கற்றாழையில் இப்படி ஒரு சுவையா? ஆச்சரியப்படுத்தும் 4 ரெசிபிகள்!

கற்றாழை பர்பி

தேவை:

தோல் நீக்கி அலசப்பட்ட கற்றாழை ஜெல் - 4 ஸ்பூன்

பசும் பால் - 1 லிட்டர்

சர்க்கரை - 5 ஸ்பூன்

நெய் - 3 ஸ்பூன்

பாலில் இருந்து புதிதாக தயாரிக்கப்பட்ட கிரீம் - 4 ஸ்பூன்

ஏலக்காய் - 4

பாதாம், பிஸ்தா (பொடித்தது) - 2 ஸ்பூன்.

செய்முறை:

சர்க்கரையை பாகு காய்ச்சி கொள்ளவும். மற்றொரு அடி கனமான பாத்திரத்தில் 1 லிட்டர் பாலை அரை லிட்டர் ஆகும் வரை மிதமாக தீயில் காய்ச்சி கொள்ளுங்கள். அதனுடன் கற்றாழையை போட்டு 10 நிமிடங்கள் கிளறவும். இது கீரிம் பதத்திற்கு வரும் வரை கிளறி பாலில் இருந்து புதிதாக தயாரிக்கப்பட்ட கிரீம் சேர்க்க வேண்டும்.

அதனுடன் சர்க்கரை பாகை சேர்த்து கொள்ளுங்கள். அகன்ற பாத்திரத்தில் நெய் 1 ஸ்பூன் ஊற்றி பாத்திரம் முழுவதும் தடவி அந்த கலவையை அதில் கொட்டவும். பின் ஆற வைத்து விருப்பமான வடிவங்களில் வெட்டி நெய்யை சமமாக ஊற்றி பொடிக்கப்பட்ட பிஸ்தா மற்றும் பாதாமமை சேர்த்தால் சுவையான கற்றாழை பர்பி தயார்.

கற்றாழை மோர்

தேவை:

புளிக்காத தயிர் – அரை கப்,

கற்றாழை – 4 சிறு துண்டுகள்,

இஞ்சி – சிறு துண்டு,

பெருங்காயத் தூள் – சிறிதளவு,

கொத்தமல்லித் தழை – தேவையான அளவு,

உப்பு – தேவையான அளவு.

செய்முறை:

கொத்தமல்லியை பொடியாக நறுக்கி கொள்ள வேண்டும். கற்றாழையின் தோல் பகுதியை நீக்கி விட்டு சதை பகுதியை மட்டும் எடுத்து நீரில் பத்து முறை நன்கு கழுவ வேண்டும். இல்லையென்றால் கசக்கும். மிக்ஸியில் இஞ்சித்துண்டை போட்டு அரைத்த பின்னர் கற்றாழைத்துண்டுகளை சேர்த்து நன்கு அரைத்துக்கொள்ள வேண்டும்.

பின்னர் அதில் தயிர், பெருங்காய தூள், தேவையான அளவு உப்பும் சேர்த்து அரைத்து பின்னர் இரண்டு டம்ளர் நீர் சேர்த்து ஒரு சுற்று சுற்றி நிறுத்தவும். இதனை டம்ளரில் ஊற்றி அதில் கொத்துமல்லித்தழை போட, கம கமக்கும் கற்றாழை மோர் தயார்.

கற்றாழை பால்கறி

தேவை:

கடுகு, உளுந்து - 1 டீஸ்பூன்

கறிவேப்பிலை, கொத்தமல்லித்தழை - சிறிய கொத்து

நல்லெண்ணெய் - 2 டீஸ்பூன்

கற்றாழை - 2 மடல்

சின்ன வெங்காயம் = 10 பீஸ்

தக்காளி - 1

தேங்காய்ப் பால் - 4 ஸ்பூன்

மஞ்சள் தூள் - சிறிதளவு

உப்பு - தேவையான அளவு

வறுத்துப் பொடி செய்ய:

காய்ந்த மிளகாய் - 6

சோம்பு - 1ஸ்பூன்

தனியா - 1/4 ஸ்பூன்

கடலைப் பருப்பு - 1/4 ஸ்பூன்

வறுத்த வேர்க்கடலை - 2 ஸ்பூன்

செய்முறை:

கற்றாழையைத் தோல் சீவி, சதைப்பகுதியைத் தனியே எடுத்து, சிறு சிறு துண்டுகளாக்குங்கள். அவற்றைத் தண்ணீரில் நன்றாக அலசுங்கள். வாணலியில் எண்ணெய் விட்டு கடுகு, உளுந்து தாளித்து சின்ன வெங்காயம், கறிவேப்பிலை சேர்த்து வதக்குங்கள்.

பிறகு தக்காளி சேர்த்து வதக்கி, பொடியாக செய்து வைத்துள்ள பொடி, மஞ்சள் தூள் கற்றாழைத் துண்டுகளைச் சேர்த்து வதக்குங்கள். தேவையான அளவு தண்ணீர், உப்பு சேர்த்து பச்சை வாசனை போகும்வரை கொதிக்கவையுங்கள். எல்லாம் ஒன்றாகச் சேர்ந்து வந்ததும் தேங்காய்ப் பால் ஊற்றி இறக்கி வையுங்கள். இறுதியில் மல்லித்தழை தூவிப் பரிமாறுங்கள். சுடச்சுட கற்றாழை பால்கறி தயார்.

கற்றாழை பருப்புப் பாயாசம்

தேவை:

பாசிப்பருப்பு - 1 கப்

துருவிய வெல்லம் - 2 கப்

காய்ச்சிய பால் - 2 கப்

கற்றாழை - 2 (தோல் சீவி நறுக்கியது)

முந்திரி - 10

பாதாம் - 10

ஏலக்காய்ப் பொடி - 2 சிட்டிகை

நெய் - 3 டீஸ்பூன்

செய்முறை:

முதலில் கற்றாழையைத் தோல் சீவி நன்றாக அலசி, பொடியாக நறுக்கி வைத்துக்கொள்ள வேண்டும். பின் பாதாம், முந்திரியை நெய்யில் வறுத்துக்கொள்ளவும். பின்னர் பாசிப்பருப்பை ஒரு வெறும் வாணலியில் போட்டு வறுத்து, பின் குக்கரில் குழைய வேகவைத்து மசித்துக்கொள்ளவும். அதனுடன் காய்ச்சிய பாலைச் சேர்த்து கொதிக்கவிட வேண்டும்.

பிறகு அதனுடன் துருவிய வெல்லத்தைச் சேர்த்து, வெல்லம் கரைந்ததும் கற்றாழையைச் சேர்த்து சிறிது நேரம் கொதிக்கவிட வேண்டும். பின் பாதாம், ஏலக்காய்ப் பொடி, முந்திரி சேர்த்து இறக்கினால், சுவையான கற்றாழை பருப்புப் பாயாசம் தயார்.