வேலைக்கு போறவங்களுக்கு 'ஜாக்பாட்'! சட்டுனு முடியுற இந்த சோயா உணவுகள்... இனி ஹோட்டல் சாப்பாடு எதுக்கு?

இன்றைய வேகமான வாழ்க்கை முறையில், குறைந்த நேரத்தில் சத்தான உணவுகளை தயார் செய்வது அவசியமாகியுள்ளது. அத்தகைய சூழலில், சோயா சங்க் (Soya Chunks) என்பது எளிதில் கிடைக்கும், குறைந்த செலவில் அதிக புரதம் வழங்கும் ஒரு சிறந்த உணவுப் பொருளாகும். குறிப்பாக சைவ உணவாளர்களுக்கு இது இறைச்சிக்கான நல்ல மாற்றாகவும் விளங்குகிறது.

சோயா சங்க்களில் புரதம், இரும்புச்சத்து, நார்ச்சத்து போன்றவை அதிக அளவில் உள்ளதால், குழந்தைகள் முதல் முதியவர்கள் வரை அனைவருக்கும் ஏற்ற உணவாக இருக்கிறது. மேலும், இதனைப் பயன்படுத்தி பொரியல், குழம்பு, புலாவ், ஸ்நாக்ஸ் போன்ற பல்வேறு வகையான சுவையான உணவுகளை மிக எளிதாக வீட்டிலேயே தயாரிக்க முடியும்.

1.சோயா சங்க் பொரியல்

தேவையான பொருட்கள்

• சோயா சங்க் – 1 கப்

• வெங்காயம் – 1 (நறுக்கியது)

• பச்சை மிளகாய் – 1–2

• மஞ்சள் தூள் – ¼ தேக்கரண்டி

• மிளகாய் தூள் – ½ தேக்கரண்டி

• உப்பு – தேவைக்கு

• எண்ணெய் – 2 மேசைக்கரண்டி

• கடுகு, உளுத்தம்பருப்பு – தாளிக்க

செய்முறை: சோயா சங்க்களை உப்பு சேர்த்த கொதிக்கும் நீரில் 5 நிமிடம் வேக வைத்து, பிழிந்து வைக்கவும். கடாயில் எண்ணெய் ஊற்றி கடுகு, உளுத்தம்பருப்பு தாளிக்கவும். வெங்காயம், பச்சை மிளகாய் சேர்த்து வதக்கவும். மஞ்சள், மிளகாய் தூள், உப்பு சேர்த்து கிளறவும். சோயா சங்க் சேர்த்து 5–7 நிமிடம் நன்றாக வதக்கினால்  பொரியல் தயார். சாதம், தயிர் சாதத்துடன் அருமை.

2. சோயா சங்க் கிரேவி 

தேவையான பொருட்கள்

• சோயா சங்க் – 1 கப்

• வெங்காயம் – 2

• தக்காளி – 2

• இஞ்சி-பூண்டு பேஸ்ட் – 1 தேக்கரண்டி

• சாம்பார் / குழம்பு மசாலா – 1½ தேக்கரண்டி

• மிளகாய் தூள் – ½ தேக்கரண்டி

• எண்ணெய், உப்பு – தேவைக்கு

செய்முறை:  சோயா சங்க்களை வேக வைத்து பிழிந்து வைக்கவும். வெங்காயம், தக்காளியை அரைத்து பேஸ்ட் செய்யவும். கடாயில் எண்ணெய் ஊற்றி இஞ்சி-பூண்டு வதக்கவும். அரைத்த பேஸ்ட், மசாலா, உப்பு சேர்த்து நன்றாக கொதிக்க விடவும். சோயா சங்க் சேர்த்து 10 நிமிடம் வேக விடவும். சப்பாத்தி, இட்லி, தோசைக்கு சிறந்த கிரேவி.

3. சோயா சங்க் புலாவ்

தேவையான பொருட்கள்

பாஸ்மதி அரிசி – 1 கப்

சோயா சங்க் – ½ கப்

வெங்காயம் – 1

பட்டை, கிராம்பு, ஏலக்காய் – சிறிது

புலாவ் மசாலா – 1 தேக்கரண்டி

எண்ணெய் / நெய் – 1 மேசைக்கரண்டி

செய்முறை: சோயா சங்க் வேக வைத்து வைக்கவும்.  குக்கரில் எண்ணெய், நெய் சேர்த்து பட்டை, கிராம்பு தாளிக்கவும். வெங்காயம் வதக்கி சோயா சங்க் சேர்க்கவும். அரிசி, மசாலா, உப்பு, 2 கப் தண்ணீர் சேர்த்து 1 விசில் வைக்கவும். ரைதாவுடன் சுவையான மதிய உணவு.

சோயா சங்க் என்பது குறைந்த செலவில் அதிக புரதம் தரும் உணவு. மேலே கூறிய ரெசிபிகள் அனைத்தும் எளிதில், குறைந்த நேரத்தில் செய்யக்கூடியவை. தினசரி உணவில் சேர்த்தால் உடல் வலிமையும் ஆரோக்கியமும் அதிகரிக்கும்.