உலகை ஆட்டிப்படைக்கும் கச்சா எண்ணெய்… வறுமையில் இருந்தவரை ஒரே நாளில் கோடீஸ்வரனாக்கிய சுவாரஸ்ய கதை!

நமது அன்றாட வாழ்க்கையில் பெட்ரோல் மற்றும் டீசல் இல்லை என்றால் ஒரு நாள் கூட வாகனங்கள் ஓடாது என்பது நமக்கு நன்றாகவே தெரியும். ஆனால் இந்த கச்சா எண்ணெய் ஆரம்பத்தில் எப்படி கண்டுபிடிக்கப்பட்டது? அது ஒட்டுமொத்த உலகப் பொருளாதாரத்தையும் எப்படி தன் கைக்குள்ளேயே வைத்துள்ளது? என்பதைத் தெரிந்துகொண்டால் நீங்கள் கட்டாயம் ஆச்சரியப்படுவீர்கள். 

பல நூறு ஆண்டுகளுக்கு முன்பு விளக்குகளை எரிய வைக்க திமிங்கிலங்களின் கொழுப்பு தான் பெருமளவில் பயன்படுத்தப்பட்டு வந்தது. அந்த பரிதாபகரமான நிலை மாறி பூமிக்கு அடியில் இருந்து ஒரு கறுப்பு வைரம் வெளியாகி உலகையே ஆளத் தொடங்கிய சுவாரஸ்யமான கதையைத் தெரிந்து கொள்ளலாம் வாங்க.

எதிர்பாராத கண்டுபிடிப்பு!

பத்தொன்பதாம் நூற்றாண்டின் மத்தியில் அமெரிக்காவின் பென்சில்வேனியா பகுதியில் எட்வின் டிரேக் என்பவர் பாறை எண்ணெயை தேடும் அகழ்வாராய்ச்சி பணியில் தீவிரமாக ஈடுபட்டிருந்தார். தொடர் தோல்விகள் மற்றும் கடன் தொல்லையால் அவரை அந்தப் பணியை விட்டுவிட்டு சொந்த ஊருக்கு திரும்பி வருமாறு அழுத்தம் கொடுக்கப்பட்டது. சரியாக அந்த நேரத்தில் எதிர்பாராத விதமாக பல அடி ஆழத்தில் இருந்து ஒரு பிரம்மாண்ட நீரூற்று போல அந்த பாறை எண்ணெய் பீறிட்டு அடித்தது. 

இந்த ஒற்றை நிகழ்வு உலக வரலாற்றையே முற்றிலுமாக புரட்டிப் போட்டது எனலாம். இந்த பிரம்மாண்ட கண்டுபிடிப்பைத் தொடர்ந்து அங்குள்ள பிட்ஹோல் என்ற சிறிய கிராமத்தில் ஒரே வருடத்தில் பத்தாயிரத்திற்கும் மேற்பட்ட மக்கள் குடியேறினார்கள். பல கேளிக்கை விடுதிகள் மற்றும் தங்கும் விடுதிகள் அங்கு முளைத்தன. ஆனால் நிலையான மாற்றுத் தொழில்கள் ஏதும் இல்லாததால் அந்த நகரம் மிக விரைவிலேயே தன் பொலிவை இழந்து அதலபாதாளத்திற்குச் சென்றது.

உலகை ஆளும் அசுர சக்தி!

இன்று நமது ஒட்டுமொத்த உலகின் ஆற்றல் தேவையில் மூன்றில் ஒரு பங்கை இந்த பெட்ரோலியம் தான் பூர்த்தி செய்கிறது. நிலக்கரி, அணுசக்தியை விட இதன் பயன்பாடு மிக மிக அதிகம். சாதாரண பிளாஸ்டிக் பொருட்கள் தயாரிப்பதில் இருந்து பிரம்மாண்டமான சரக்கு கப்பல்களை இயக்குவது வரை அனைத்திற்கும் இதுவே ஆணிவேராக இருக்கிறது. 

