வளர்ந்து வரும் நாட்டு மக்கள் ஊட்டச்சத்து குறைபாட்டினால் அதிகமாக பாதிக்கப்படுவது ஏன் தெரியுமா?

வளரும் நாடுகளில் மக்கள் (PEM (protein, energy, malnutrition) புரதம், ஆற்றல் மற்றும் ஊட்டச்சத்து குறைபாடுகளால் பாதிக்கப்பட்டு ஆரோக்கியக் குறைவை அனுபவிக்கின்றனர். அதற்கான காரணங்களை பற்றி இந்தப் பதிவில் பார்ப்போம்.

பரவலான வறுமை: வளரும் நாடுகளில் உள்ள மக்களில் பலர் மிகக் குறைந்த வருமானத்தில் வாழ்கின்றனர். அதற்கேற்ற பண வசதி இல்லாததால், அவர்களால் பலவிதமான ஆரோக்கியமான உணவுகளை வாங்க முடிவதில்லை. அவர்கள் மலிவான, குறைவான ஊட்டச்சத்து உள்ள உணவுப் பொருட்களை வாங்கி உண்கிறார்கள். எனவே, இது ஊட்டச்சத்து குறைபாடுகளுக்கு வழிவகுக்கிறது.

மோசமான உணவு: உணவின் மோசமான தரமும் ஒரு முக்கியக் காரணமாகும். தேவையான புரதங்கள், கலோரிகள் மற்றும் சராசரியான வளர்ச்சி மற்றும் ஆரோக்கியத்திற்குத் தேவையான ஊட்டச்சத்துக்கள் இல்லாத உணவுகள் அதிகம் மலிந்து கிடக்கின்றன. அதிகரித்து வரும் மக்கள் தொகைக்கு போதுமான புரதச் சத்துக்களை உள்ளடக்கிய உணவு வகைகள் கிடைப்பதில்லை. இதனால் குழந்தைகள் மற்றும் கர்ப்பிணி பெண்கள் அதிகமாக பாதிக்கப்படுகிறார்கள். உலக சுகாதார அமைப்பு, ஊட்டச்சத்து குறைபாடுகளால் பாதிக்கப்பட்ட 70 சதவிகித அதிகமான குழந்தைகள் ஆசியாவில் வாழ்கின்றனர் என்று சொல்கிறது. இது அவர்களது பொருளாதார நிலைமைக்கும் ஊட்டச்சத்து ஆரோக்கியத்திற்கும் இடையிலான வித்தியாசத்தைக் காட்டுகிறது.

விவசாய வளங்களின் பற்றாக்குறை: பல இடங்களில் விவசாயத் தொழில்நுட்பங்கள் அல்லது நடைமுறைகளில் போதுமான முதலீடு இல்லை. புரதம் மற்றும் ஆற்றல் நிறைந்த பயிர்கள் உட்பட தரமான விதைகள் அல்லது விவசாயக் கருவிகள் கிடைக்காமல் இருப்பதும் இதற்கு ஒரு காரணம்.

உணவு விருப்பத்தேர்வு: பல்வேறு கலாசாரங்களில் உணவு வகைகள் வேறுபட்டு இருக்கின்றன. சில கலாசாரங்களில் அரிசி அல்லது சோளம் போன்ற சில முக்கிய உணவுகளை வலியுறுத்துகின்றன. இறைச்சி அல்லது பருப்பு வகைகள் போன்ற புரதம் நிறைந்த உணவுகளை புறக்கணிக்கிறார்கள். இந்த வரையறுக்கப்பட்ட உணவு வகைகள் ஊட்டச்சத்து குறைபாட்டிற்கு வழிவகுக்கிறது.

உணவுப் பாதுகாப்பின்மை: இயற்கைப் பேரழிவுகள், சீற்றங்கள், மோதல்கள் அல்லது பொருளாதார உறுதியற்ற தன்மை உணவு விநியோகத்தை சீர்குலைத்து மக்களுக்கு நிலையான உணவு கிடைக்காமல் செய்கிறது. உணவுப் பற்றாக்குறை இருக்கும்போது மக்களுக்கு போதுமான கலோரிகள் அல்லது புரதம் கிடைக்காமல் போகலாம்.

சுகாதாரம் மற்றும் துப்புரவின்மை: மோசமான சுகாதார சூழ்நிலைகள், அசுத்தமான தண்ணீர் மற்றும் துப்புரவு இல்லாத சூழல் அதிக நோய்களுக்கு வழிவகுக்கும். நோய்வாய்ப்பட்டிருக்கும்போது மக்களின் உடல்கள் ஊட்டச்சத்துக்களை திறம்பட ஏற்காது. இது குறைபாடுகளை மோசமாக்குகிறது.

விழிப்புணர்வு மற்றும் கல்வி இல்லாமை: ஊட்டச்சத்து பற்றிய கல்வியறிவு பற்றாக்குறை மோசமான உணவுத் தேர்வுகளுக்கு வழி வகுக்கிறது. பல தனிநபர்கள் சரிவிகித உணவின் முக்கியத்துவத்தை பற்றி அறிந்து கொள்ளாமல் இருக்கிறார்கள். சத்தான உணவை எப்படி தயாரிப்பது என்பதை புரிந்துகொள்ளாமல் இருக்கிறார்கள். அதனால் ஊட்டச்சத்து குறைபாடு விகிதம் அதிகரிக்கிறது.

இந்தக் குறைபாடுகளை சரி செய்ய உதவும் சில வழிமுறைகள்:

1. ஐந்து வயதுக்கு உட்பட்ட குழந்தைகளின் பெற்றோருக்கு ஊட்டச்சத்து பற்றிய விழிப்புணர்வு ஊட்டுவது மிகவும் முக்கியமானது.

2. உணவு கிடைப்பதை விவசாய மேம்பாடு, உணவு விநியோக திட்டங்கள் மற்றும் பொருளாதார ஆதரவு, சத்தான உணவுகளுக்கான அணுகல், உள்ளூர் உணவு உற்பத்தியை ஊக்குவித்தல் மற்றும் கலோரி மற்றும் புரதத் தேவைகளைப் பூர்த்தி செய்யும் பல்வேறு உணவுகளை உறுதிப்படுத்துதல் ஆகியவற்றின் மூலம் மேம்படுத்துதல்.

3. ஊட்டச்சத்து குறைபாட்டிற்கான வழக்கமான பரிசோதனைகளை உள்ளடக்கிய ஒரு வலுவான சுகாதார அமைப்பை நிறுவுதல், ஆபத்தில் உள்ள நபர்களை முன்கூட்டியே கண்டறிய உதவும்.

4. வைட்டமின் ஏ, இரும்புச்சத்து மற்றும் பிற அத்தியாவசிய நுண்ணூட்டச் சத்துக்களை வழங்குவது PEMக்கு பங்களிக்கும் குறைபாடுகளைத் தடுக்கலாம். ஊட்டச்சத்து குறைபாடுள்ள குழந்தைகளின் மீட்பு விகிதங்களை மேம்படுத்துவதற்கு அதிக அளவு வைட்டமின் ஏ சப்ளிமெண்ட்ஸ் தரலாம்.