ஏலியன்கள் விண்வெளியில் இல்லை, நம்முடன்தான் வாழ்கிறார்கள் மிரள வைக்கும் ஆய்வு!

பல தலைமுறைகளாக மனித இனம் ஒரு கேள்வியை மட்டும் விடாமல் துரத்திக் கொண்டிருக்கிறது: "இந்த பிரம்மாண்டமான பிரபஞ்சத்தில் நாம் தனியாகத்தான் இருக்கிறோமா?" இதற்கான விடையைத் தேடி நாம் பெரிய பெரிய தொலைநோக்கிகள் மூலம் வானத்தை அண்ணாந்து பார்த்துக் கொண்டிருக்கிறோம். செவ்வாய் கிரகத்திற்கும், அதற்கப்பால் உள்ள நட்சத்திரங்களுக்கும் சிக்னல்களை அனுப்பிக் கொண்டிருக்கிறோம். 

ஆனால், நாம் தேடும் அந்த ஏலியன்கள் பல ஒளி ஆண்டுகள் தொலைவில் இல்லாமல், இங்கேயே, இந்தப் பூமியில் நமக்குத் தெரியாமல் நம்முடனேயே வாழ்ந்து கொண்டிருந்தால் எப்படி இருக்கும்? இந்தக் கற்பனைக்கே எட்டாத கருத்தை முன்வைக்கிறது ஹார்வர்ட் பல்கலைக்கழகத்தின் புதிய ஆய்வு ஒன்று.

ஹார்வர்ட் முன்வைக்கும் வாதம்! இது ஏதோ சயின்ஸ் பிக்சன் படத்தின் திரைக்கதை என்று நினைத்துவிட வேண்டாம். ஹார்வர்ட் பல்கலைக்கழகத்தின் ஆய்வாளர்கள் வெளியிட்டிருக்கும் ஒரு கட்டுரை, நாம் இதுவரை நம்பியிருந்த பல விஷயங்களைப் புரட்டிப் போடுகிறது. இவர்களின் கூற்றுப்படி, வேற்றுகிரகவாசிகள் வானத்திலிருந்து வர வேண்டிய அவசியமில்லை; அவர்கள் ஏற்கனவே இங்கேதான் இருக்கிறார்கள். 

இவர்களை "கிரிப்டோடெரஸ்ட்ரியல்ஸ்" (Cryptoterrestrials) அதாவது 'மறைந்து வாழும் உயிரினங்கள்' என்று இந்த ஆய்வு அழைக்கிறது. இவர்கள் பூமிக்கு அடியிலோ, நிலவின் இருண்ட பகுதியிலோ அல்லது மனித உருவத்தில் நம்மைப் போலவே வேடமணிந்து நமக்கு இடையிலோ வாழ்ந்து கொண்டிருக்கலாம்.

இந்த ஆய்வு, நம்முடன் மறைந்து வாழ வாய்ப்புள்ள உயிரினங்களை நான்கு வகைகளாகப் பிரிக்கிறது, ஒவ்வொன்றும் நம்மை வியப்பால் உறைய வைக்கும் ரகம்.

1. மனித நாகரிகம் தோன்றுவதற்கு முன்பே, அழிந்துபோன மிக உயர்ந்த தொழில்நுட்ப அறிவு கொண்ட ஒரு மனித இனம் இருந்திருக்கலாம். அந்தப் பேரழிவில் தப்பியவர்கள் இன்றும் பூமிக்கு அடியில் ரகசியமாக வாழலாம்.

2. குரங்குகள் அல்லது டைனோசர்கள் போன்ற விலங்கினங்கள், மனிதர்களுக்குத் தெரியாமல் தனியாகப் பரிணாம வளர்ச்சி அடைந்து, புத்திசாலித்தனமான உயிரினங்களாக மாறி, குகைகளுக்குள் மறைந்து வாழலாம்.

3. இவர்கள் வேற்று கிரகத்திலிருந்து பல ஆண்டுகளுக்கு முன்பே பூமிக்கு வந்து குடியேறியவர்களாக இருக்கலாம் அல்லது எதிர்காலத்திலிருந்து கால இயந்திரம் மூலம் இங்கு வந்த நம் சந்ததியினராகவும் இருக்கலாம்.

4. தேவதைகள், பூதங்கள் என்று நாம் கதைகளில் படித்த உயிரினங்கள் வெறும் கற்பனை அல்ல; அவை தொழில்நுட்பத்தைப் பயன்படுத்தாத, மந்திர சக்திகள் கொண்ட வேறொரு பரிமாண உயிரினங்களாக இருக்கலாம் என்றும் கணிக்கப்படுகிறது.

அறிவியல் உலகம் ஏற்குமா? 

வழக்கமாக அடையாளம் தெரியாத பறக்கும் தட்டுகள் (UFO/UAP) பற்றிய செய்திகளை நாம் கேள்விப்பட்டிருப்போம். அவை எங்கிருந்தோ வந்து செல்கின்றன என்றுதான் நினைத்தோம். ஆனால், அவை இங்கிருந்தே இயக்கப்படலாம் என்கிறது இந்த ஆய்வு. நிச்சயமாக, இந்த வாதத்தை நிரூபிக்கப் போதுமான நேரடி ஆதாரங்கள் இல்லை என்பதால், பல விஞ்ஞானிகள் இதை உடனடியாக ஏற்க மறுக்கலாம். 

அதை இந்த ஆய்வாளர்களே ஒப்புக்கொள்கிறார்கள். இருப்பினும், "எதார்த்தம் என்பது நாம் நினைப்பதை விட விசித்திரமானது" என்பதால், திறந்த மனதுடன் இந்தச் சாத்தியக்கூறுகளை ஆராய வேண்டும் என்று அவர்கள் கேட்டுக்கொள்கிறார்கள்.

அமெரிக்க உளவுத்துறையே அடையாளம் தெரியாத வான்பொருட்கள் பற்றித் தீவிரமாக விசாரித்து வரும் வேளையில், இந்த ஆய்வு முக்கியத்துவம் பெறுகிறது. இத்தனை நாட்களாக தொலைநோக்கி வழியாக நட்சத்திரங்களை ஆராய்ந்து கொண்டிருந்த நாம், இனி நம் காலடியில் இருக்கும் பூமியின் மர்மங்களையும், நிலவின் ரகசியங்களையும் ஆராய வேண்டிய கட்டாயத்தில் இருக்கிறோம். விடை வானத்தில் இல்லை, ஒருவேளை நம் அருகிலேயே ஒளிந்திருக்கலாம்.