கிரேன்பெர்ரி பழங்களில் இத்தனை நன்மைகளா?

‘குருதிநெல்லி’ என்று அழைக்கப்படும் கிரேன்பெர்ரி பழங்கள் வடஅமெரிக்கா மற்றும் கனடாவில் விளைபவை. சிறிதாக சிவப்பு நிறத்தில் இருக்கும் இது, நம் ஊரில் விளையும் இலந்தைப் பழம் போல தோற்றமளிக்கின்றன. புளிப்பும் இனிப்பும் கலந்த சுவையுடன் இருக்கின்றன. தற்போது சூப்பர் மார்க்கெட்டுகளில் உலர் பழங்களாக இவை கிடைக்கின்றன. இவற்றில் ஏராளமான சத்துக்கள் இருக்கின்றன. இவற்றின் பயன்பாடுகள் குறித்து இந்தப் பதிவில் காண்போம்.

1. இருதய ஆரோக்கிய மேம்பாடு: கிரேன்பெர்ரியில் பாலிபினால்கள் எனப்படும் ஆன்டி ஆக்ஸிடன்ட்கள் நிறைந்துள்ளன. இவை உடலில் எல்டிஎல் (கெட்ட கொலஸ்ட்ரால்) அளவைக் குறைத்து இதயத்தைப் பாதுகாக்கின்றன.

2. புற்றுநோய் அபாயத்தைக் குறைக்கிறது: வயிறு வீக்கம் மற்றும் அல்சர் ஏற்படும் அபாயத்தைக் குறைக்கிறது. இது மார்பகம், கருப்பை, கல்லீரல், புரோஸ்டேட் மற்றும் பெருங்குடல் புற்றுநோய்க்கு எதிராகவும் திறம்பட செயல்படுகிறது.

3. வைட்டமின்கள் மற்றும் தாதுக்களின் பவர்ஹவுஸ்: வைட்டமின் சி, வைட்டமின் ஏ, வைட்டமின் ஈ, வைட்டமின் கே, பி காம்ப்ளக்ஸ் ஆகிய சத்துகள் நிரம்பிய இந்தப் பழங்கள், உயிரணுக்களுக்கு தீங்கு விளைவிக்கும் ரசாயனங்களில் இருந்து உடலை பாதுகாக்கிறது. வைட்டமின் ஈ மூட்டு ஆரோக்கியத்தை மேம்படுத்துவதோடு, கீல்வாதத்தின் அபாயத்தையும் குறைக்கிறது.

4. நோய் எதிர்ப்பு சக்தியை அதிகரிக்கச் செய்கிறது: இந்த சுவையான பழத்தில் வைட்டமின் சி ஏராளமாக உள்ளதால், ஒரு சக்தி வாய்ந்த ஆக்ஸிஜனேற்றியாக செயல்படுகிறது. இது நோய் எதிர்ப்பு சக்தியை அதிகரிக்கிறது, பல், ஈறு பிரச்னைகளைத் தடுக்கிறது. தீங்கு விளைவிக்கும் பாக்டீரியாக்களை பற்களின் மேற்பரப்பில் பிணைப்பதைத் தடுக்கிறது.

5. செரிமானத்தை தூண்டுகிறது: செரிமான அமைப்பை மேம்படுத்தி, குடலுக்கு நன்மை பயக்கும் பாக்டீரியாவை ஊக்குவிக்கிறது. இதில் நார்ச்சத்து நிறைந்துள்ளதால் மலச்சிக்கல் தொடர்பான பிரச்னைகளைத் தடுக்கிறது. மேலும், மறைமுகமாக எடை இழப்பிற்கு ஆதரவாக செயல்பட்டு உடலை சிக்கென வைக்கிறது.

6. சர்க்கரை நோயைக் கட்டுப்படுத்துகிறது: இதில் உள்ள பாலிஃபீனால்கள் போன்ற ஆன்டி ஆக்ஸிடன்ட்கள் உடலில் இன்சுலின் எதிர்ப்பை மேம்படுத்துகின்றன. எனவே, இது நீரிழிவு நோயாளிகளுக்கு ஏற்றது.

7. வயதாவதைத் தள்ளிப்போடுகிறது: உடலை இளமையாக வைத்திருப்பதில் கொலாஜன்கள் முக்கியப் பங்கு வகிக்கின்றன. கிரான்பெர்ரியில் உள்ள வைட்டமின் சி, கொலாஜன் உருவாவதை ஊக்குவிக்கிறது. சருமத்தை இளமையாகவும் சுருக்கங்கள் இன்றியும் வைத்திருக்கும். இதிலுள்ள ஆன்டி ஆக்ஸிடன்ட்கள் சருமத்தை முன்கூட்டியே வயதானதைத் தடுக்கிறது.

8. முடி உதிர்வை தடுக்கிறது: கிரான்பெர்ரியில் உள்ள வைட்டமின் ஏ மற்றும் சி முடி உதிர்தல் மற்றும் முடி தொடர்பான பிற பிரச்னைகளுக்கு சிகிச்சை அளிக்க உதவுகிறது. முடி வளர்ச்சியை ஊக்குவித்து, கூந்தலை பளபளப்பாகவும் ஆரோக்கியமாகவும் மாற்றுகிறது.

9. சிறந்த தூக்கத்திற்கு உதவுகிறது: கிரான்பெர்ரியில் மெலடோனின் அளவு மிக அதிகமாக உள்ளது. ‘தூக்க ஹார்மோன்’ என்றும் அழைக்கப்படும் மெலடோனின், நன்றாக தூங்க உதவுகிறது.

10. சிறுநீர் தொற்று அபாயத்தைக் குறைக்கிறது: தீங்கு விளைவிக்கும் பாக்டீரியா மற்றும் நுண்ணுயிரிகளை சிறுநீர்ப்பையின் சுவர்களில் ஒட்டிக்கொள்வதைத் தடுப்பதன் மூலம் சிறுநீர் பாதை நோய்த்தொற்றுகளைத் தடுக்க உதவுகிறது.