AIயின் அசுர வளர்ச்சி! இனி குறைந்த செலவில் மருந்து கண்டுபிடிக்கலாம்..!

கனடாவில் உள்ள சைமன் ஃப்ரேசர் பல்கலைக்கழக (SFU) விஞ்ஞானிகள், மருந்து கண்டுபிடிப்பு மற்றும் தயாரிப்பு முறையை மேம்படுத்த ஒரு புதிய AI தொழில்நுட்பத்தை உருவாக்கியுள்ளனர். இந்த AI, நோய்களுக்கான மருந்துகளை மிகக் குறைந்த செலவிலும், வேகமாகவும் உருவாக்க உதவும்.

செயற்கை நுண்ணறிவு (AI) தற்போது பல்வேறு துறைகளில் பயன்படுத்தப்படுகிறது. மருத்துவத் துறையில், நோய்களைக் கண்டறிதல், புதிய மருந்துகளை உருவாக்குதல் மற்றும் சிக்கலான அறுவை சிகிச்சைகளில் மருத்துவர்களுக்கு உதவுதல் போன்றவற்றில் AI முக்கியப் பங்கு வகிக்கிறது.

போக்குவரத்துத் துறையில், தானியங்கி வாகனங்கள் மற்றும் போக்குவரத்து நெரிசலைக் குறைப்பதற்கான அமைப்புகளை வடிவமைப்பதில் AI பயன்படுத்தப்படுகிறது. கல்வித்துறையில், AI மாணவர்களின் தனிப்பட்ட கற்றல் திறனுக்கு ஏற்றவாறு கல்வி முறைகளை மேம்படுத்தவும், தனிப்பயனாக்கப்பட்ட பாடத்திட்டங்களை உருவாக்கவும் உதவுகிறது. நிதித்துறையில், வங்கி மோசடிகளைக் கண்டறிதல் மற்றும் நிதி முடிவுகளை எடுப்பதில் AI கருவிகள் பயன்படுத்தப்படுகின்றன. தகவல் தொழில்நுட்பத்தில், சாட்பாட்கள் (Chatbots), ஸ்பேம் வடிகட்டுதல் மற்றும் இணையப் பாதுகாப்பை வலுப்படுத்துதல் போன்றவற்றில் AI இன்றியமையாததாக உள்ளது.

மருந்து கண்டுபிடிப்பில் AI-ன் பங்கு வழக்கமாக, ஒரு புதிய மருந்தைக் கண்டுபிடிக்க 10 வருடங்களுக்கும் அதிகமாகும், மேலும் இதற்கு சுமார் 1 பில்லியன் டாலர் செலவாகும். ஆனால், இந்த புதிய AI கருவி மூலம், இந்தச் செலவும், காலமும் வெகுவாகக் குறையும் என்று SFU பேராசிரியர் மார்ட்டின் எஸ்டர் கூறுகிறார்.

AI, மருந்து மூலக்கூறுகளை வடிவமைத்து, அவற்றை எவ்வாறு தயாரிப்பது என்பதற்கான வழியையும் விஞ்ஞானிகளுக்குக் காட்டுகிறது. இதனால், முன்பு சாத்தியமில்லாத பல மருந்துகளை இப்போது உருவாக்க முடியும்.

AI-யின் பலன்கள்

• வேகமான கண்டுபிடிப்பு: புதிய மருந்து கண்டுபிடிப்புக்கான காலம் 20 வருடங்களில் இருந்து சில வருடங்களாகக் குறைகிறது.

• பக்கவிளைவுகள் குறைவு: மருந்துகளின் பக்கவிளைவுகள், நச்சுத்தன்மை மற்றும் செயல்திறன் ஆகியவற்றையும் AI முன்கூட்டியே கணிக்கும்.

• தனிப்பயனாக்கப்பட்ட சிகிச்சை: ஒருவரின் உடல்நிலை, மரபணு தகவல்கள் ஆகியவற்றின் அடிப்படையில், அவருக்குச் சரியான மருந்துகளை AI பரிந்துரைக்கும். குறிப்பாக, புற்றுநோய் சிகிச்சையில் இது மிகவும் பயனுள்ளதாக இருக்கும்.

AI-யின் உதவியுடன், ஹாலிசின் (Halicin) என்ற புதிய ஆண்டிபயாடிக் மருந்து கண்டுபிடிக்கப்பட்டுள்ளது. இது AI-யின் திறனுக்கு ஒரு சிறந்த எடுத்துக்காட்டு. எதிர்காலத்தில், நோய்களைக் குணப்படுத்துவதிலும், தடுப்பதிலும் AI ஒரு மிகப்பெரிய மாற்றத்தைக் கொண்டு வரும் என்றே எதிர்பார்க்கப்படுகிறது.