மழைக் கால தீபாவளி: மின்விளக்குகளால் வரும் பெரும் ஆபத்து! தவிர்க்க 5 வழிகள்!

தீபாவளி என்றாலே வண்ண வண்ண மின்விளக்குகளால் வீட்டை அலங்கரிப்பது தனி மகிழ்ச்சி. ஆனால் மழையும் ஈரப்பதமும் நிறைந்த காலநிலையில் மின்விளக்குகளைப் பயன்படுத்தும்போது சிறு கவனக்குறைவுகூட ஆபத்தை ஏற்படுத்தலாம். அழகான அலங்காரத்துடன் குடும்பத்தின் பாதுகாப்பையும் உறுதிப்படுத்துவது எப்படி என்பதை இக்கட்டுரையில் தெரிந்துகொள்வோம்.

தீபாவளிப் பண்டிகையின்போது வீட்டின் வாசல், பால்கனி, ஜன்னல், மாடி என எல்லா இடங்களிலும் மின்விளக்குச் சரங்களைத் தொங்கவிட்டு அலங்கரிப்பது வழக்கம். இரவு நேரத்தில் மின்னும் வண்ண விளக்குகள் வீட்டிற்கே பண்டிகைக் களையைக் கொடுக்கும். ஆனால் மழைக்காலத்தில் இந்த அலங்காரங்களைச் செய்யும்போது கூடுதல் எச்சரிக்கை அவசியம். தண்ணீரும் மின்சாரமும் ஒன்றாகச் சேரும்போது மின்சாரம் தாக்கும் அபாயம் அதிகரிக்கலாம்.

மழைக்காலத் தீபாவளியில் கடைப்பிடிக்க வேண்டிய 5 பாதுகாப்பு விதிகள்

1. தரமான மின்விளக்குகளைத் தேர்ந்தெடுங்கள்!

வீட்டு வாசலிலும் பால்கனியிலும் தொங்கவிடுவதற்காகத் தயாரிக்கப்பட்ட வெளிப்புறப் பயன்பாட்டுக்கான (Outdoor Use) மின்விளக்குகளை மட்டுமே வாங்க வேண்டும். ISI தரக்குறியீடு உள்ள, நம்பகமான தயாரிப்புகளைத் தேர்ந்தெடுப்பது நல்லது. உட்புற அலங்கார விளக்குகளை வெளியில் பயன்படுத்தக் கூடாது.

2. மழைநீர் படாதவாறு பாதுகாக்கவும்!

மின்விளக்குகளின் இணைப்புப் பகுதிகள், பிளக்குகள், வயர்கள் ஆகியவற்றில் மழைநீர் புகாமல் பார்த்துக்கொள்ள வேண்டும். வானிலைத் தடுப்புப் பாதுகாப்பு கொண்ட பிளக் பாக்ஸ், சாக்கெட்டுகளைப் பயன்படுத்த வேண்டும். வெறும் பிளாஸ்டிக் கவரால் சுற்றிவிட்டால் பாதுகாப்பு கிடைத்துவிடும் என்று நினைக்கக் கூடாது.

3. ஈரமான கைகளால் தொடாதீர்கள்!

மின்விளக்குகளைப் பொருத்தும்போதும், சுவிட்சைப் போடும்போதும் கைகள் ஈரமாக இருக்கக் கூடாது. மழையில் நனைந்த தரையிலோ தண்ணீர் தேங்கிய இடத்திலோ நின்றுகொண்டு மின்சாதனங்களை இயக்கக் கூடாது. மின்விளக்குகளைச் சரிசெய்ய வேண்டியிருந்தால் முதலில் மின்சார இணைப்பைத் துண்டிக்க வேண்டும்.

4. வயர்களைச் சரிபார்க்க மறக்காதீர்கள்!

கிழிந்த வயர்கள், தளர்வான இணைப்புகள், உடைந்த பிளக்குகள் போன்றவை மின்கசிவுக்கும் தீ விபத்துக்கும் காரணமாகலாம். பழுதடைந்த வயர்களை உடனடியாக மாற்ற வேண்டும். அதிக மின்சாதனங்களை ஒரே சாக்கெட்டில் இணைத்து மின்சுமையை அதிகரிக்கக் கூடாது. மின்கசிவு தடுப்பானான ELCB/RCCB சரியாகச் செயல்படுகிறதா என்பதையும் தகுதியான மின்சாரப் பணியாளரிடம் பரிசோதிக்க வேண்டும்.

5. குழந்தைகள் மற்றும் மின்வயர்கள் மீது கவனம்!

