அலாரம் அடிக்கவில்லையா? கோபம் வருகிறதா? முதலில் கொஞ்சம் ரிலாக்ஸ் ஆகுங்கள்..!

அலாரங்களின் சத்தம் இல்லாமல் திட்டமிட்ட நேரத்தில் எழுந்திருப்பது சிலருக்குச் சவாலாகத் தோன்றலாம். ஆனால், நம் வாழ்க்கை முறையை சரி செய்வது மூலமும் மற்றும் சில இயற்கை தொடர்புகள் மூலமும் இதை சாத்தியமாக்கலாம். அலாரம் இன்றி இயல்பாகவே நீங்கள் எப்படி காலை வேளையில் சரியான நேரத்தில் எழுந்திருக்கலாம் என்பதைப் பார்ப்போம்.

1. நிலையான தூக்க அட்டவணை:

சரியான நேரத்தில் எழுந்திருக்க மிகவும் பயனுள்ள வழிகளில் ஒன்று நிலையான தூக்க அட்டவணையைப் பராமரிப்பது. ஒவ்வொரு நாளும் ஒரே நேரத்தில் படுக்கைக்குச் சென்று எழுந்திருக்கும் பழக்கமானது வார இறுதி நாட்களிலும்கூட உங்கள் உள் உடல் கடிகாரத்தை அல்லது சர்க்காடியன் ரிதத்தை(circadian rhythm) ஒழுங்குபடுத்த உதவுகிறது. இந்த ஒழுங்குமுறை உங்கள் உடலை விரும்பிய நேரத்தில் இயல்பாகவே எழுப்ப பயிற்சி பெற்றுக்கொள்கிறது.

2. படிப்படியான ஒளி வெளிப்பாடு:

தூக்க முறைகளை ஒழுங்குபடுத்துவதில் ஒளி முக்கிய பங்கு வகிக்கிறது. காலையில் படிப்படியாக அதிகரிக்கும் ஒளி வெளிப்பாடு உங்கள் உடலுக்கு எழுந்திருக்க வேண்டிய நேரத்தை உணரவைக்கிறது. திரைச்சீலைகளை சற்றுத் திறந்து விடுவதன் மூலமோ அல்லது உதயமாகின்ற சூரியனை முகத்தில் பிரதிபலிக்கச் செய்வதன் மூலமாகவோ, இதை நீங்கள் அடையலாம்.

3. உகந்த மாலை வழக்கம்:

உறக்கத்திற்கு உங்கள் உடலை தயார்படுத்துவது ஓர் உகந்த மாலை வேளையில் தொடங்குகிறது. படுக்கைக்கு ஒரு மணி நேரத்திற்கு முன் திரைகள் மற்றும் பிரகாசமான விளக்குகளை தவிர்ப்பது உங்கள் உடல் மெலடோனின் உற்பத்திக்கு உதவும். இதுதான் தூக்கத்திற்குத் தேவையான ஹார்மோன் ஆகும். மேலும், ஓய்வெடுக்க வேண்டிய நேரம் வந்துவிட்டது என்பதை உங்கள் உடலுக்குச் சற்று உணர்த்த, வாசிப்பது, தியானம் செய்வது அல்லது வெதுவெதுப்பான குளியல் போன்ற நிதானமான செயல்களில் ஈடுபடுங்கள்.

4. நீரேற்றம் மற்றும் ஊட்டச்சத்து:

நீரேற்றமாக இருப்பது மற்றும் சீரான உணவை உட்கொள்வது உங்கள் தூக்கத்தின் தரத்தைச் சாதகமாக்கும். படுக்கப் போகும்முன் ஒரு கிளாஸ் தண்ணீர் குடிப்பதால், நீங்கள் புத்துணர்ச்சியுடன் எழுந்திருப்பதையும், நீர்ச்சத்து குறையாமல் இருப்பதையும் உறுதி செய்கிறது. வாழைப்பழங்கள் மற்றும் கீரைகள் போன்ற மெக்னீசியம் மற்றும் பொட்டாசியம் நிறைந்த உணவுகளை உட்கொள்வது ஓய்வையும் சிறந்த தூக்கத்தையும் ஊக்குவிக்கும்.

5. உடல் செயல்பாடு:

வழக்கமான உடல் செயல்பாடு உங்கள் தூக்க முறைகளை சீராக்க உதவும். உறங்கும் நேரத்துக்கு மிக அருகில் வைத்துகொள்ளாமல், பகல் நேரத்தில் மிதமான உடற்பயிற்சியில் ஈடுபடுவது நீங்கள் வேகமாக தூங்கவும் ஆழ்ந்த உறக்கத்தை அனுபவிக்கவும் உதவும். இதுவும், நீங்கள் விரும்பிய நேரத்தில் எழுவதை எளிதாக்குகிறது.

6. மனநிலை:

நாளைக்குச் செய்யவேண்டியதை முன்கூட்டியே உங்கள் மனதிற்கு பிடித்தவாறு கற்பனை செய்து பார்த்துக்கொள்ளுங்கள். மற்றும் தூங்கும் முன், நீங்கள் விரும்பிய நேரத்தில் எழுந்தால் எப்படி இருக்கும் என்பதையும் கற்பனை செய்துபாருங்கள். இந்த மன ஒத்திகையானது நீங்கள் தானாகவே எழுந்திருக்க உதவும். ஒரு மைண்ட் அலாரமாய்கூட செயல்படும்.

இயற்கையான விழிப்பு உத்திகளைப் பழகிக்கொள்வது ஆரோக்கியமான, மற்றும் மிகவும் சீரான வாழ்க்கை முறைக்கு வழிவகுக்கும். அலாரங்கள் இல்லாமல் எழுந்திருப்பது என்னமோ கஷ்டமான காரியம் இல்லை. மேலே குறிப்பிட்டதை நீங்கள் பழக்கப்படுத்தி உங்கள் வாழ்க்கையில் இணைத்துக்கொள்ளும்போது, நீங்கள் ஆரோக்கியமாக இருக்கிறீர்கள் என்பதற்கு அதுவே ஒரு பெரிய சான்றாகும்.