ஜாம்பவான் ஆஸ்திரேலியாவை வென்று எழுச்சி பெறுமா ஆப்கானிஸ்தான்?

உலக கோப்பை கிரிக்கெட் ஒருநாள் போட்டித் தொடரில் மும்பை வான்கடே ஸ்டேடியத்தில் இன்று நடைபெறும் போட்டியில் ஐந்துமுறை சாம்பியன் பட்டம் வென்ற ஜாம்பவான் ஆஸ்திரேலியாவை எதிர்கொள்கிறது ஆப்கானிஸ்தான்.

ஆஸ்திரேலியா, ஆப்கானிஸ்தான் இரு அணிகளுக்குமே இது 8-வது போட்டியாகும். ஆஸ்திரேலியா 10 புள்ளிகளுடன் பட்டியலில் மூன்றாவது இடத்தில் உள்ளது. ஆப்கானிஸ்தான் 8 புள்ளிகளுடன் 6-வது இடத்தில் உள்ளது. சென்னையில் நடைபெற்ற முதல் போட்டியில் ஆஸ்திரேலிய அணி, இந்திய அணியிடம் தோல்விகண்டது. லக்னெளவில் நடைபெற்ற 2-வது போட்டியில் தென்னாப்பிரிக்காவிடம் 134 ரன்கள் வித்தியாசத்தில் ஆஸ்திரேலியா தோல்வி அடைந்தது. 3-வது போட்டியில் இலங்கை அணியையும், நான்காவது போட்டியில் பாகிஸ்தானையும் ஆஸ்திரேலியா வென்றது. தில்லியில் அக் 25 ஆம் தேதி நடைபெற்ற 5-வது போட்டியில் ஆஸ்திரேலியா, நெதர்லாந்தை 309 ரன்கள் வித்தியாசத்தில் வெற்றிகண்டது. தர்மசாலாவில் நடைபெற்ற 6-வது போட்டியிலும் ஆஸ்திரேலியா நியூஸிலாந்தை 5 ரன்கள் வித்தியாசத்தில் வென்றது. நவம்பர் 4 ஆம் தேதி ஆமதாபாதில் நடைபெற்ற 7-வது போட்டியில் இங்கிலாந்தை ஆஸ்திரேலியா 33 ரன்கள் வித்தியாசத்தில் வீழ்த்தியது.

முதல் போட்டியில் ஆப்கானிஸ்தான், வங்கதேச அணியிடம் வீழ்ந்தது. தில்லியில் நடைபெற்ற 2-வது போட்டியில் ஆப்கானிஸ்தானை இந்தியா 8 விக்கெட் வித்தியாசத்தில் தோற்கடித்தது. அக்டோபர் 15 இல் தில்லியில் நடைபெற்ற 3-வது போட்டியில் ஆப்கானிஸ்தான், இங்கிலாந்து அணியை 69 ரன்கள் வித்தியாசத்தில் வென்றது. அக் 18 ஆம் தேதி சென்னை, சிதம்பரம் ஸ்டேடியத்தில் நடைபெற்ற 4-வது போட்டியில் நியூஸிலாந்து அணியில் ஆப்கானிஸ்தான் 149 ரன்கள் வித்தியாசத்தில் தோல்வி அடைந்தது. சென்னையில் அக். 23 இல் நடைபெற்ற 5-வது போட்டியில் ஆப்கானிஸ்தான், பாகிஸ்தான் அணியை 8 விக்கெட் வித்தியாசத்தில் வென்றது. புனேயில் நடைபெற்ற 6-வது போட்டியில் ஆப்கானிஸ்தான் இலங்கை அணியை 7 விக்கெட் வித்தியாசத்தில் வென்றது. சென்னையில் நடைபெற்ற 7-வது போட்டியில் ஆப்கானிஸ்தான் பாகிஸ்தானை 8 விக்கெட் வித்தியாசத்தில் வீழ்த்தியது.

ஆஸ்திரேலிய அணி: டேவிட் வார்னர், டிராவிஸ் ஹெட், மிட்செல் மார்ஷ், ஸ்டீவன் ஸ்மித், மார்னஸ் லபுஸ்சாக்னே, ஜோஷ் இங்லிஸ் (விக்கெட் கீப்பர்), கிளென் மாக்ஸ்வெல், மார்கஸ் ஸ்டோனிஸ், பாட் கம்மின்ஸ் (கேப்டன்), மிட்செல் ஸ்டார், ஆடம் ஜம்பா, ஜோஷ் ஹாஸ்லிவுட்.

ஆப்கானிஸ்தான் அணி: ரஹ்மனுல்லா குர்பாஸ், இப்ராகிம் ஜர்தான், ரஹ்மத் ஷா, ஹஷ்மதுல்லா ஷாஹிதி (கேப்டன்), அஸ்மதுல்லா ஓமர்சாய், இக்ரம் அலிகில் (விக்கெட் கீப்பர்), முகமது நபி, ரஷீத் கான், முஜிபுர் ரஹ்மான், நவீன் உல் ஹக், நூர் அகமது மற்றும் பஸுல்லாஹ் பரூக்கி.