சுவையான பீர்க்கங்காய் சாம்பாரும், ஆரோக்கியமான துவையலும்!

பீர்க்கங்காய் சாம்பார்

தேவை:

பீர்க்கங்காய் – 1 கப் (தோல் உரித்து, வட்டமாக நறுக்கவும்)

துவரம்பருப்பு – ½ கப்

சின்ன வெங்காயம் – 8-10

தக்காளி – 1 (நறுக்கியது)

சாம்பார்பொடி – 2 டீஸ்பூன்

புளி – ஒரு பெரிய நெல்லிக்காய் அளவு

மஞ்சள்தூள் – ¼ டீஸ்பூன்

உப்பு – தேவைக்கு

தாளிக்க:

எண்ணெய் – 2 டீஸ்பூன்

கடுகு – 1 டீஸ்பூன்

உளுத்தம்பருப்பு – ½ டீஸ்பூன்

கறிவேப்பிலை – ஒரு கையளவு

மிளகாய் – 1 அல்லது 2

மல்லிதழை – அலங்கரிக்க

செய்முறை: துவரம் பருப்பை தண்ணீருடன் குக்கரில் 3 விசில் வரும் வரை வேக வைக்கவும். பருப்பு நன்றாக வெந்து மென்மையாக இருக்க வேண்டும். ஒரு பாத்திரத்தில் பீர்க்கங்காய், மஞ்சள்தூள், தண்ணீர் சேர்த்து சிறு தீயில் வேக வைக்கவும்.  புளியை ஒரு கப் வெந்நீரில் கரைத்து வடிகட்டி கொள்ளவும்.

வேக வைத்த பருப்பு, பீர்க்கங்காய் மற்றும் புளித் தண்ணீர், சாம்பார்பொடி, உப்பு சேர்த்து நன்றாகக் கலக்கவும். இதை மிதமான தீயில் 5-7 நிமிடங்கள் கொதிக்க விடவும். ஒரு சிறு வாணலியில் எண்ணெய் சூடேற்றி கடுகு, உளுத்தம் பருப்பு, மிளகாய், கறிவேப்பிலை சேர்த்து தாளித்து சாம்பாரில் சேர்த்து கிளறவும். பின்னர் கொத்தமல்லித் தழையை நறுக்கி மேலே சேர்க்கவும். பீர்க்கங்காய் சாம்பாரை சூடாக சாதத்துடன் பரிமாறலாம்.

பீர்க்கங்காய் துவையல் தேவை:

பீர்க்கங்காய் – 1 மூடி (தோலுடன் துண்டுகளாக நறுக்கவும்)

பச்சைமிளகாய்  – 2

புளி – ஒரு சிறிய நெல்லிக்காய் அளவு

துவரம்பருப்பு – 1 ஸ்பூன்

உளுத்தம்பருப்பு – 1 ஸ்பூன்

காய்ந்த மிளகாய் – 1

தேங்காய்துருவல் – 2  ஸ்பூன்

உப்பு – தேவைக்கு

எண்ணெய் – 2 டீஸ்பூன்

வெந்தயம் – ஒரு சிட்டிகை

தாளிக்க: கடுகு, கறிவேப்பிலை

செய்முறை:

வாணலியில் 1 டீஸ்பூன் எண்ணெய் சூடாக்கி, துவரம்பருப்பு, உளுத்தம்பருப்பு, வெந்தயம், காய்ந்த மிளகாய் சேர்த்து பொன்னிறமாக வறுத்து தனியாக வைத்துக் கொள்ளவும். அதே வாணலியில் பீர்க்கங்காயை வறுத்து வதங்கியப் பிறகு தனியாக எடுத்துக் கொள்ளவும். புளி, தேங்காய், மிளகாய், உப்பு  சேர்த்து ஒட்டுமொத்தமாக வறுத்துப் பருப்புகளுடன் ஒன்றாக குளிர வைக்கவும். பின்னர் மிக்சியில் வறுத்த பொருட்கள் அனைத்தையும் சேர்த்து, தேவையான அளவு தண்ணீர் சேர்த்து சீராக அரைத்து துவையல் தயார் செய்யவும்.

ஒரு சிறிய வாணலியில் 1 டீஸ்பூன் எண்ணெயில் கடுகு, கறிவேப்பிலை சேர்த்து தாளித்து துவையலுடன் கலந்து விடவும். பீர்க்கங்காய் துவையலை சாதத்துடன் நெய் சேர்த்து பிசைந்து சாப்பிட சுவையாக இருக்கும்.