காதலியை கவர ஸ்பைடர்மேன் உடையில் சுற்றும் விசித்திர பல்லி… இணையத்தை அதிரவைக்கும் ஆச்சரியம் இதோ!

நமது பூமியில் மனிதர்களை தாண்டி எண்ணற்ற அற்புதங்கள் இன்றும் மறைந்து கிடக்கின்றன. காடுகளில் வாழும் விலங்குகளை பற்றி நாம் படிக்கும் போதெல்லாம் புதுப்புது விஷயங்கள் நமக்கு தெரியவரும். அந்த வகையில் ஹாலிவுட் சினிமாக்களை மிஞ்சும் அளவுக்கு இயற்கையிலேயே ஒரு சூப்பர் ஹீரோ விலங்கு வாழ்கிறது என்பதை கேட்டால் பலரும் ஆச்சரியப்படுவார்கள்.

சிறியவர்கள் முதல் பெரியவர்கள் வரை அனைவருக்கும் மிகவும் பிடித்த ஒரு சூப்பர் ஹீரோ கதாபாத்திரம் என்றால் அது ஸ்பைடர்மேன் தான். அந்த ஸ்பைடர்மேன் அணிந்திருக்கும் நீலம் மற்றும் சிவப்பு நிற ஆடையை உடுத்திக்கொண்டு ஒரு விசித்திரமான பல்லி காடுகளில் உலா வருகிறது. 

ஸ்பைடர்மேன் தோற்றம்!

இந்த விலங்கின் அதிகாரப்பூர்வமான அறிவியல் பெயர் முவான்சா பிளாட் ஹெட் அகாமா (Mwanza Flat-Headed Agama). பார்ப்பதற்கு அச்சு அசலாக அப்படியே மார்வெல் ஹீரோ போலவே காட்சியளிப்பதால், இணையவாசிகள் பலரும் இதை செல்லமாக ஸ்பைடர்மேன் பல்லி என்றுதான் அழைக்கிறார்கள். இதன் தலை மற்றும் தோள்பட்டை பகுதி மிகவும் அடர்த்தியான பிரகாசமான சிவப்பு நிறத்திலும், உடலின் கீழ்ப்பகுதி ஆழமான நீல நிறத்திலும் அமைந்திருக்கும். 

யாரோ ஒரு ஓவியர் மிகவும் பொறுமையாக அமர்ந்து இந்த பல்லியின் மீது பெயிண்ட் அடித்தது போல அவ்வளவு நேர்த்தியாக இதன் நிறங்கள் காட்சியளிக்கும். இது பாறைகளில் தாவி தாவி செல்வதை பார்க்கும் போது, உண்மையான ஸ்பைடர்மேன் ஸ்டண்ட் செய்வது போலவே நமக்கு தோன்றும்.

வாழும் இடங்கள்!

இந்த அழகிய உயிரினங்கள் நமது ஊர்களில் சாதாரணமாக காணப்படுவது இல்லை. இவை பெரும்பாலும் கிழக்கு ஆப்பிரிக்க நாடுகளான கென்யா, தான்சானியா மற்றும் ருவாண்டா போன்ற பகுதிகளில் உள்ள வறண்ட காடுகளிலும் பாறை குன்றுகளிலும் அதிக அளவில் வசிக்கின்றன. 

மிகவும் வெப்பமான சூழலை விரும்பும் இவை, பகல் நேரங்களில் பெரிய பாறைகளின் மீது வெயிலில் காய்ந்தபடி ஓய்வெடுப்பதை வழக்கமாக கொண்டுள்ளன. மனிதர்களோ அல்லது எதிரிகளோ கண்ணில் பட்டால் உடனடியாக மிக வேகமாக ஓடி பாறை இடுக்குகளில் பதுங்கிக் கொள்ளும் அளவுக்கு இவை சுறுசுறுப்பானவை.

வண்ணங்களுக்குப் பின்னால் இருக்கும் ரகசியம்!

இந்த பளபளப்பான ஆடம்பர நிறங்கள் ஆண் பல்லிகளுக்கு மட்டுமே சொந்தமானது. அதுவும் குறிப்பாக இனப்பெருக்க காலங்களில் மட்டுமே ஆண் பல்லிகளின் உடல் இப்படி ஒரு அதிரடியான நிற மாற்றத்தை சந்திக்கிறது. தன் துணையை தேடும் பெண் பல்லிகளை எளிதாக ஈர்ப்பதற்காகவும், தன்னுடைய அழகை காட்டுவதற்காகவும் இந்த ஆண் பல்லிகள் இப்படி கலர்ஃபுல்லாக மாறுகின்றன. 

அது மட்டுமில்லாமல், மற்ற ஆண் பல்லிகள் தனது எல்லைக்குள் வராமல் மிரட்டி வைப்பதற்கும் இந்த நிறம் ஒரு சிறந்த ஆயுதமாக அவற்றுக்கு பயன்படுகிறது. எந்த பல்லிக்கு நிறம் மிக அடர்த்தியாக இருக்கிறதோ அதுதான் அந்த கூட்டத்திலேயே மிக வலிமையான பல்லியாக மற்றவற்றால் கருதப்படும்.

மனிதர்களாகிய நாம் பல கோடிகளை செலவு செய்து கம்ப்யூட்டர் கிராபிக்ஸ் மூலமாக சூப்பர் ஹீரோக்களை திரையில் உருவாக்கி ரசித்து வருகிறோம். ஆனால் இயற்கை எந்த ஒரு தொழில்நுட்பமும் இல்லாமல் தனது படைப்பிலேயே இப்படி ஒரு கியூட்டான அதிசயத்தை சாதாரணமாக செய்து காட்டியுள்ளது.