கடந்த நூற்றாண்டில் பிரிட்டன் கடற்படை தளபதியான வின்ஸ்டன் சர்ச்சில் தனது போர்க்கப்பல்களுக்கு நிலக்கரிக்கு பதிலாக பெட்ரோலியத்தை பயன்படுத்த ஒரு அதிரடி முடிவு எடுத்தார். அது கப்பல்களின் வேகத்தை பல மடங்கு அதிகரித்ததுடன் உலக நாடுகளின் புவிசார் அரசியல் நகர்வுகளையும் ஒட்டுமொத்தமாக மாற்றியமைத்தது. ஒரு கிலோ பெட்ரோல் கொடுக்கும் ஆற்றலை நாம் பெறுவதற்கு சுமார் அறுபது கிலோ எடையுள்ள பேட்டரிகளைப் பயன்படுத்த வேண்டும் என்பதே கச்சா எண்ணெயின் அபார சக்திக்கு ஒரு மிகச்சிறந்த எடுத்துக்காட்டு.

பொருளாதார வீழ்ச்சி!

எண்ணெய் வளம் கொண்ட சில நாடுகள் மிகக் குறுகிய காலத்திலேயே பெரும் பணக்கார நாடுகளாக மாறின. சௌதி அரேபியா போன்ற நாடுகள் தங்களது எண்ணெய் நிறுவனங்கள் மூலமாக உலகின் மிகப்பெரிய கார்ப்பரேட் நிறுவனங்களை விட அதிக சொத்துக்களை சேர்த்தன. ஆனால் வெனிசுவேலா மற்றும் நைஜீரியா போன்ற பல நாடுகளுக்கு இது ஒரு மிகப்பெரிய சாபமாகவே மாறியது. 

கச்சா எண்ணெய் ஏற்றுமதியால் கிடைக்கும் அதீத பணப்புழக்கம் அந்த நாடுகளில் உள்ள மற்ற உள்நாட்டுத் தொழில்களை கடுமையாக நசுக்கியது. இதனால் தான் வெனிசுவேலாவின் முன்னாள் பெட்ரோலிய அமைச்சர் ஒருவர் இந்த கச்சா எண்ணெயை ‘சாத்தானின் மலம்’ என்று கடுமையாக விமர்சித்தார்.

பெட்ரோலியத்தின் விலையில் ஒரு சிறிய மாற்றம் ஏற்பட்டால் கூட அது உலக பொருளாதாரத்தையே ஆட்டம் காண வைத்துவிடும். கடந்த காலங்களில் அரபு நாடுகள் சில தடைகளை விதித்தபோது விலை கிடுகிடுவென உயர்ந்தது. இதனால் அமெரிக்கா உள்ளிட்ட பல வல்லரசு நாடுகளே பெரும் பொருளாதார மந்தநிலையை சந்தித்தன. இன்று காலநிலை மாற்றம் மற்றும் மாற்று எரிசக்தி குறித்த விழிப்புணர்வு உலகெங்கும் பரவி வந்தாலும், பெட்ரோலியத்தின் தேவை குறையவே இல்லை. 

ஹைட்ராலிக் ஃபிராக்கிங் (Hydraulic Fracking) எனப்படும் பாறைகளை உடைத்து எண்ணெயை எடுக்கும் அதிநவீன தொழில்நுட்பம் இப்போது சக்கைப்போடு போடுகிறது. என்னதான் பேட்டரியில் இயங்கும் எலக்ட்ரிக் வாகனங்கள் சந்தைக்கு வந்தாலும், இன்னும் பல பத்தாண்டுகளுக்கு இந்த சாத்தானின் மலத்தில் தான் மனித குலம் நீந்திக்கொண்டிருக்கும் என்பது மட்டும் மறுக்க முடியாத நிதர்சனமான உண்மை.