பெரும்பாலான விமானங்கள் ஏன் வெள்ளையாக இருக்கின்றன? அறிவியல் பின்னணி!

வெள்ளை நிறத்தை தவிர வேறு நிறங்களை விமானங்களில் பயன்படுத்தினால் அதன் எடை அதிகரிக்க வாய்ப்புள்ளது.அதாவது, பெயிண்ட் காரணமாக ஒரு விமானத்தின் எடையானது 273 முதல் 544 கிலோகிராம் வரை அதிகரிக்கிறது. இந்த தகவலை உலகப்புகழ் பெற்ற போயிங் நிறுவனத்தினுடைய அதிகாரி ஒருவர் தெரிவித்துள்ளார். மேலும், விமானத்தின் எடை அதிகரித்தால் அதிக எரிபொருள் தேவை ஏற்படும் நிலை உண்டாகும்.

544 கிலோ என்பது 8 பயணிகளுக்கு சமமானது. இந்த பிரச்சனையை ஓரளவிற்கு சமாளிப்பதற்காகவே வெள்ளை நிறத்தை பயன்படுத்துகின்றனர். பழைய வெள்ளை நிற விமானங்களை வாங்கினாலும் மீண்டும் பெயிண்ட் செலவு செய்ய தேவையில்லை. இதனாலேயே பெரும்பாலான விமான நிறுவனங்கள் வெள்ளை நிறத்தையே தேர்வு செய்கின்றன.

பொதுவாக பெரும்பாலான விமானங்களின் அளவு மற்றும் நிறுவனத்தின் லோகோ வேறு வேறாக இருந்தாலும், பெரும்பாலானவை வெள்ளை நிறத்திலே இருக்கும். ஆனால் எல்லா விமானங்களும் வெள்ளை நிறத்தில் இருப்பதில்லை. அரிதாக ஒரு சில விமானங்கள் கருப்பு, நீலம், மஞ்சள், பச்சை, சிகப்பு மற்றும் தங்க நிறங்களில் உள்ளது.

1973-ம் ஆண்டு அமெரிக்காவின் பிரானிஃப் இன்டர் நேஷனல் ஏர்வேஸ் (Braniff International Airways) விமான நிறுவனம், புகழ்பெற்ற கலைஞர் அலெக்சாண்டர் கால்டர் (Alexander Calder) என்பவரைக் கொண்டு முழுமையாக வண்ணங்கள் தீட்டப்பட்ட டக்ளஸ் DC-8 (Douglas DC-8) ஜெட் விமானத்தை அறிமுகப்படுத்தியது. இதற்கு "ஃப்ளையிங் கலர்ஸ்" (Flying Colors) என்று பெயரிடப்பட்டது.

இதுவே உலகின் முதல் முழுமையான வண்ணக் கலை வடிவமைப்புடன் பறந்த பிரபல விமானமாகும். ஏர்கால் மற்றும் பசிபிக் சவுத்வெஸ்ட் ஏர்லைன்ஸ் போன்ற விமான நிறுவனங்கள், 1970கள் மற்றும் 1980கள் முழுவதும் தங்கள் விமானங்களின் முகப்புகளில் பிரகாசமான இளஞ்சிவப்பு, ஊதா, மஞ்சள் மற்றும் ஆரஞ்சு வண்ணங்களைப் பயன்படுத்தின. இதுவே தற்போதைய பல வண்ணமயமான விமானங்கள் வானில் பறப்பதற்கு ஆரம்பப் புள்ளி.

கருப்பு நிற விமானங்கள்: உலக விமானங்கள் பொதுவாக வெள்ளை நிறத்தில் இருப்பதை விட்டு விட்டு, நியூசிலாந்தைச் சேர்ந்த ஏர் நியூசிலாந்து விமானங்கள், தனித்துவமாக கறுப்பு நிறத்தில் வடிவமைக்கப் பட்டுள்ளன. இதன் பின்னணி, நாட்டின் புகழ்பெற்ற ரக்பி அணி ‘ஆல் பிளாக்ஸ்’ அணியின் அடையாளத்தோடு தொடர்புடையது.

