ஏலியன் கற்களை அணிந்த பழங்கால அரசர்கள்... வரலாற்றை மாற்றும் புதிய கண்டுபிடிப்பு!

பூமியில் இரும்பு தாதுக்களை உருக்கி பயன்படுத்த மனிதர்கள் கற்றுக்கொள்வதற்கு முன்பாகவே பல ஆயிரம் ஆண்டுகளுக்கு முன்னால் வாழ்ந்த பலம் பொருந்திய மன்னர்கள் வானத்தில் இருந்து விழுந்த விண்கற்களை ஆபரணங்களாக அணிந்துள்ளனர் என்ற தகவல் தற்போது வெளியாகி உலகை ஆச்சரியத்தில் ஆழ்த்தியுள்ளது. இந்த அரிய வகையான ஆபரணங்கள் அவர்கள் மத்தியில் மிகப்பெரிய மதிப்பு வாய்ந்ததாக கருதப்பட்டுள்ளது.

வரலாறு! 

பண்டைய மத்திய தரைக்கடல் பகுதியை ஆண்ட மினோவான் (Minoan) மற்றும் மைசீனியன் (Mycenaean) நாகரீகத்தை சேர்ந்த அரசர்கள் இந்த விண்கல் இரும்பாலான மோதிரங்களை விரும்பி அணிந்துள்ளனர். பூமியின் சூரிய குடும்பத்திற்கு வெளியிலிருந்து பல ஆண்டுகளுக்கு முன்பு வந்து விழுந்த விண்கற்களில் இருந்து இந்த அரிய வகை இரும்பு பிரித்தெடுக்கப்பட்டுள்ளது. இதை அவர்கள் தங்களின் அதிகாரத்தின் மற்றும் செல்வத்தின் உச்சபட்ச குறியீடாக பல ஆண்டுகளாக பயன்படுத்தி வந்துள்ளார்கள்.

இந்த அரிய கண்டுபிடிப்பை உறுதி செய்ய அகழாய்வாளர்கள் வெண்கல மற்றும் இரும்பு காலத்தை சேர்ந்த சுமார் 91 பழமையான இரும்பு பொருட்களை X-ray Fluorescence என்ற அதிநவீன தொழில்நுட்பத்தை கொண்டு ஆழமாக பரிசோதித்தனர். அதில் கிட்டத்தட்ட 13 மோதிரங்களில் அதிக அளவிலான நிக்கல் தாது இருப்பது கண்டுபிடிக்கப்பட்டது. நிக்கல் என்பது விண்கற்களின் முக்கிய அடையாளமாக பார்க்கப்படுகிறது. இதன் மூலமே அவை அரிய விண்கல் இரும்பால் ஆனவை என்பது ஆணித்தரமாக நிரூபிக்கப்பட்டுள்ளது.

அரசர்களுக்கான கௌரவம்! 

இந்த அரிய உலோகத்தை பழங்கால மனிதர்கள் தங்களின் அன்றாட கருவிகளுக்கோ அல்லது சாதாரண போர் ஆயுதங்களுக்கோ ஒருபோதும் பயன்படுத்தவில்லை. மாறாக மன்னர்கள் மற்றும் அரச குடும்பத்தை சேர்ந்த உயர் பதவியில் இருப்பவர்களுக்கு மட்டுமே இது பிரத்தியேகமாக ஒதுக்கப்பட்டிருந்தது. 

பெரும்பாலும் இந்த விண்கல் மோதிரம் தங்கம் வெள்ளி மற்றும் வெண்கலம் போன்ற விலையுயர்ந்த உலோகங்களுடன் சேர்த்தே நேர்த்தியாக வடிவமைக்கப்பட்டுள்ளது. இது அவர்களின் சமூக அந்தஸ்தை மற்றவர்களுக்கு மிகவும் தெளிவாக உணர்த்தியது.

கிரீஸ் பகுதிகளில் பொதுவாக விண்கற்கள் விழுவது மிகவும் அரிது. எனவே பாலைவனங்கள் அதிகம் உள்ள எகிப்து போன்ற நாடுகளில் இருந்து இந்த விண்கல் தாதுக்கள் அன்றைய காலத்து வணிகர்கள் மூலமாக கொண்டுவரப்பட்டு இருக்கலாம் என வரலாற்று ஆய்வாளர்கள் உறுதியாக நம்புகின்றனர். 

மன்னர்களின் மரணத்திற்கு பிறகு அவர்களின் உடலோடு இந்த அரிய மோதிரங்களும் விலைமதிப்பற்ற பல பொருட்களுடன் சேர்த்து அவர்களின் பிரம்மாண்டமான கல்லறைகளில் பத்திரமாக அடக்கம் செய்யப்பட்டுள்ளன.

காலப்போக்கில் மனிதர்கள் பூமியில் கிடைக்கும் இரும்பை சுலபமாக உருக்கி பயன்படுத்த கற்றுக்கொண்டனர். இதன் விளைவாக கி.மு 1200 கால கட்டத்தில் இந்த விலையுயர்ந்த மோதிரங்களின் பயன்பாடு மெல்ல மெல்ல குறைய தொடங்கியது. இரும்பு சாதாரணமாக அனைவர் கைக்கும் கிடைக்கும் ஒரு பொருளாக மாறிய பிறகு இந்த அரிய விண்கல் மோதிரங்கள் கொஞ்சம் கொஞ்சமாக வழக்கொழிந்து போயின. 

ஆனால் வரலாற்றின் ஒரு சிறிய பகுதியில் மன்னர்கள் தங்களின் அதிகாரத்தை காட்ட வானத்தில் இருந்து விழுந்த அரிய கற்களை எப்படி பயன்படுத்தினார்கள் என்பது இன்றும் நம்மை பிரமிக்க வைக்கிறது.