அலுமினியம் ஃபாயில் வெச்சு செடியை காப்பாற்ற முடியுமா... தோட்டக்காரர்களின் சீக்ரெட் இதோ!

நமது வீட்டுத் தோட்டத்தில் செடிகளை வளர்க்கும் போது பூச்சிகளின் தொல்லை அதிக அளவில் இருக்கும். இவற்றை விரட்ட நாம் பலவிதமான ரசாயனங்களை பயன்படுத்துவது வழக்கம்.

ஆனால் அதற்கு பதிலாக வீடுகளில் இருக்கும் அலுமினியம் ஃபாயில் (Aluminium foil) பேப்பரைப் பயன்படுத்தி செடிகளை பூச்சிகளிடம் இருந்து சுலபமாக காப்பாற்ற முடியும். இது சமூக வலைத்தளங்களில் தற்போது மிகவும் பிரபலமாக பேசப்பட்டு வரும் ஒரு எளிய வீட்டு தந்திரமாக மாறியுள்ளது. இந்த முறையை சரியான படி பின்பற்றினால் தோட்டத்தில் நல்ல பலன் கிடைக்கும்.

ஒளி எதிரொளிப்பு!

இந்த பேப்பரின் பளபளப்பான மேற்பரப்பு சூரிய ஒளியை அப்படியே மேல்நோக்கி பிரதிபலிக்கும் தன்மை கொண்டது. இப்படி ஒளி எதிரொளிக்கப்படும் போது பறக்கும் பூச்சிகளுக்கு திசை குழப்பம் ஏற்படுகிறது. இதனால் அவை செடிகளின் மீது வந்து அமர்வது பெரிய அளவில் தவிர்க்கப்பட்டு செடிகள் பாதுகாப்பாக வளர முடிகிறது.

இளம் நாற்றுகள் மற்றும் சிறிய செடிகளுக்கு இந்த முறை மிகவும் பயனுள்ளதாக இருக்கும் என வேளாண் நிபுணர்கள் கூறுகின்றனர். செடிகள் சிறியதாக இருக்கும் போது மட்டுமே இந்த தந்திரம் சிறப்பாக வேலை செய்யும். செடிகள் வளர்ந்து இலைகள் பெரிதாகி பேப்பரை மறைத்து விட்டால் இதன் பயன் முற்றிலுமாக குறைந்துவிடும் என்பதை நினைவில் கொள்ளவும்.

செடிகளில் பயன்படுத்தும் முறை!

இதை பயன்படுத்தும் போது செடியின் தண்டுப் பகுதியில் நேரடியாக இறுக்கமாக சுற்றி வைப்பது முற்றிலும் தவறான ஒரு செயலாகும். மாறாக செடியின் அடிப்பகுதியில் உள்ள மண்ணின் மீது பளபளப்பான பகுதி மேல்நோக்கி இருக்கும் படி தட்டையாக விரித்து வைக்க வேண்டும். இப்படி செய்வதால் ஒளி சரியாக பட்டு எதிரொளிக்கும்.

அதே சமயம் செடிக்கு தேவையான காற்றோட்டம் மற்றும் தண்ணீர் செல்வதற்கு ஏற்ப தண்டின் அருகே சிறிது இடைவெளி விட்டு பேப்பரை வைக்க வேண்டும். காற்றில் பறந்து விடாமல் இருக்க அதன் ஓரங்களில் சிறிய கற்களை வைத்து அழுத்தி விடலாம். பேப்பரின் மீது மண் படாமல் சுத்தமாக இருந்தால் மட்டுமே பலன் கிடைக்கும்.

தவிர்க்க வேண்டிய முக்கிய தவறுகள்!

இணையத்தில் வரும் வீடியோக்களை பார்த்து செடியின் தண்டுகளில் பேப்பரை இறுக்கமாக சுற்றினால் செடியின் வளர்ச்சி கடுமையாக பாதிக்கப்படும். மேலும் தொடர்ச்சியாக சூரிய ஒளி நேரடியாக செடியின் மென்மையான திசுக்கள் மீது படும் போது அவை கருகிப் போக அதிக வாய்ப்புள்ளது. எனவே மண்ணின் மீது வைப்பதே மிகவும் பாதுகாப்பான ஒரு முறையாகும்.

நிரந்தர தீர்வா?

இது 100 சதவீதம் அனைத்து பூச்சிகளையும் அழிக்கும் என்று சொல்ல முடியாது. செடிகளில் பூச்சிகள் வராமல் தடுக்கும் ஒரு கூடுதல் பாதுகாப்பு முறை மட்டுமே ஆகும். அதிக பூச்சிகள் இருந்தால் தண்ணீர் பீய்ச்சி அடிப்பது அல்லது இயற்கையான பூச்சி விரட்டிகளை பயன்படுத்துவது போன்ற மற்ற முறைகளையும் சேர்த்து நாம் கண்டிப்பாக பயன்படுத்த வேண்டும்.

தோட்டத்தில் உள்ள அனைத்து செடிகளுக்கும் இந்த அலுமினியம் ஃபாயில் தந்திரத்தை பயன்படுத்த வேண்டிய அவசியம் இல்லை. செடிகளுக்கு சரியான அளவு தண்ணீர் ஊற்றுவது உரம் வைப்பது மற்றும் முறையாக பராமரிப்பது தான் அவற்றுக்கு உண்மையான ஆரோக்கியத்தை தரும். இந்த எளிய குறிப்பை பயன்படுத்தி உங்கள் வீட்டுத் தோட்டத்தை அழகாக பாதுகாத்து மகிழுங்கள்.