பெர்ஃப்யூம் பயன்படுத்தும்போது நம்மில் 90% பேர் செய்யும் பொதுவான தவறுகள் இவைதான்!

வாசனை திரவியங்கள் (Perfumes) என்பது வெறும் நறுமணத்திற்காக மட்டுமல்ல, அது நமது குணத்தை வெளிப்படுத்தும் ஒரு கருவியாகவும், தன்னம்பிக்கையை அதிகரிக்கும் ஒரு வழியாகவும் மாறிவிட்டது. காலையில் நாம் பயன்படுத்தும் இந்த நறுமணம், நாள் முழுவதும் நம்முடன் பயணித்து, புத்துணர்ச்சியை அளிக்கிறது. 

ஆனால், விலை உயர்ந்த வாசனை திரவியங்களை வாங்கும் நம்மில் பலர், அதைச் சரியான முறையில் பயன்படுத்துகிறோமா என்றால், பெரும்பாலும் இல்லை என்பதே உண்மை. வாசனை திரவியங்களைப் பயன்படுத்தும்போது நாம் செய்யும் சிறு தவறுகள், அதன் ஆயுளைக் குறைப்பதோடு, நமது சருமத்திற்கும் பாதிப்புகளை ஏற்படுத்தக்கூடும்.

தேய்க்காதீர்கள், தெளித்து விடுங்கள்:

நம்மில் பலர் செய்யும் ஒரு பொதுவான தவறு, பெர்ஃப்யூமை மணிக்கட்டில் அடித்தவுடன், இரண்டு மணிக்கட்டுகளையும் ஒன்றாக வைத்துத் தேய்ப்பது. இப்படிச் செய்வதால், நறுமணம் நன்றாகப் பரவும் என்று நாம் தவறாக நினைக்கிறோம். உண்மையில், இந்த உராய்வினால் உருவாகும் வெப்பம், வாசனை திரவியத்தின் நுட்பமான மூலக்கூறுகளைச் சிதைத்து, அதன் நறுமணத்தை மாற்றி, அது நீண்ட நேரம் நீடிப்பதையும் தடுத்துவிடுகிறது. எனவே, எப்போதும் பெர்ஃப்யூமைத் தெளித்த பிறகு, அதைத் தேய்க்காமல், தானாகக் காற்றில் உலர விடுவதே சிறந்தது.

சரியான இடம்: வாசனை திரவியத்தை உடலெங்கும் தெளிப்பது நல்ல பலனைத் தராது. அதை ‘நாடித்துடிப்புப் புள்ளிகளில்’ (Pulse Points) பயன்படுத்துவதே அறிவியல்பூர்வமாகச் சரியானது. காதுகளுக்குப் பின்புறம், கழுத்தின் இரு பக்கங்கள், மணிக்கட்டுகள், முழங்கையின் உட்புறம் மற்றும் முழங்கால்களுக்குப் பின்புறம் போன்ற இடங்களில், ரத்த நாளங்கள் சருமத்திற்கு மிக அருகில் இருப்பதால், அப்பகுதிகளில் உடல் வெப்பம் சற்று அதிகமாக இருக்கும். இந்த வெப்பம், நாள் முழுவதும் வாசனை திரவியத்தை மெதுவாக ஆவியாக்கி, நறுமணம் சீராகப் பரவ உதவுகிறது. 

வாசனை திரவியங்களில் ஆல்கஹால் இருப்பதால், சென்சிடிவ் சருமம் உள்ளவர்களுக்கு இது வறட்சி, தடிப்பு மற்றும் அரிப்பு போன்ற ஒவ்வாமைகளை ஏற்படுத்தக்கூடும். எனவே, ஒரு புதிய வாசனை திரவியத்தை வாங்கியவுடன், அதை நேரடியாகப் பயன்படுத்துவதற்கு முன், தோலின் ஒரு சிறிய பகுதியில் ‘பேட்ச் டெஸ்ட்’ செய்து பார்ப்பது அவசியம். எந்தப் பிரச்சனையும் இல்லை என்றால் மட்டுமே அதைத் தொடர்ந்து பயன்படுத்த வேண்டும். 

நறுமணத்தைப் பாதுகாத்தல்: உங்கள் விலை உயர்ந்த வாசனை திரவியத்தின் ஆயுளைத் தீர்மானிப்பதில், நீங்கள் அதைச் சேமித்து வைக்கும் இடத்திற்கு முக்கியப் பங்குண்டு. வெப்பம், ஈரப்பதம் மற்றும் நேரடி சூரிய ஒளி ஆகியவை வாசனை திரவியத்தின் முதல் எதிரிகள். இவை, அதன் ரசாயனக் கட்டமைப்பை மாற்றி, நறுமணத்தையும், நிறத்தையும் மாற்றிவிடும். 

எனவே, குளியலறை போன்ற ஈரப்பதம் மிகுந்த இடங்களில் வைப்பதைத் தவிர்த்து, அலமாரி, மேசை போன்ற குளிர்ச்சியான, இருளான இடங்களில் வைப்பதே ஆயுளை நீட்டிக்கும். பொதுவாக, வாங்கிய நாளிலிருந்து மூன்று ஆண்டுகளுக்குள் வாசனை திரவியத்தைப் பயன்படுத்திவிடுவது நல்லது.