நக்கிப் பார்த்தே டைனோசர் காலத்து உண்மையை சொல்லும் சூப்பர் டெக்னிக்!

நமது பூமி தோன்றி பல கோடி ஆண்டுகள் ஆகிவிட்டன என்பது அறிவியல் பூர்வமாக நிரூபிக்கப்பட்ட ஒரு உண்மை. இந்த நீண்ட நெடிய வரலாற்றுப் பயணத்தில் நாம் ஒருபோதும் நேரில் பார்த்திராத பிரம்மாண்டமான டைனோசர்கள் இந்த பூமியை முழுமையாக ஆட்சி செய்துள்ளன. கால மாற்றத்தால் அந்த அசுர உயிரினங்கள் மற்றும் ஏராளமான பழைமையான நாகரீகங்கள் முற்றிலுமாக அழிந்து போயின. 

ஆனால் அவை வாழ்ந்ததற்கான சுவடுகள் இன்றும் இந்த பூமியின் ஆழத்தில் எங்கோ ஒரு மூலையில் மறைந்து கிடக்கின்றன. அந்த சுவடுகளைக் கண்டுபிடிப்பது மனிதனுக்கு எப்போதுமே ஒரு மாபெரும் சாகசப் பயணமாகவே இருந்து வருகிறது.

மண்ணுக்குள் புதைந்த பொக்கிஷங்கள்! 

பல்லாயிரம் ஆண்டுகளுக்கு முன்பு வாழ்ந்து மடிந்த உயிரினங்களின் எலும்புகள், கால்தடங்கள் பாறை அடுக்குகளுக்கு இடையே பல 100 ஆண்டுகள் பத்திரமாகப் பாதுகாக்கப்படுகின்றன. தொல்பொருள் ஆய்வாளர்கள் பல்வேறு இடங்களில் பல மாதங்கள் அல்லது பல ஆண்டுகள் முகாமிட்டு மிக நுணுக்கமான அகழாய்வுப் பணிகளைத் தொடர்ந்து மேற்கொள்கிறார்கள். 

அந்தப் பணிகளின் போது சாதாரண கற்களைப் போலவே தோற்றமளிக்கும் பல அபூர்வமான பொருட்களை அவர்கள் கவனமாக மண்ணிலிருந்து தோண்டி எடுப்பார்கள். பார்வைக்கு அவை வெறும் கரடுமுரடான கல் போல மட்டுமே தெரிந்தாலும், அவற்றை ஆழமாக ஆராயும்போது பல புதிய உண்மைகள் வெளிவரும்.

சுவைத்துப் பார்க்கும் விநோத முறை! 

அகழாய்வு செய்யும் இடங்களில் தோண்டி எடுக்கப்படும் அனைத்துக் கற்களும் வரலாற்றுச் சிறப்பு மிக்கவை என்று நாம் கண்மூடித்தனமாக நம்பிவிட முடியாது. இங்குதான் தொல்லியல் ஆய்வாளர்கள் பலரும் அறியாத ஒரு மிகவும் விசித்திரமான மற்றும் சுவாரஸ்யமான உத்தியை மிகச் சாதாரணமாகக் கையாளுகிறார்கள். 

அகழாய்வில் கிடைக்கும் சந்தேகம் தரும் பொருட்களை அவர்கள் தங்கள் நாக்கினால் நேரடியாக நக்கிப் பார்ப்பார்கள். இதைக் கேட்கும்போது நமக்குச் சற்று அருவருப்பாகவும் அதிர்ச்சியாகவும் இருந்தாலும், இது பல ஆண்டுகளாக நிபுணர்களால் தொடர்ந்து பயன்படுத்தப்படும் ஒரு நம்பகமான களப் பரிசோதனை முறையாகும்.

அவர்கள் கண்டுபிடித்த அந்தப் பொருள் உண்மையிலேயே ஒரு சாதாரணக் கல்லாக இருந்தால், நாக்கு அதன் மேல் எந்தவிதத் தடையுமின்றி எளிதாக வழுக்கிக்கொண்டு சென்றுவிடும். ஆனால் அது நிஜமாகவே பழங்கால படிமங்கள் ஆக இருந்தால், அவற்றின் மேற்பரப்பில் இருக்கும் கண்ணுக்குத் தெரியாத நுண்துளைகள் நாக்கில் உள்ள ஈரப்பதத்தை அல்லது எச்சிலை உடனடியாக உறிஞ்சிக் கொள்ளும். 

அந்த வினாடியில் நாக்கு அந்தப் பொருளோடே லேசாக ஒட்டிக்கொள்வது போன்ற ஒரு வித்தியாசமான உணர்வு ஏற்படும். இதை வைத்து நிபுணர்கள் தங்களுக்குக் கிடைத்தது ஒரு சாதாரண பாறை அல்ல என்பதை மிக எளிதாக உறுதி செய்துகொள்வார்கள்.

பணத்தை மிச்சப்படுத்துகிறார்கள்!

ஒவ்வொரு முறை அகழாய்வு செய்யும்போதும் ஆயிரக்கணக்கான கற்கள் மற்றும் துகள்கள் சேகரிக்கப்படுகின்றன. அவை அனைத்தையும் ஆய்வகங்களுக்கு அனுப்பி நவீன கருவிகள் மூலம் பரிசோதனை செய்வது என்பது பல 1000 டாலர்கள் செலவாகும் மிக விலையுயர்ந்த செயலாகும். ஆய்வகச் செலவுகளையும் தேவையற்ற கால விரயத்தையும் குறைப்பதற்காகவே இந்த நாக்குப் பரிசோதனை களத்திலேயே உடனடியாகச் செய்து பார்க்கப்படுகிறது. 

தேவையற்ற வெறும் கற்களைச் சுமந்து செல்வதைத் தவிர்க்க இந்த முறை பெரிதும் உதவுகிறது. இப்படிப்பட்ட எளிய உத்திகள் மூலம் கண்டறியப்பட்ட பல பழங்கால படிமங்கள் தான் மனித குல வரலாற்றில் பல முக்கியத் திருப்புமுனைகளை ஏற்படுத்தியுள்ளன.

பிரம்மாண்டமான அதிநவீன அறிவியல் சாதனங்கள், செயற்கை நுண்ணறிவுத் தொழில்நுட்பங்கள் உலகை ஆக்கிரமித்துள்ள காலகட்டத்தில் நாம் இப்போது வாழ்ந்து கொண்டிருக்கிறோம். ஆனாலும், பல கோடி ஆண்டுகளுக்கு முந்தைய மர்மங்களைத் தீர்க்க மனிதனின் மிக அடிப்படையான ஐம்புலன்களில் ஒன்றான சுவை உணர்வு இன்றும் வெற்றிகரமாகப் பயன்படுத்தப்படுகிறது.