே கருத்தை எதிரொலித்தார். "லிப்-பு டான் இரண்டு பக்கமும் லாபம் தேடும் வகையில், முரண்பட்ட நலன்களுடன் (Conflicted) இருக்கிறார்.

அமெரிக்காவின் பாதுகாப்பு மற்றும் பொருளாதாரத்திற்கு இது ஆபத்தானது. இந்த பிரச்சினைக்கு வேறு தீர்வு இல்லை.

அவர் பதவி விலகுவதுதான் ஒரே வழி" என்று அழுத்தமாகச் சொன்னார்.

டிரம்பின் இந்தக் கருத்து இன்டெல் நிறுவனத்திற்கு மேலும் சிக்கலை ஏற்படுத்தியது. ஏற்கெனவே சரிவில் இருந்த அதன் பங்குகள், டிரம்பின் பேச்சால் மேலும் 4% சரிந்தன.

இன்டெல் நிறுவனமோ, "நாங்கள் அமெரிக்காவின் தேசிய பாதுகாப்புக்கு உறுதியுடன் இருக்கிறோம்" என்று பதிலளித்தது. ஆனால், லிப்-பு டான் இதுவரை எந்தப் பதிலையும் கூறவில்லை.

ஒருபுறம், நிறுவனத்தைக் காப்பாற்ற முயற்சித்துக்கொண்டிருக்கும் ஒரு CEO, மறுபுறம், சீனத் தொடர்புகளால் அவரது பதவிக்கே ஆபத்து வந்திருப்பதுதான் இப்போது நடக்கும் கதை.

இந்த மோதல் இன்டெல் நிறுவனத்தின் எதிர்காலத்தை எப்படிப் பாதிக்கும் என்பதை உலகமே உற்றுநோக்கி வருகிறது.