டைனோசர் காலத்துல வாழ்ந்த 1 சென்டிமீட்டர் மர்ம விலங்கு... கோபி பாலைவனத்தில் கிடைத்த பகீர் ஆதாரம்!

டைனோசர்கள் போன்ற ராட்சத விலங்குகள் வாழ்ந்த அதே காலகட்டத்தில், நமது விரல் நகத்தின் அளவே உள்ள ஒரு மிகச் சிறிய பாலூட்டி இனமும் வாழ்ந்திருக்கிறது.  மங்கோலியாவில் உள்ள கோபி பாலைவனத்தில் அகழ்வாராய்ச்சி செய்யும் விஞ்ஞானிகளுக்கு சமீபத்தில் ஒரு அபூர்வமான பொக்கிஷம் கிடைத்துள்ளது. 

வெறும் 1 சென்டிமீட்டர் மட்டுமே நீளமுள்ள ஒரு விசித்திரமான விலங்கின் முழுமையான எலும்புக்கூடு தான் அது. டைனோசர் காலத்தைச் சேர்ந்த இந்த குட்டி எப்படி இத்தனை கோடி வருடங்களாக அழியாமல் பாதுகாக்கப்பட்டது மற்றும் இதை விஞ்ஞானிகள் எப்படி ஆராய்கிறார்கள் என்பதைப் பற்றி தெரிந்துகொள்ளலாம் வாங்க.

குட்டி உயிரினத்தின் பின்னணி!

அமெரிக்க இயற்கை வரலாற்று அருங்காட்சியகத்தைச் சேர்ந்த ஆராய்ச்சியாளர்கள் உக்கா டோல்கோட் எனப்படும் கோபி பாலைவனப் பகுதியில் இந்த அரிய வகை கண்டுபிடிப்பை நிகழ்த்தியுள்ளனர். பொதுவாக பல கோடி வருடங்களுக்கு முன்பு வாழ்ந்த சிறிய விலங்குகளின் பற்கள் மட்டுமே பாசில்களாக நமக்குக் கிடைக்கும். அவற்றின் எலும்புகள் மிக மிக மென்மையானவை என்பதால், இயற்கையின் சீற்றங்களில் அவை எளிதாக அழிந்துபோகும். 

ஆனால், தற்போது கிடைத்துள்ள இந்த எலும்புக்கூடு கொஞ்சமும் சிதையாமல் முழுமையாக இருப்பது தான் ஆராய்ச்சியாளர்களை பிரம்மிக்க வைத்துள்ளது. சுண்டெலி போல தோற்றமளிக்கும் இந்த உயிரினம், வெலாசிராப்டர் போன்ற ஆபத்தான டைனோசர்கள் வாழ்ந்த காலத்தில் வாழ்ந்த ஒரு பழமையான பூச்சியுண்ணி என்று வகைப்படுத்தப்பட்டுள்ளது.

இயற்கையின் அதிசயம்!

இவ்வளவு மென்மையான ஒரு எலும்புக்கூடு சுமார் பத்து கோடி வருடங்களாக எப்படி கொஞ்சம் கூட அழியாமல் அப்படியே இருக்கிறது என்பது ஒரு மாபெரும் அறிவியல் விந்தையாகும். இதற்கு மிக முக்கிய காரணம், அந்த காலத்தில் அந்தப் பகுதியில் ஏற்பட்ட கடுமையான வறட்சி மற்றும் மணல் புயல்கள் தான்.

பலத்த காற்றுடன் வீசிய மணல் புயலில் சிக்கிய இந்த சின்னஞ்சிறு விலங்கு, மிக மென்மையான உலர்ந்த மணலுக்குள் நொடிப்பொழுதில் உயிருடன் புதைக்கப்பட்டுள்ளது. காற்றில் உள்ள ஈரப்பதம் முற்றிலுமாக குறைந்துபோனதால், இதன் உடல் அழுகிப் போகாமலும், மழை நீரில் அடித்துச் செல்லப்படாமலும் அப்படியே ஒரு இயற்கையான டைம் கேப்சூல் போல மணலுக்குள் பாதுகாப்பாக உறைந்து போயுள்ளது.

டெக்னாலஜி!

ஒரு சென்டிமீட்டர் மட்டுமே உள்ள இந்த சின்னஞ்சிறு எலும்புக்கூட்டை சாதாரண சுத்தியல் மற்றும் உளி வைத்து சுத்தம் செய்வது என்பது நினைத்துக்கூட பார்க்க முடியாத ஒரு காரியம். சிறு உளி பட்டால் கூட மொத்த எலும்பும் சுக்குநூறாக உடைந்துவிடும். இதனால், விஞ்ஞானிகள் High Resolution Micro-CT Scanning என்ற அதிநவீன தொழில்நுட்பத்தை இதற்காகப் பயன்படுத்துகிறார்கள். இதன் மூலம் பாறைகளை உடைக்காமலேயே, உள்ளே இருக்கும் எலும்புக்கூட்டின் 3D டிஜிட்டல் காப்பியை மிகத் துல்லியமாக உருவாக்கிவிடுகிறார்கள். 

இந்த குட்டி விலங்கின் பற்கள் மற்றும் உள் காதுகளின் அமைப்பை கூட இந்த டிஜிட்டல் மாடல் மூலம் உலகத்தில் உள்ள எந்த மூலையில் இருந்தும் விஞ்ஞானிகளால் எளிதாக ஆராய முடியும். தண்ணீர் இல்லாத கடுமையான வறட்சியை இந்த விலங்குகள் எப்படிச் சமாளித்தன என்ற பல ரகசியங்களை இந்த ஸ்கேனிங் முறை நமக்குத் தெளிவாகக் காட்டுகிறது.

இந்த ஒரு சென்டிமீட்டர் உயிரினம் கடந்த காலத்தின் கொடூரமான தட்பவெப்ப நிலை மற்றும் வறட்சியை எதிர்கொண்டு உயிரினங்கள் எப்படித் தங்களை மாற்றிக்கொண்டன என்பதை இது தெளிவாக காட்டுகிறது.