கார்பைடு கல் வேண்டாம்... பழ வியாபாரிகளே ஆச்சரியப்படும் இயற்கையாக மாம்பழம் பழுக்க வைக்கும் ஐடியாக்கள் இதோ!

கோடைகால சீசனில் மாம்பழங்களை சாப்பிடாமல் இருந்தால் சம்மர் முழுமையடையாது. ஆனால் கடைகளில் விற்கும் பழங்களை வாங்க பலருக்கும் ஒரு சின்ன பயம் கட்டாயம் இருக்கும். காரணம், கார்பைடு கல் போன்ற ஆபத்தான ரசாயனங்களை வைத்து வியாபாரிகள் மிக அவசரமாக மாங்காய்களை பழுக்க வைக்கிறார்கள். 

இதை அப்படியே சாப்பிட்டால் வயிற்று வலி, அலர்ஜி என பல உடல்நலப் பிரச்சனைகள் தேடி வரும். இதற்கு ஒரு சூப்பரான மாற்று வழி இருக்கிறது. நாம் கடையில் இருந்து பச்சை மாங்காய்களை அப்படியே வாங்கி வந்து, நமது வீட்டிலேயே எளிதாகவும் இயற்கையாகவும் பழுக்க வைக்கலாம். அப்படி கெமிக்கல் இல்லாமல் மாம்பழங்களை தித்திக்கும் சுவையில் பழுக்க வைக்கும் 5 அருமையான ஐடியாக்களை இந்தப் பதிவில் பார்க்கலாம்.

1. அரிசி பானைக்குள் வைப்பது!

நமது பாட்டிகள் காலத்தில் இருந்தே பயன்படுத்தப்படும் ஒரு சூப்பர் ட்ரிக் இது. உங்கள் வீட்டின் சமையலறையில் இருக்கும் பெரிய அரிசி டப்பா அல்லது பானைக்குள் மாங்காய்களை உள்ளே நன்றாக புதைத்து வைத்து மூடி விடுங்கள். அரிசியில் இருந்து வெளிப்படும் இயற்கையான வெப்பம் மற்றும் எத்திலீன் வாயு மாங்காயின் மீது பட்டு அதை மென்மையாக மாற்றும். வெறும் இரண்டே நாட்களில் மாங்காய் நன்றாக கணிந்து சூப்பர் சுவைக்கு மாறிவிடும்.

2. பழுத்த வாழைப்பழங்கள்!

பச்சை மாங்காய்களை சீக்கிரமாக பழுக்க வைக்க உங்கள் வீட்டில் இருக்கும் பழுத்த வாழைப்பழங்கள் அருமையாக உதவி செய்யும். ஒரு மூடியுள்ள டப்பாவில் மாங்காய்களை அடுக்கி வைத்துவிட்டு, அதோடு ஓரிரண்டு பழுத்த வாழைப்பழங்களை சேர்த்து மூடி வையுங்கள். பழுத்த வாழைப்பழத்தில் இருந்து எத்திலீன் என்ற வாயு இயற்கையாகவே அதிகமாக வெளியாகும். இது பக்கத்தில் இருக்கும் மாங்காய்களையும் வேகமாக பழுக்க வைத்துவிடும்.

3. பழைய செய்தித்தாள்கள்!

வீட்டில் இருக்கும் பழைய நியூஸ் பேப்பர்களை வைத்து கூட இந்த மேஜிக்கை நாம் செய்ய முடியும். ஒவ்வொரு மாங்காயையும் தனித்தனியாக செய்தித்தாள்களில் காற்று புகாதபடி நன்றாக சுற்றி ஒரு இருட்டான வெப்பமான இடத்தில் பத்திரமாக வைத்து விடுங்கள். பேப்பருக்குள் இருக்கும் வெப்பம் வெளியே செல்ல முடியாததால் மாங்காய் சீக்கிரமாகவே பழுக்க ஆரம்பித்துவிடும். மூன்று நாட்கள் கழித்து பிரித்து பார்த்தால் பழம் அழகாக மஞ்சள் நிறத்தில் மாறி இருக்கும்.

4. ஈரப்பதமான இலைகள்!

இது ஒரு மிகவும் பழமையான கிராமத்து முறை. ஒரு கூடை அல்லது அட்டைப்பெட்டியில் மாங்காய்களை வரிசையாக அடுக்கி வைத்து, அதன் மீது லேசாக தண்ணீர் தெளிக்கப்பட்ட பச்சை இலைகளை வைத்து முழுமையாக மூடி வையுங்கள். இலைகளில் இருந்து வரும் அந்த லேசான சூடு மற்றும் ஈரப்பதம் மாங்காய்களை மிக அழகாக பழுக்க செய்யும். ஆனால் இதில் இலைகள் அழுகி மாம்பழத்தில் பூஞ்சை வராமல் இருக்க தினமும் ஒருமுறை திறந்து செக் செய்து கொள்வது முக்கியம்.

5. பழுத்த தக்காளிகள்!

வாழைப்பழத்தைப் போலவே நன்கு பழுத்த சிவந்த தக்காளிகளும் மாங்காய்களை பழுக்க வைக்க ஒரு சூப்பரான சாய்ஸ் ஆகும். ஒரு பாத்திரத்தில் மாங்காய்களை போட்டு அதனுடன் நான்கு அல்லது ஐந்து பழுத்த தக்காளிகளை ஒன்றாக சேர்த்து மூடி வையுங்கள். தக்காளியில் இருந்து வெளியேறும் வாயு மாங்காயின் கடினமான தன்மையை மாற்றி அதை மிருதுவாகவும் இனிப்பாகவும் மாற்றிவிடும். காசு செலவில்லாமல் சுலபமாக செய்யக்கூடிய ஒரு அருமையான வழி இது.

ரசாயனம் கலந்த உணவுகளை தவிர்த்து இயற்கையான வழிகளை தேடிச் செல்வது நமது ஆரோக்கியத்திற்கு எப்போதுமே நல்லது. அதிலும் வீட்டில் உள்ள குழந்தைகளுக்கு கொடுக்கும்போது ரொம்பவே கவனமாக இருக்க வேண்டும். மேலே சொன்ன இந்த ஐந்து டிப்ஸ்களும் செய்வதற்கு எளிதாக இருப்பதோடு மட்டுமல்லாமல் பழத்தின் உண்மையான சுவையையும் சத்துக்களையும் அப்படியே முழுமையாக நமக்கு கொடுக்கின்றன.