மின்விளக்குச் சரங்கள் குழந்தைகளின் கைகளுக்கு எட்டாத உயரத்தில் இருக்க வேண்டும். மின்வயர்களை இரும்புக் கம்பிகள் அல்லது கூர்மையான பொருட்களில் கட்டக்கூடாது. மின்கம்பிகளுக்கு அருகில் அலங்கார விளக்குகளைப் பொருத்துவதையும் தவிர்க்க வேண்டும். இடியுடன் கூடிய மழை பெய்யும்போது வெளிப்புற அலங்கார விளக்குகளை அணைத்துவிடுவது நல்லது.

மின்விளக்குகளைப் பயன்படுத்தும் போது கவனிக்க வேண்டிய கூடுதல் விஷயங்கள்!

மின்விளக்குச் சரங்களை வாங்கும் போதே அவற்றின் வயர் நீளம், மின்சாரத் திறன், தயாரிப்பு விவரங்கள் ஆகியவற்றைச் சரிபார்க்க வேண்டும். ஒன்றுக்கு மேற்பட்ட விளக்குச் சரங்களை இணைக்கும் போது தயாரிப்பாளர் குறிப்பிட்டுள்ள வரம்பை மீறக் கூடாது. தரையில் வயர்கள் சிதறிக் கிடந்தால் மழைநீருடன் தொடர்பு ஏற்படுவதுடன், நடந்து செல்பவர்களும் தடுமாறி விழும் அபாயம் உள்ளது. எனவே வயர்களைச் சுவரோரமாகப் பாதுகாப்பாக அமைக்க வேண்டும்.

மேலும், மின்விளக்குகள் வழக்கத்திற்கு மாறாகச் சூடாகுதல், தீப்பொறி வருதல், சத்தம் எழுதல், எரிந்த வாசனை வீசுதல் போன்ற அறிகுறிகள் தென்பட்டால் உடனடியாக மின்சார இணைப்பைத் துண்டிக்க வேண்டும். தண்ணீர் புகுந்த சாக்கெட்டுகளை மீண்டும் பயன்படுத்துவதற்கு முன்பு மின்சாரப் பணியாளரிடம் பரிசோதிக்க வேண்டும்.

வீட்டில் பயன்படுத்தும் மின்சுற்றுக்கு RCCB ( அதாவது மின்கசிவு ஏற்பட்டால் உடனடியாக மின்சார இணைப்பைத் துண்டித்து , மின்சாரம் தாக்கும் அபாயத்தைக் குறைக்க உதவும் பாதுகாப்புச் சாதனம்.)போன்ற மின்கசிவு பாதுகாப்பு ஏற்பாடு இருப்பது அவசியம். மின்சாரம் தாக்கியவரை வெறும் கைகளால் தொடாமல், முதலில் மின்சாரத்தைத் துண்டித்து அவசர மருத்துவ உதவியை நாட வேண்டும். இந்த முன்னெச்சரிக்கைகள் பண்டிகைக் கால விபத்துகளைத் தவிர்க்க உதவும்.

மின்விளக்குகளைப் பயன்படுத்தாத நேரங்களில் சுவிட்சை அணைப்பதுடன், மின்சார இணைப்பையும் துண்டிப்பது நல்லது. குறிப்பாக இரவு முழுவதும் கண்காணிப்பின்றி விளக்குகளை எரிய விடுவதைத் தவிர்க்க வேண்டும். மழை அதிகமாகப் பெய்யும் நாட்களில் வெளிப்புற அலங்கார விளக்குகளை அகற்றி விடுவதும் பாதுகாப்பானது.

தீபாவளியின் மகிழ்ச்சி என்பது வீட்டை அலங்கரிப்பதில் மட்டுமல்ல; குடும்பத்தினர் அனைவரும் பாதுகாப்பாகவும் மகிழ்ச்சியாகவும் பண்டிகையைக் கொண்டாடுவதிலும்தான் இருக்கிறது. மின்விளக்குகளின் அழகைவிட உயிரின் பாதுகாப்பே முக்கியம் என்பதை மறந்துவிட வேண்டாம். சிறிய முன்னெச்சரிக்கை, பெரிய விபத்தைத் தவிர்க்க உதவும். நம் வீட்டை ஒளிரச் செய்யும் விளக்குகள், நம் குடும்பத்தின் மகிழ்ச்சியை மறைக்கும் ஆபத்தாக மாறி விடக் கூடாது. பாதுகாப்பே முதல் பண்டிகை!! பண்டிகைக்காக செய்யும் அலங்காரம் ஆபத்தாக மாறாமல் இருக்க விழிப்புணர்வுடன் செயல்படுவோம்!!

மழை மற்றும் ஈரப்பதம் நிறைந்த காலநிலையில் அலங்கார விளக்குகளை எவ்வாறு பாதுகாப்பாகப் பயன்படுத்துவது, மின்கசிவைத் தடுப்பது மற்றும் குடும்பத்தின் உயிரைப் பாதுகாப்பது குறித்த முழுமையான வழிகாட்டுதல்.