டாய்லெட்டில் துர்நாற்றமா? பேக்கிங் சோடாவை இப்படி பயன்படுத்தி பாருங்கள்!

குளியலறை பொதுவாக ஈரப்பதம் நிறைந்த இடமாக இருப்பதால், டாய்லெட்டைச் சுற்றியுள்ள தரையில் நீர்த்துளிகள் படிவது வழக்கம். அந்த ஈரமான சூழலும் சில நேரங்களில் வாசனைக்குக் காரணமாக இருக்கலாம். இது லேசான ஈரத்தை உறிஞ்சுவதால், அப்பகுதியை உலர்ந்த நிலையில் வைத்திருக்க சிறிதளவு உதவலாம்.

அழுக்கை அகற்றவும் உதவுமா?

பேக்கிங் சோடாவுக்கு லேசான உராய்வு தன்மை உள்ளது. எனவே டாய்லெட் பவுலின் அடிப்பகுதியில் படிந்திருக்கும் லேசான அழுக்குகளைத் துடைக்கும்போது இது உதவக்கூடும். ஆனால் மிகவும் பிடிவாதமான கறைகள் அல்லது ஆழமான அழுக்குகளை இதனால் மட்டுமே முழுமையாக அகற்றிவிட முடியாது.

எப்படி பயன்படுத்தலாம்?

முதலில் டாய்லெட் பவுலைச் சுற்றியுள்ள தரைப்பகுதியை நன்றாகச் சுத்தம் செய்து உலர்த்திக் கொள்ளுங்கள். அதன் பிறகு பவுலின் அடிப்பகுதியைச் சுற்றி பேக்கிங் சோடாவை மெல்லிய வளையம் போல தூவலாம்.

சுமார் 10 முதல் 15 நிமிடங்கள் அதை அப்படியே விட்டுவிட்டு, ஈரமான துணி அல்லது மென்மையான ஸ்பாஞ்ச் மூலம் அந்தப் பகுதியை நன்றாகத் துடைக்கலாம். பின்னர் சுத்தமான துணியால் மீண்டும் துடைத்து ஈரப்பதம் இல்லாமல் பார்த்துக்கொள்ள வேண்டும்.

இந்த முறையை அவ்வப்போது பயன்படுத்துவது அப்பகுதியைச் சுத்தமாகவும், விரும்பத்தகாத வாசனை குறைந்ததாகவும் வைத்திருக்க உதவலாம்.

கவனத்தில் கொள்ள வேண்டிய விஷயங்கள்

பேக்கிங் சோடா முழுமையான டாய்லெட் கிளீனர் அல்ல. இது கிருமிகளை அழிக்கும் கிருமிநாசினியாகக் கருதப்படக்கூடாது. அதேபோல், பிடிவாதமான கறைகள், கடினமான படிவங்கள் போன்றவற்றை அகற்றுவதற்கும் இது போதுமானதாக இருக்காது.

எனவே, வழக்கமான பாத்ரூம் சுத்தம் செய்யும் முறைக்கு மாற்றாக அல்லாமல், கூடுதல் பராமரிப்பு முறையாக இதைப் பார்க்கலாம்.

மேலும், ஏற்கெனவே வேறு ரசாயன கிளீனர்கள் அல்லது ப்ளீச் பயன்படுத்தியிருக்கும் இடத்தில் பேக்கிங் சோடாவைத் தன்னிச்சையாகக் கலந்து பயன்படுத்தக் கூடாது. வெவ்வேறு சுத்தம் செய்யும் ரசாயனங்களை ஒன்றுடன் ஒன்று கலப்பது தேவையற்ற ரசாயன வினைகளை ஏற்படுத்தக்கூடும். அதனால் ஒவ்வொரு கிளீனரையும் அதன் பயன்பாட்டு வழிமுறைகளின்படியே பயன்படுத்துவது பாதுகாப்பானது.

வாசனை குறைவதற்கு அறிவியல் காரணமா?

இது துர்நாற்றத்தை கட்டுப்படுத்த உதவும் தன்மை கொண்டது என்பதற்கு ஆய்வுகளும் உள்ளன. 2015-ல் Waste Management இதழில் வெளியான ஓர் ஆய்வில், சோடியம் பைகார்பனேட் பயன்படுத்தப்பட்ட சூழலில் துர்நாற்றம் குறைந்திருப்பது தொடர்பான முடிவுகள் பதிவாகியுள்ளன.

அதனால் டாய்லெட்டைச் சுற்றி பேக்கிங் சோடாவை தூவுவது ஒரு மந்திரத் தீர்வு என்று சொல்ல முடியாவிட்டாலும், சுத்தம் + உலர்த்துதல் + சரியான பராமரிப்பு ஆகியவற்றுடன் சேர்த்து பயன்படுத்தக்கூடிய ஓர் எளிய வீட்டு முறையாக இருக்கலாம்.

அடுத்த முறை பாத்ரூமில் விரும்பத்தகாத வாசனை வந்தால், விலையுயர்ந்த பொருட்களைத் தேடுவதற்கு முன்பு உங்கள் சமையலறையில் இருக்கும் பேக்கிங் சோடாவை நினைத்துப் பார்க்கலாம்!

பாத்ரூமில் உருவாகும் துர்நாற்றம் மற்றும் லேசான ஈரப்பதத்தை சமையலறை பேக்கிங் சோடாவை கொண்டு பாதுகாப்பான முறையில் கட்டுப்படுத்தும் எளிய வீட்டு வைத்தியத்தை வாசகர்கள் தெரிந்துகொள்வார்கள்.