![samayal tips](http://media.assettype.com/kalkionline%2F2024-07%2F1254108b-6e33-4e60-81dc-70c95cbfd507%2Fcooking%20.jpg?w=480&auto=format%2Ccompress&fit=max)
புடவைகளுக்கு அழகு சேர்ப்பது அதன் பாடர்தான். அதேபோல் சமையல் செய்யும்போது சின்னச் சின்ன டிப்ஸ்தான் சமையலையே ருசிகரமாக்குகிறது. அதை தெரிந்து வைத்துக் கொண்டால் சமைப்பதற்கு நீண்ட நேரம் பிடிக்காது .சட்டென்று சமையலை முடித்துவிட்டு வெளியில் வந்து விடலாம். அதற்கான டிப்ஸ் இதோ:
* இனிப்புகள் செய்த பின் மீதமாகும் சர்க்கரைப்பாகில் இஞ்சியை அரைத்து பாகில் கலந்து கிளறி சாப்பிட வயிறு இதமாகும் .இது ஒரு ரெடிமேட் இஞ்சி மொறப்பாவாக பணிபுரியும்.
* பொரி உருண்டை மற்றும் வேர்க்கடலை உருண்டை செய்யும்போது வெல்லப்பாகில் சிறிது இஞ்சிச்சாறு சேர்த்துக் கொண்டால் சுவை பிரமாதமாக இருக்கும்.
* ஜவ்வரிசி பாயாசம் செய்வதற்கு முன் ஜவ்வரிசியை லேசாக வறுத்து அதில் வெந்நீரை ஊற்றி அரை மணி நேரம் அப்படியே வைக்கவும். பிறகு பாயசம் செய்தால் சீக்கிரம் வந்துவிடும்.
* முளைகட்டிய பச்சைப் பயிறு முளைத்த வெந்தயம் ஆகியவற்றுடன் ஊற வைத்த புழுங்கல் அரிசி சேர்த்து அரைத்து தோசை வார்த்தால் சூப்பர் டேஸ்ட்டுடன் உடலுக்கு ஆரோக்கியமான தோசை கிடைக்கும்.
* தண்ணீர் நன்றாக கொதி வந்தவுடன் காய்கறிகளைப் போட்டால் சீக்கிரமே வெந்துவிடும்.
* முட்டைக்கோஸ் பொரியல் செய்யும் பொழுது வேகவைத்த பச்சை பட்டாணியை சேர்த்தால் ருசி அசத்தும்.
* திணை பொங்கல் செய்யும் பொழுது ஒரு கைப்பிடி வேர்க்கடலையை வறுத்து சேர்த்து பொங்கல் செய்தால் ருஸி அட்டகாசமாக இருக்கும்.
* முட்டைக்கோஸ், கேரட், பீன்ஸ், கருவேப்பிலை, தனியா, பச்சை மிளகாய் இவைகளை பொடியாக நறுக்கி ஜவ்வரிசி மாவில் சேர்த்து வடை செய்தால் ருசி அட்டகாசமாக இருக்கும்.
* கடலைப்பருப்பில் வடை செய்யும்போது சோம்பு ,வர மிளகாயை அதனுடன் சேர்த்து அரைத்து பொடியாக நறுக்கிய முட்டைக்கோஸ், கேரட், மல்லித்தழை, கருவேப்பிலை இவைகளை சேர்த்து வடை தட்டினால் ருசியில் அசத்தும். சாப்பிடுபவர்கள் அதிகம் கேட்பார்கள்.
* கருணைக்கிழங்கை வேகவைத்து துண்டுகளாக்கி அதனுடன் வெண்ணெய், கடலை மாவு, அரிசி மாவு, உப்பு காரம் சேர்த்து நன்றாக பிசறி வறுத்தெடுத்தால் நன்றாக ருசிக்கும். நாக்கையும் அரிக்காது.
* வெறும் துவரம் பருப்பு மாத்திரம் சேர்த்து செய்யும் சாம்பாருக்கு மசாலாக்களை வறுத்து இடித்து செய்தால் சாம்பாரின் வாசமும் ருசியும் பிரமாதமாய் இருக்கும்.
* அதிகமானோருக்கு சாம்பார் வைக்கும்பொழுது துவரம் பருப்புடன் பயத்தம்பருப்பையும் சேர்த்து செய்ய சாம்பார் கெட்டியாயிருக்கும். சிறிதளவு மசாலாக்களை வறுத்து அரைத்து சேர்த்தால் ருசி அசத்தலாக இருக்கும்.
* கீரை காய்கறிகளை பொடியாக நறுக்கி இட்லி, தோசை, சப்பாத்தி, அடை, புட்டு மாவுகளுடன் கலந்து செய்தால் ருசியும் அதிகரிக்கும். கலர்ஃபுல்லாக இருக்கும். சத்தும் கிடைக்கும். நொறுக்குத் தீனி சாப்பிட வேண்டும் என்றும் தோன்றாது.
* கோதுமையை வறுத்து மெஷினில் கொடுத்து அரைத்து வைத்தால் நீண்ட நாட்கள் கெடாமல் இருக்கும். புழு பூச்சிகள் வராது.