அடையாளம் தெரியாமல் மாறி போன எமி ஜாக்சன்.. ரசிகர்கள் அதிர்ச்சி!

மிலன் ஃபேஷன் வீக் நிகழ்ச்சியில் கலந்து கொண்ட நடிகை எமி ஜாக்சன் புகைப்படம் இணையத்தில் வைரலாகி வருகிறது.

இங்கிலாந்தைச் சேர்ந்த நடிகை எமி ஜாக்சன், மதராசபட்டினம் படம் மூலம் தமிழில் அறிமுகமானார். தொடர்ந்து ஷங்கரின் ஐ, தங்கமகன், தாண்டவம், கெத்து, தெறி, 2.0 உள்ளிட்ட படங்களில் நடித்தார். தெலுங்கு, இந்தி படங்களிலும் நடித்துள்ள அவர், தற்போது அருண் விஜய் நடிக்கும் 'மிஷன் அத்தியாயம் 1' படத்தில் நடித்து முடித்துள்ளார். இந்தப் படம் விரைவில் திரைக்கு வர இருக்கிறது.

ஒவ்வொரு ஆண்டும் இத்தாலியின் மிலன் நகரில் ‘மிலன் ஃபேஷன் வீக்’ என்ற நிகழ்வு நடந்து வருகிறது. இதில் உலகம் முழுவதும் உள்ள பல்வேறு திரை பிரபலங்கள், மாடல்கள், ஆடை வடிவமைப்பாளர்கள் பங்கேற்பது வழக்கம். இந்த ஆண்டு மிலன் ஃபேஷன் வீக் நிகழ்வில் நடிகை எமி ஜாக்சன் தனது காதலர் எட் வெஸ்ட்விக்குடன் கலந்து கொண்டுள்ளார்.

எமி ஜாக்சனின் புதிய தோற்றம் பலரையும் வியப்படைய செய்தது. ஆளே அடையாளம் தெரியாத அளவிற்கு அவரது தோற்றம் மாறியுள்ளது. அவரது இந்த புகைப்படங்களை பகிர்ந்த நெட்டிசன்கள் எமி ஜாக்சனின் தோற்றம் ஒப்பன்ஹெய்மர் படத்தில் வரும் சிலியன் மர்ஃபியின் தோற்றத்தை ஒத்திருப்பதாக பதிவிட்டு வருகின்றனர்.