கேஸ் ட்ரபிள் முதல் உடல் பருமன் வரை... உருளைக்கிழங்கு செய்யும் சதி! மிஸ் பண்ணாம படிங்க!

நம்ம ஊரு கல்யாண பந்தியில் இருந்து, தியேட்டர் ஸ்நாக்ஸ் வரைக்கும் நீக்கமற நிறைந்திருக்கும் ஒரு காய் எதுன்னு கேட்டா, அது உருளைக்கிழங்குதான். சின்னக் குழந்தைகள் காய்கறியே சாப்பிட மாட்டேன் என்று அடம் பிடித்தாலும், "சிப்ஸ்" அல்லது "ஃபிரெஞ்ச் ஃபிரைஸ்" என்றால் தட்டாமல் சாப்பிடுவார்கள்.

பெரியவர்களுக்குச் சொல்லவே வேண்டாம், உருளைக்கிழங்கு மசாலா இல்லாமல் பூரி சாப்பிட்ட திருப்தியே வராது. நாக்கிற்கு ருசியாக இருப்பதால், இதை நாம் அடிக்கடி உணவில் சேர்த்துக்கொள்கிறோம். ஆனால், அளவுக்கு மிஞ்சினால் அமிர்தமும் நஞ்சு என்பது உருளைக்கிழங்குக்கும் பொருந்தும். 

சர்க்கரை எகிறும்!

உருளைக்கிழங்கில் மாவுச்சத்து மிக அதிகமாக உள்ளது. இது உடலுக்கு உடனடி எனர்ஜியைத் தரும் என்பது உண்மைதான். ஆனால், இதில் இருக்கும் 'கிளைசெமிக் இன்டெக்ஸ்' அளவு அதிகம். அதாவது, இதைச் சாப்பிட்டவுடன், ரத்தத்தில் சர்க்கரையின் அளவை 'கிடுகிடு'வென உயரச் செய்துவிடும்.

குறிப்பாகச் சர்க்கரை நோய் உள்ளவர்கள், அடிக்கடி உருளைக்கிழங்கு சாப்பிட்டால், ரத்த சர்க்கரை கட்டுப்பாட்டை மீறிச் சென்றுவிடும். நீண்ட நாட்கள் இப்படிச் சாப்பிட்டால், இன்சுலின் சுரப்பதில் பிரச்சனை ஏற்பட்டு, நோய் தீவிரமடைய வாய்ப்புள்ளது.

உடல் எடை அதிகரிக்கும்!

"என்ன இவன் பலூன் மாதிரி உப்பிக்கிட்டே போறான்?" என்று யாரையாவது பார்த்துக் கேட்டால், அவர்கள் உருளைக்கிழங்கு பிரியராக இருக்க வாய்ப்புள்ளது. இதில் உள்ள அதிகப்படியான ஸ்டார்ச் சத்து, உடலில் கொழுப்பாகத் தங்கும். அதிலும் குறிப்பாக, நாம் உருளைக்கிழங்கை வேகவைத்துச் சாப்பிடுவதை விட, எண்ணெயில் பொரித்து சிப்ஸ் ஆகவோ, பஜ்ஜியாகவோதான் அதிகம் சாப்பிடுகிறோம். உருளைக்கிழங்கு எண்ணெயை அதிகமாக உறிஞ்சும் தன்மை கொண்டது. இதனால் கெட்ட கொழுப்பு உடலில் சேர்ந்து, உடல் எடையை தாறுமாறாக ஏற்றும். இதய நலனுக்கும் இது நல்லதல்ல.

வயிறு மற்றும் சருமப் பிரச்சனைகள்!

சிலருக்கு உருளைக்கிழங்கு சாப்பிட்டாலே வயிறு 'திம்'மென்று ஆகிவிடும். காரணம், இது ஜீரணமாவதற்கு அதிக நேரம் எடுத்துக்கொள்ளும். இதனால் வாயுத் தொல்லை, வயிறு உப்பசம் போன்ற பிரச்சனைகள் வரும். ஏற்கெனவே அல்சர் அல்லது செரிமானக் கோளாறு உள்ளவர்கள் இதைத் தவிர்ப்பது நல்லது. அதுமட்டுமல்ல, அதிகப்படியான மாவுச்சத்து சிலருக்கு சருமத்தில் எண்ணெய் பசையை அதிகரித்து, முகப்பருக்கள் வரவும் காரணமாக அமையும் என்று நிபுணர்கள் எச்சரிக்கிறார்கள்.

அப்படியே தவிர்க்கணுமா?

இவ்வளவு பிரச்சனைகள் இருந்தாலும் உருளைக்கிழங்கை முற்றிலுமாக ஒதுக்கத் தேவையில்லை. சமைக்கும் முறையை மாற்றினாலே போதும். எண்ணெயில் பொரிப்பதற்குப் பதிலாக, வேகவைத்தோ அல்லது மற்ற காய்கறிகளுடன் சேர்த்துக் கூட்டு மாதிரியோ செய்து சாப்பிடலாம்.

உருளைக்கிழங்கு ஒரு சுவையான காய்கறிதான், அதில் மாற்றுக் கருத்து இல்லை. ஆனால், அதை வாரத்திற்கு ஒன்று அல்லது இரண்டு முறை என்று அளவோடு வைத்துக்கொள்வதுதான் புத்திசாலித்தனம். குறிப்பாக உடல் பருமன், சர்க்கரை நோய் உள்ளவர்கள், நாவைக் கட்டுப்படுத்தி உருளைக்கிழங்கைக் குறைத்துக்கொண்டால், ஆரோக்கியம் உங்கள் கையில் இருக்கும். ருசி முக்கியம்தான், ஆனால் உயிர் அதைவிட முக்கியம் இல்லையா?

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)