டிரம்ப்பின் புதிய அச்சுறுத்தல்..!: ஐ.டி சேவைகளுக்கும் வர்த்தக வரி?

இந்த நடவடிக்கை, H-1B விசா திட்டங்களைக் கடுமையாக்குவதோடு, இந்திய ஐடி நிறுவனங்களையும் நேரடியாகக் குறிவைப்பதாக உள்ளது.

இந்தியாவின் மிக முக்கியமான ஏற்றுமதிப் பிரிவான ஐடி துறையை இது பாதிக்கும் என்பதால், இந்த முடிவு இந்தியப் பொருளாதாரத்திற்கு பெரும் அதிர்ச்சியை ஏற்படுத்தியுள்ளது.

டிரம்ப் நிர்வாகம் இந்திய ஐடி துறைக்கு எதிரான கடுமையான நடவடிக்கைகளில் ஆர்வம் காட்டுவது, ஜாக் போசோபிக் என்பவரின் 'X' சமூக வலைத்தள இடுகையால் வெளிச்சத்துக்கு வந்தது.

"அவுட்சோர்சிங் செய்யப்படும் அனைத்து வேலைகளுக்கும் வரி விதிக்கப்பட வேண்டும்" என்று அவர் குறிப்பிட்டிருந்தார்.

இந்த இடுகையை டிரம்ப்பின் வர்த்தக ஆலோசகரான பீட்டர் நவரோ பகிர்ந்தது, இந்த யோசனை வெள்ளை மாளிகையிலும் விவாதிக்கப்பட்டு வருவதை உறுதி செய்கிறது.

இந்த நடவடிக்கைகள் நடைமுறைப்படுத்தப்பட்டால், உலகளாவிய அவுட்சோர்சிங் வணிகத்தின் அடிப்படை பொருளாதாரமே தலைகீழாக மாறும்.

வெளிநாட்டு ஊழியர்களுக்கு வரி விதிக்கப்பட்டால், அமெரிக்க நிறுவனங்களுக்கு ஐடி மற்றும் தொழில்நுட்ப உதவிகள் வழங்கும் செலவு அதிகரிக்கும்.

இதனால், அமெரிக்க நிறுவனங்கள் ஒப்பந்தங்களை மறுபரிசீலனை செய்யவோ, அல்லது மீண்டும் தங்கள் பணிகளை அமெரிக்காவிலேயே செய்யவோ முடிவெடுக்கலாம்.

இது விநியோகச் சங்கிலியைப் பாதிக்கலாம், திட்டங்கள் தாமதமாகலாம், மேலும் அமெரிக்கச் சந்தையை பெரிதும் நம்பியிருக்கும் இந்திய ஐடி நிறுவனங்களின் லாபத்தைக் கடுமையாகக் குறைக்கலாம்.

இந்தியாவின் ஐடி மற்றும் சேவைத் துறை அதன் பொருளாதாரத்தின் மிக முக்கியத் தூணாகச் செயல்படுகிறது.

ஒவ்வொரு வருடமும் லட்சக்கணக்கான பொறியியல் மற்றும் கணினி அறிவியல் பட்டதாரிகள் வேலைக்கு வருகின்றனர்.

இன்ஃபோசிஸ், டிசிஎஸ், விப்ரோ, காக்னிசென்ட் போன்ற முக்கிய நிறுவனங்கள், அமெரிக்காவில் திறமையான ஊழியர்களை வேலைக்கு அமர்த்த H-1B விசாக்களை பெரிதும் சார்ந்துள்ளன.

அமெரிக்காவின் டிஜிட்டல் வளர்ச்சிக்குத் தேவையான மென்பொருள் உருவாக்கம், கிளவுட் சேவைகள் போன்றவற்றில் இந்திய ஐடி நிறுவனங்கள் முக்கியப் பங்கு வகிக்கின்றன.

சேவை வரிகளுக்கு இணையாக, அமெரிக்கா விசா விதிமுறைகளையும் கடுமையாக்குகிறது. இது இந்தியப் பணியாளர்களுக்கு ஒரு முக்கிய வழியான H-1B விசாக்களைப் பாதிக்கும்.

இந்த விசாக்கள், இந்தியப் பணியாளர்கள் அமெரிக்காவில் நேரில் அனுபவத்தைப் பெறவும், வாடிக்கையாளர்களுடன் உறவை ஏற்படுத்தவும் உதவுகின்றன.

இது இந்தியாவின் ஐடி ஏற்றுமதி மாதிரிக்கு முதுகெலும்பாக உள்ளது. மாணவர்களுக்கான விசாக்களிலும் கட்டுப்பாடுகள் விதிக்கப்படுவது, இந்தியத் திறமையாளர்கள் வெளிநாடு செல்வதில் புதிய சிக்கல்களை உருவாக்கும்.

அமெரிக்கா வெளிநாட்டுப் பணப் பரிவர்த்தனைகளுக்கு வரியை உயர்த்தும் திட்டத்தையும் கொண்டுள்ளது.

உலகிலேயே அதிக அளவில் பணப் பரிவர்த்தனைகளைப் பெறும் நாடாக இந்தியா இருப்பதால், இது இந்தியப் பொருளாதாரத்திற்குப் பெரும் அடியாக இருக்கும். குளோபல் டிரேட் ரிசர்ச் இனிஷியேட்டிவ் (GTRI) அமைப்பு, இந்தத் திட்டம் சட்டமானால், இந்தியாவுக்கு ஆண்டுதோறும் பில்லியன் கணக்கான டாலர் அந்நியச் செலாவணி இழப்பு ஏற்படும் என எச்சரித்துள்ளது.

இந்திய ரிசர்வ் வங்கியின் தரவுகளின்படி, 2023-24 இல் இந்தியா பெற்ற பணப் பரிவர்த்தனைகளில் 27.7% அமெரிக்காவிலிருந்து வந்தவை என்பது குறிப்பிடத்தக்கது.