மாநிற அழகை மிளிர வைக்கும் 5 ராயல் வண்ணங்கள்: புடவை தேர்வில் தவிர்க்க வேண்டியவை என்ன?

தென்னிந்தியப் பெண்களின் இயல்பான அழகுக்கு மேலும் அழகு சேர்ப்பது அவர்களின் மாநிறம் தான். ஆனால், பல பெண்கள் ‘இந்த வண்ணம் நமக்குச் சரியாக இருக்குமா? இந்த வண்ணப் புடவை நம்மை இன்னும் கருப்பாகக் காட்டுமா?’ என்ற சந்தேகத்துடனேயே புடவைகளைத் தேர்வு செய்கிறார்கள். உண்மையில் மாநிறப் பெண்களுக்குத்தான் பெரும்பாலான வண்ணங்களும் பாரம்பரியப் புடவைகளும் அழகையும் கம்பீரத்தையும் தருகின்றன.

மாநிறத்திற்கு உயிர் கொடுக்கும் ராயல் வண்ணங்கள்:

பொதுவாகப் புடவைகளைத் தேர்ந்தெடுக்கும்போது நிறத்தேர்வில் சில எளிய அடிப்படை விஷயங்களைப் புரிந்துகொண்டால் போதும். உடுத்தும் ஒவ்வொரு புடவையும் உங்களைத் தனித்துக்காட்டும்.

அடர் நீலம் மற்றும் அடர் பச்சை: அடர் நீலம் மற்றும் அடர் பச்சை வண்ணங்கள் மாநிறச் சருமத்திற்கு ஒரு தனித்துவமான கம்பீரத்தைக் கொடுக்கும். இந்த வகையான வண்ணங்களில் புடவைகளை அணியும்போது சருமத்தின் நிறத்தோடு ஒன்றிப் போகாமல் அதை எடுப்பாகக் காட்டும்.

மெரூன் மற்றும் ஒயின் சிவப்பு: மெரூன் மற்றும் ஒயின் சிவப்பு போன்ற வண்ணங்கள் மாநிறப் பெண்களுக்கு மிகவும் அழகாகவும் பொருத்தமாகவும் இருக்கும். அடர் சிவப்பு நிறப் புடவையை விட இது போன்ற வண்ணங்கள் அதிக அழகைத்தரும்.

கடுகு மஞ்சள் மற்றும் தங்க நிறம்: பிரகாசமான எலுமிச்சை மஞ்சள் நிறப் புடவைகளைத் தேர்வு செய்யக் கூடாது. கடுகு மஞ்சள் மற்றும் தங்க நிறம் கலந்த சாயலில் புடவைகளை உடுக்கும் போது, மாநிறப் பெண்களின் சருமத்திற்கு ஒளிரும் தன்மையைத் தரும்.

மண் சார்ந்த வண்ணங்கள்: மண் வண்ணம் என்று சொல்லப்படும் செம்பு நிறம், டெரகோட்டா நிறம் மற்றும் இளம் ஆரஞ்சு நிறம் போன்ற மென்மை நிறங்கள் மாநிறப் பெண்களுக்கு மிகவும் அட்டகாசமாக இருக்கும்.

தவிர்க்க வேண்டிய வண்ணங்கள்:

சில வகையான வண்ணங்கள் மாநிறப் பெண்களின் இயல்பான அழகைக் குறைத்துக் காட்டக்கூடும்:

அதிகப் பிரகாசமான நிறங்கள்: பிரகாசமான பச்சை மற்றும் அடர் ஆரஞ்சு போன்ற அதிகப்படியான பிரகாசமான வண்ணங்களைத் தவிர்ப்பது நல்லது. இவை ஆடம்பரமாகத் தோற்றமளித்து, முகத்தின் பொலிவை மங்கச் செய்துவிடும்.

வெளிறிய மங்கிய நிறங்கள்: இந்த நிறங்களைத் தேர்வு செய்யக் கூடாது. அது சருமத்திற்குச் சோர்வான தோற்றத்தைத் தரும். மங்கிய நிறங்கள் வேண்டும் என்றால் சற்று அடர்ந்த சாயல்களைத் தேர்வு செய்யலாம்.

ஒவ்வாத வண்ணங்கள்: வெளிறிய இளஞ்சிவப்பு, வெளுத்துப் போன புதினா பச்சை நிறம், வெளிறிய லாவெண்டர் நிறம், வெளுத்துப்போன சாம்பல் கலந்த ஊதா நிறம் மற்றும் லேசான நீல நிறம் போன்றவை மாநிறப் பெண்களுக்கு முழுமையான அழகைக் கொடுக்காது.

நெசவு மற்றும் துணி தேர்வு

காஞ்சிபுரம் பட்டு: காஞ்சிபுரம் பட்டுப் புடவைகளின் அடர் வண்ணங்களும் தங்கச் சரிகை வேலைப்பாடுகளும் மாநிறத்தை மிக உயர்வாகக் காட்டும். அகலமான பாரம்பரியக் காஞ்சிபுரம் பட்டுப் புடவைகளின் பார்டர் மாநிறப் பெண்களின் கம்பீரத்தை அதிகரிக்கும்.

மெல்லிய ரகப் புடவைகள்: மெல்லிய உடைகளைத் தேர்வு செய்யும்போது ஆர்கன்சா வகை புடவைகளைத் தேர்வு செய்யலாம். ஆனால், அது முற்றிலும் வெளிறிய நிறமாக இல்லாமல், பூ வேலைப்பாடுகள் அடர்த்தியான நிறத்தில் இருக்குமாறு பார்த்துக்கொள்ள வேண்டும்.

செம்புச் சரிகை: தற்போதைய ட்ரெண்டிங்கில் இருக்கும் செம்புச் சரிகை வேலைப்பாடு கொண்ட பட்டுப் புடவைகள் மாநிறப் பெண்களுக்கு மிகவும் பொருத்தமாக இருக்கும்.

பிளவுஸ்/ஆபரணங்கள்

கான்ட்ராஸ்ட் பிளவுஸ்: புடவையின் நிறத்திற்கு நேர் எதிரான பிளவுஸ்களை அணியலாம். அடர் பச்சை புடவைக்கு மெரூன் பிளவுஸ், அடர் நீலப் புடவைக்கு கடுகு மஞ்சள் பிளவுஸ் போன்றவற்றைத் தேர்வு செய்யுங்கள்.

ஆபரணங்கள்: பழைமை மாறாத தங்க நகைகள் மற்றும் சுடுமண் ஆபரணங்கள் மாநிறப் பெண்களுக்குப் பிரமாதமாகப் பொருந்தும். வெள்ளி ஆபரணங்கள் அணியும்போது, புடவையின் நிறமும் அதற்கு ஏற்ப அமைய வேண்டும். எந்தப் புடவையை உடுத்தினாலும், அதை முழு தன்னம்பிக்கையுடனும் புன்னகையுடனும் உடுத்தும்போது, மாநிற அழகு இன்னும் பேரழகாக மிளிரும்.

மாநிறப் பெண்கள் தங்களின் இயல்பான அழகை எடுப்பாகக் காட்ட எந்தெந்த வண்ணப் புடவைகளைத் தேர்ந்தெடுக்க வேண்டும், எவற்றைத் தவிர்க்க வேண்டும் என்ற தெளிவான புரிதலைப் பெறுவார்கள்.