தீபாவளிக்கு ரேஷனில் 10 கிலோ அரிசி இலவசம்: புதுச்சேரி அரசு!

புதுச்சேரியில் தீபாவளி பண்டிகைக்காக குடும்ப அட்டைதாரர்களுக்கு, தலா 10 கிலோ அரிசி, 2 கிலோ சர்க்கரை இலவசமாக வழங்க அம்மாநில முதல்வர் ரங்கசாமி உத்தரவிட்டுள்ளார்.

இதுகுறித்து குடிமைப்பொருள் வழங்கல்துறை இயக்குனர் உதயகுமார் அனுப்பிய அறிக்கையில் தெரிவித்ததாவது:

புதுவையில் அனைத்துக் குடும்ப அட்டைதாரர்களுக்கும் தீபாவளி பண்டிகையை முன்னிட்டு தலா 10 கிலோ அரிசியும், 2 கிலோ சர்க்கரையும் வழங்கப்பட உள்ளன. இந்த பொருள்கள் அனைத்தும் நியாய விலைக் கடைகள் மூலம் வழங்குவதற்கு உரிய ஏற்பாடு செய்யப்படவிருக்கிறது. இதற்காக தற்போது செயல்பாட்டில் உள்ள நியாயவிலைக் கடைகள், அட்டைதாரர்கள் எண்ணிக்கை உள்ளிட்ட விவரங்களை 2 நாள்களுக்குள் தயார் செய்து அனுப்பி வைக்குமாறு அறிவுறுத்தப்பட்டுள்ளது.

–இவ்வாறு அந்த அறிக்கையில் தெரிவிக்கப் பட்டுள்ளது.