தேன் கூட்டில் நடக்கும் ரகசிய அரசியல்... ராணி தேனீ எப்படி உருவாகிறது என்ற மிரள வைக்கும் உண்மை!

தேனீக்களின் வாழ்க்கை முறை மனிதர்களுக்கே பாடம் சொல்லித்தரும் அளவுக்கு மிகச்சிறந்த ஒரு கட்டமைப்பாகும். ஒரு தேன் கூட்டில் ஆயிரக்கணக்கான தேனீக்கள் இருந்தாலும், அவை அனைத்தையும் கட்டளை இட்டு வழிநடத்துவது ஒரே ஒரு ராணி தேனீ மட்டும்தான். 

அந்த ராணி தேனீ இறந்துவிட்டாலோ அல்லது வயதாகிவிட்டாலோ, அடுத்த தலைவியை அவை எப்படி தேர்ந்தெடுக்கின்றன என்பது பலருக்கும் ஆச்சரியம் தரும் ஒரு விஷயமாகும். தேன் கூட்டில் நடக்கும் இந்த சுவாரஸ்யமான சிம்மாசனப் போர் பற்றி தெரிந்து கொள்ளலாம் வாங்க.

தேர்தல் இல்லாத அரசியல்!

பழைய ராணி தேனீ கூட்டிலிருந்து வெளியேறினாலோ அல்லது இறந்துவிட்டாலோ ஒட்டுமொத்த கூட்டத்திற்கும் உடனடியாக ஒரு புதிய தலைவி தேவைப்படும். மனிதர்களைப் போல அங்கு எந்த ஒரு தேர்தலோ அல்லது ஓட்டுப்பதிவோ நடப்பதில்லை. வேலைக்கார தேனீக்கள் உடனடியாகக் களத்தில் இறங்கி, கூட்டின் எதிர்காலத்தைக் காப்பாற்ற ஒரு எமர்ஜென்சி திட்டத்தை ஆரம்பிக்கும். 

புதிதாக முட்டையிலிருந்து வெளிவந்த மூன்று நாட்களே ஆன சில ஆரோக்கியமான லார்வாக்களை அவை கவனமாகத் தேர்வு செய்யும். இதற்காக பிரத்யேகமாக சற்று பெரிய அளவிலான வேர்க்கடலை வடிவ அறைகளை அவை கட்டத் தொடங்கும்.

ராஜ கூழ்!

தேர்ந்தெடுக்கப்பட்ட அந்த குறிப்பிட்ட சில லார்வாக்களுக்கு மட்டுமே ராயல் ஜெல்லி எனப்படும் ராஜ கூழ் என்ற சிறப்பு உணவு தொடர்ந்து வழங்கப்படும். கூட்டிலுள்ள அனைத்து குஞ்சுகளுக்கும் முதல் மூன்று நாட்களுக்கு மட்டுமே இந்த உணவு கிடைக்கும், அதன் பிறகு சாதாரண தேன் மற்றும் மகரந்தம் தான் கொடுக்கப்படும். 

ஆனால் வருங்கால ராணியாகத் தேர்ந்தெடுக்கப்பட்ட குஞ்சுகளுக்கு  அவை வளர்ந்து வெளிவருவது வரை இந்த ராஜ கூழ் தாராளமாகக் கிடைக்கும். இந்த அதிசய உணவில் உள்ள சத்துக்களால், அந்த சாதாரண லார்வா ஒரு முழுமையான இனப்பெருக்கத் திறன் கொண்ட பிரம்மாண்டமான ராணி தேனீயாக உருமாறுகிறது.

உயிரைப் பறிக்கும் சிம்மாசனப் போர்!

ஒரு கூட்டிற்கு ஒரே ஒரு ராணி மட்டுமே இருக்க முடியும் என்பதால் இங்குதான் மிகப்பெரிய ட்விஸ்ட் நடக்கும். ராஜ கூழ் சாப்பிட்டு வளரும் குஞ்சுகளில் எது முதலில் முழுமையாக வளர்ந்து கூட்டை விட்டு வெளியே வருகிறதோ, அதுதான் அந்த கூட்டின் அடுத்த ராணி. வெளியே வந்த அந்த முதல் தேனீ செய்யும் முதல் வேலை, இன்னும் அறைகளுக்குள் வளர்ந்து கொண்டிருக்கும் தனது சக சகோதரிகளான மற்ற ராணி தேனீக்களை இரக்கமே இல்லாமல் கொன்று விடுவதுதான்.

எந்தவித போட்டியாளர்களும் இல்லை என்பதை உறுதி செய்த பிறகு, அது தனது அரியணையில் கம்பீரமாக அமர்ந்து ஒட்டுமொத்த கூட்டத்தையும் தன் கட்டுப்பாட்டிற்குள் கொண்டு வந்துவிடும்.

பார்க்க சிறியதாக இருக்கும் தேனீக்களுக்குள் இப்படி ஒரு பிரம்மாண்டமான அரசியல் நடக்கிறது என்பதை நினைக்கும்போதே ஆச்சரியமாக இருக்கிறது. தங்களது இனம் அழிந்துவிடக் கூடாது என்பதற்காக இயற்கையே அவற்றுக்கு சொல்லிக்கொடுத்த ஒரு அட்டகாசமான சர்வைவல் ட்ரிக் இது. ராணி இல்லாமல் ஒரு தேன் கூட்டுக்கு எந்த எதிர்காலமும் இல்லை என்பதை அவை மிகத் தெளிவாகப் புரிந்து வைத்துள்ளன.