ஒரு தவறு, ஒரு வரலாறு: சாக்லேட் சிப் கதை!

நம் அனைவருக்குமே சாக்லேட் சிப்ஸ் உள்ள குக்கீஸை சாப்பிவதற்கு மிகவும் பிடிக்கும். அந்த குக்கீசில் உள்ள சாக்லேட் சிப் நாம் சாப்பிடும் போது வாயில் கரைவது அலாதியான சுவையை தரும். ஆனால், இந்த சாக்லேட் குக்கீஸை (Chocolate chip cookies) கண்டுப்பிடித்ததே ஒரு தற்செயலான விஷயம் என்று சொன்னால் நம்பமுடிகிறதா? அதைப் பற்றி விரிவாக இந்தப் பதிவில் காண்போம்.

1930 ல் Ruth Graves Wakefield என்ற பெண் Toll House Inn என்ற ஹோட்டல் நடத்திக் கொண்டிருந்தார். இந்தக் கட்டடம் ஒரு காலத்தில் பயணிகள் சுங்கக் கட்டணம் செலுத்தும் இடமாக இருந்ததால், அதற்கு 'டோல் ஹவுஸ் இன்' (Toll House Inn) என்று பெயரிட்டார். ரூத் செய்யும் இனிப்பு வகைகள் அந்தப் பகுதியில் மிகவும் பிரபலமடைந்தன.

ரூத் வழக்கமாக தனது வாடிக்கையாளர்களுக்கு Butter Drop Do என்ற வகைக் குக்கீயை செய்து கொடுப்பார். அதில் சாக்லேட்டை உருக்கிச் சேர்ப்பது வழக்கம். ஒருநாள், அவர் மாவு (Dough) தயாரிக்கும்போது, சமையல் சாக்லேட் (Baker's Chocolate) தீர்ந்துவிட்டது.

"அது இல்லை என்றால் என்ன? நம்மிடம் தான் Nestle chocolate இருக்கிறதே!" என்று நினைத்த Ruth, அதை பொடியாக வெட்டி மாவுடன் சேர்த்து கலக்குகிறார். அந்த சாக்லேட் உருகி மாவுடன் கலந்துவிடும் என்று அவர் எதிர்பார்த்ததற்கு மாறாக, சாக்லேட் துண்டுகள் உருகாமல், சுடப்பட்ட குக்கீக்குள் மென்மையாகவும் அப்படியே சாக்லேட் சிப்பாக மாறிவிட்டது. அந்த குக்கீஸை எடுத்து சாப்பிடும் போது வித்தியாசமாக நன்றாக இருந்திருக்கிறது.

அதை சாப்பிட்டு பார்க்க சொல்லி வாடிக்கையாளர்களுக்கு கொடுக்க அவர்களுக்கும் அதன் சுவை மிகவும் பிடித்துவிட்டது. இது ஒரு பெரிய செய்தியாகவே மாறுகிறது. இந்த புதிய குக்கீ Toll House Chocolate Crunch Cookie என்று அழைக்கப்பட்டது. பத்திரிக்கையில் கூட இதைப்பற்றி போடப்படுகிறது. இதனால் Nestle வின் வியாபாரம் அதிகரிக்கிறது.

இதனால் Nestle கம்பெனி இவர்களிடம் வந்து ஒப்பந்தம் போட்டிருக்கிறார்கள். "நாங்கள் உங்களுக்கு வாழ்க்கை முழுவதும் இலவசமாக சாக்லேட் தருகிறோம். அதற்கு பதில் உங்கள் ரெசிபியை மட்டும் எங்களுடைய கவரில் பிரிண்ட் செய்துக் கொள்கிறோம்!" என்று கேட்டிருக்கிறார்கள். 1939 ல் Nestle புது பிராடக்டை கொண்டு வருகிறார்கள். சாக்லேட்டை வாங்கி வெட்டி கஷ்டப்பட தேவையில்லை. நாங்களே தருகிறோம் என்று சொல்லி Nestle semi sweet morsels என்று பெயர் வைத்தார்கள். இவைதான் இன்று நாம் பயன்படுத்தும் சாக்லேட் சிப்கள்.