மழைநீரை மட்டுமே குடித்து உயிர் வாழும் பறவை: ஆச்சரியம்; ஆனால், உண்மை!

நமக்கு மழைக்காலம் என்றால் என்ன ஞாபகம் வரும்? ஜன்னலுக்கு வெளியே பெய்யும் மழை, சூடான காபி... ஆனால், மழை வரப்போகிறது என ஒரு பறவை நமக்கு சிக்னல் கொடுக்கும். அது மயில்தான் என்று நீங்கள் நினைக்கலாம். அதுதான் கிடையாது. கருப்பு மற்றும் வெள்ளைப் புள்ளிகளுடன், தலையில் ஒரு சிறிய கொண்டையோடு இருக்கும் ஜாகோபின் குயில் (Jacobin cuckoo) பறவைதான் அது.

இந்தப் பறவைப் பார்ப்பதற்கு மிகவும் வசீகரமானது. இந்தக் குயில், சாதகப் பறவை அல்லது சுடலைக் குயில் என்றும் அழைக்கப்படுகிறது.

தலையில் கொண்டையுடன் இருக்கும் இந்தப் பறவை, வானத்திலிருந்து விழும் மழைநீரை மட்டும்தான் குடிக்குமாம். வேற எந்த நீர்நிலையிலும் தண்ணீர் குடிக்கவே குடிக்காதாம். மழையை எதிர்பார்த்து, மேகத்தை நோக்கி வாயைத் திறந்து காத்திருக்குமாம்.

சமஸ்கிருத மொழியில் சாதகம் என்று அழைக்கப்படும் இந்தப் பறவை, பழைமையான இந்திய இலக்கியங்கள் மற்றும் கவிதைகளில் முக்கிய இடம் பெற்றுள்ளது.

கவிஞர் காளிதாசரின் 'மேகதூதம்' என்ற காவியத்தில், சாதகப் பறவையை ஒரு ஆழ்ந்த ஏக்கத்தின் குறியீடாகப் பயன்படுத்தியுள்ளார். இந்தப் பறவை, மழை நீருக்காக ஆவலுடன் காத்திருப்பது போல, காதலனும் தனது காதலிக்காக ஏங்குவதாகக் கூறியிருப்பார்.

ஜாகோபின் குயில், ஆப்பிரிக்கா மற்றும் ஆசியாவில் காணப்படும் ஒரு பறவை இனம். ஆப்பிரிக்காவில் இருந்து ஆயிரக்கணக்கான கிலோமீட்டர்கள் பறந்து இந்தியாவிற்கு வலசை (Migrate) வருகிறது.

முதுமலை வனப்பகுதியிலும், தென்னிந்தியாவின் மற்ற காடுகளிலும் இந்தப் பறவையைக் காணலாம். பறக்கும்போது அதன் இறகுகளின் மேல் உள்ள வெள்ளை புள்ளிகள் தெளிவாகத் தெரியும்.

குயில்கள் கூடு கட்டுவதில்லை. அவற்றின் முட்டைகளை வேறு பறவைகளின் கூட்டில் இட்டு, குஞ்சு பொரித்துவிடும். ஜாகோபின் குயில்களும் அப்படித்தான். பெரும்பாலும் அழகுப் புறாக்கள் (babblers) அல்லது காட்டுப் பூநாரைகள் (jungle babblers) போன்ற பறவைகளின் கூட்டில், தங்களுடைய முட்டைகளை இடும்.

சில நேரங்களில், இதன் முட்டையின் நிறம் கூட கூட்டில் உள்ள முட்டைக்கு ஏற்றாற்போல் நிறம் மாறுமாம். குயில் குஞ்சுகள், பொரித்த சில நாட்களில், கூட்டில் உள்ள மற்ற முட்டைகளை வெளியே தள்ளிவிடும். ஆனால் ஜாகோபின் குஞ்சுகள் மற்ற முட்டைகளைத் தள்ளுவதில்லை.

இந்தப் பறவையின் மற்றொரு சுவாரசியமான விஷயம் என்னவென்றால், அது பெரும்பாலும் மயிர்க்கால்கள் கொண்ட கம்பளிப்புழுக்களை விரும்பி உண்ணும். இந்த கம்பளிப்புழுக்களைப் பிடித்து, அதன் குடல்களை வெளியேற்றிவிட்டு, பின்னர் முழுவதையும் விழுங்குமாம்.