என்னது? அரிசி பாத்திரத்தில் உணரிகளா? (Sensors) IoT தொழில்நுட்பம் - அதிசயத்திலும் அதிசயம்!

"brb" என்றால் என்ன என்று தெரியுமா?

தெரியாது என்றால், நீங்கள் மிகவும் இளைஞர் என்று பொருள், இணையத்தின் தொடக்கக் காலம் உங்களுக்கு அறிமுகமில்லை என்று பொருள்.

அன்றைய இணையம் கணினிகளில்மட்டும்தான் கிடைத்தது. அந்தக் கணினிகள் மிகப் பெரிய அளவில் இருந்தன. அவற்றை ஒரு மேசைமீது வைக்கவேண்டும், தொலைபேசிக் கம்பிகளுடன் இணைக்கவேண்டும். அதன்பிறகு, ஒரு சிறப்பு மென்பொருளைத் திறந்து அதன்மூலம் இணையத்துடன் இணைக்கவேண்டும். இவ்வளவையும் செய்தபின்னர்தான் உங்களுக்கு மின்னஞ்சலோ மின் அரட்டையோ இணையத் தளங்களோ கிடைக்கும்.

அப்படி மேசைக் கணினிகளில் இணையம் வழியாக அரட்டை அடித்துக்கொண்டிருப்பவர்களுக்குத் திடீரென்று தாகம் எடுத்தால், அல்லது, கழிப்பறைக்குச் செல்லவேண்டியிருந்தால், "brb", அதாவது, "be right back" என்று சொல்லிவிட்டுச் செல்வார்கள். அதாவது, brb என்றால் "இதோ திரும்ப வருகிறேன்" என்று பொருள்.

அன்றைக்கு brb என்ற சுருக்க அறிவிப்பு தேவைப்பட்டது. ஆனால் இன்றைக்கு அதற்கு எந்தப் பொருளும் இல்லை. ஏனெனில், முன்புபோல் இணையமானது மேசைமீதுள்ள கணினியில்மட்டும் இருப்பதில்லை. அதனால், "இதோ வந்துட்டேன்" என்று சொல்லிவிட்டு நாம் எங்கும் செல்லமுடியாது. ஏனெனில், இணையம் எங்கும் கிடைக்கிறது, எதிலும் கிடைக்கிறது.

எடுத்துக்காட்டாக, நம் வீட்டில் இருக்கும் அறிவார்ந்த தொலைக்காட்சிகள் (Smart Televisions) நேரடியாக இணையத்தில் இணைந்து நமக்கு வேண்டிய நிகழ்ச்சிகளைத் தரவிறக்கிக் காண்பிக்கவல்லவை. நம் கையில் அணியக்கூடிய Health Band எனப்படும் உடல்நலப் பட்டைகள் நம்மைத் தொடர்ச்சியாகக் கண்காணித்து முதன்மையான தகவல்களை இணையத்துக்கு அனுப்பவல்லவை. இப்படிப் பெரிய, சிறிய, மிகச் சிறிய பொருட்களெல்லாம் இணையத்துடன் இணைகின்ற வசதி வந்துவிட்டதால், இன்றைய உலகம் IoT எனப்படும் Internet of Things (பொருட்களின் இணையம்) தொழில்நுட்பத்தைப் பலவிதங்களில் பயன்படுத்தத் தொடங்கிவிட்டது.