உலகளவில் ரக்பியில் நியூசிலாந்தின் பெருமையை 2011 ம் ஆண்டு நிலைநாட்டிய இந்த அணி, திறமை, ஒற்றுமை, சக்தி மற்றும் ஆற்றல் மூலம் நாட்டின் பெயரை பிரபலப் படுத்தியது. அதை பெருமைப்படுத்தும் விதமாக அந்த அணியின் சீருடை நிறமான கருப்பு நிறத்தில் தங்களது விமானங்களை 2013 ம் ஆண்டு ஏர் நியூசிலாந்து அறிமுகப்படுத்தியது.

விமான நிறுவனங்களின் அடையாளத்தில் மிகவும் ஆதிக்கம் செலுத்தும் நிறம் நீலநிறம் .உளவியலில், நீல நிறம் நிலைத்தன்மை மற்றும் தொழில்முறையுடன் தொடர்புடையது. பயணி "பாதுகாப்பாக இருக்கிறார் "என்பதை நீல நிறம் ஆழ்மனதில் உணர்த்துகிறது. இது நம்பிக்கையையும், நம்பகத்தன்மையையும் உணர்த்துவதாலும், பயணிகளுக்கு அமைதியைத் தருவதாலும் பல முண்ணனி நிறுவனங்கள் தங்களது விமானங்களுக்கு நீல நிறத்தை தேர்ந்தெடுத்துள்ளது.

விமானப் பயணம் மன அழுத்தத்தை ஏற்படுத்தக்கூடும். நீல நிறச் சூழல்கள் இதயத் துடிப்பைக் குறைத்து, பதட்டத்தையும் தணிக்கும் என்று ஆய்வுகள் காட்டுகின்றன, இதனால்தான் விமானத்தின் இருக்கைகள் பெரும்பாலும் நீல நிறத்தில் உள்ளன.

நீலம் ஒரு உயர் தர நிறமாகக் கருதப்படுவதால், உயர்தரப் பயணிகளை இலக்காகக் கொண்ட பாரம்பரிய விமான நிறுவனங்களான லுஃப்தான்சா, KLM ராயல் ஏர்லைன்ஸ், ஜெட் புளு ஏர்லைன்ஸ் மற்றும் யுனைடெட் போன்ற நிறுவனங்களால் நீலநிற விமானங்கள் பயன்படுத்தப் படுகிறது.

ஸ்பிரிட் ஏர்லைன்ஸ், தனது பிராண்ட் அங்கீகாரத்தை மேம்படுத்தவும் வேறுபடுத்திக்காட்டவும், 2014-ஆம் ஆண்டில் பிரகாசமான மஞ்சள் நிற விமானங்களை அறிமுகப்படுத்தியது. ஏர் ஆசியா, குண்டாஸ் (Qantas), துருக்கி ஏர்லைன்ஸ், டெல்டா ஏர்லைன்ஸ்,விர்ஜின் ஏர்லைன்ஸ் போன்ற விமான நிறுவனங்கள் சிகப்பு நிற விமானங்களை தங்களது நிறுவனங்களில் பயன்படுத்தி வருகின்றனர்.

S7 ஏர்லைன்ஸ், அயர்லாந்து நாட்டின் ஏக்ஸ் லிங் விமானங்கள், ஜெர்மன் தலைநகர் தலைமையிடமாகக் கொண்ட காண்டோர் (Condor) விமான நிறுவனங்கள் போன்றவை பச்சை நிற விமானங்களை பயன்படுத்தி வருகின்றனர். சவுத்வெஸ்ட் ஏர்லைன்ஸ், பழங்கால "டெசர்ட் கோல்ட்" வண்ணத்தில் வர்ணம் பூசப்பட்ட ஒரு சிறப்பு போயிங் 737 மேக்ஸ் 8 விமானத்தை தங்க நிறத்தில் இயக்குகிறது.