மொபைல், வைஃபை கதிர்வீச்சு உயிரை குடிக்குமா? இதோ மக்கள் நம்பும் பகீர் பொய்களும் உண்மைகளும்!

காலை எழுந்தவுடன் கையில் எடுக்கும் செல்போன் முதல் இரவு தூங்கும் போது அணைக்கும் வைஃபை வரை நமது வாழ்க்கை முழுவதும் எலக்ட்ரானிக் பொருட்களால் சூழப்பட்டுள்ளது. இதற்கிடையே இந்த சாதனங்களில் இருந்து வெளிவரும் கதிர்வீச்சு நமது உயிருக்கே உலை வைத்துவிடும் என்ற ஒரு பெரிய பீதி மக்களிடம் நீண்ட காலமாகவே பரவி கிடக்கிறது. 

வாட்ஸ்அப் ஃபார்வர்டுகளில் வரும் இத்தகைய செய்திகளை பார்த்து பலரும் பயந்து நடுங்குகிறார்கள். உண்மையில் இந்த கதிர்வீச்சு அவ்வளவு ஆபத்தானதா, மக்கள் நம்பும் கட்டுக்கதைகளுக்கு பின்னால் இருக்கும் அறிவியல் உண்மைகள் என்ன என்பதைப் பற்றி தெரிந்து கொள்ளலாம் வாங்க.

செல்போன் கதிர்வீச்சு உயிரை குடிக்கும்!

இதுதான் உலகிலேயே அதிகம் பேரால் நம்பப்படும் ஒரு மாபெரும் பொய். ஸ்மார்ட்போன்களில் இருந்து வரும் கதிர்வீச்சு மிக மிக குறைவானது. அறிவியலின் படி இது நமது உடலில் எந்த ஒரு மோசமான மாற்றத்தையும் அல்லது மரபணு ரீதியான பாதிப்பையும் ஏற்படுத்தாது.

ஆகையால் எந்த ஒரு வீண் பயமும் இல்லாமல் நீங்கள் உங்களுடைய மொபைலை பயன்படுத்தலாம். ஆனால், தொடர்ந்து பல மணி நேரங்கள் ஸ்க்ரீனை பார்ப்பதை தவிர்த்து கண்களுக்கு கொஞ்சம் ரெஸ்ட் கொடுப்பது எப்போதுமே மிகவும் நல்லது.

லேப்டாப் முன் அமர்ந்தால் பெரிய ஆபத்து!

ஐடி ஊழியர்கள் முதல் மாணவர்கள் வரை பலரும் மணிக்கணக்கில் லேப்டாப் முன் அமர்ந்து வேலை செய்கிறார்கள். லேப்டாப் கதிர்வீச்சால் உடல் நலம் கெட்டுப்போகும் என்பது முற்றிலும் தவறான ஒரு தகவல். உண்மையில் அங்கு பிரச்சனை கதிர்வீச்சு கிடையாது. நாம் அமரும் தவறான முறை தான் நமது கழுத்து மற்றும் முதுகு வலிக்கு முக்கிய காரணமாக அமைகிறது. ஒரு நல்ல தரமான நாற்காலியை பயன்படுத்தி நேராக நிமிர்ந்து அமர்ந்து வேலை செய்தால் எந்த ஒரு உடல் உபாதையும் வராது.

வைஃபை ரவுட்டர்கள் மூளையை பாதிக்கும்!

வீடுகளில் 24 மணி நேரமும் ஓடிக்கொண்டிருக்கும் வைஃபை ரவுட்டர்களால் நமது ஆரோக்கியம் கெட்டுப்போகும் என பலரும் நினைக்கிறார்கள். வைஃபை சிக்னல்கள் என்பவை ரேடியோ அலைகளை விடவும் குறைந்த சக்தி கொண்டவை. இது எந்த வகையிலும் மனித உடலை பாதிக்காது என பல ஆய்வுகள் ஆணித்தரமாக கூறுகின்றன. ஒருவேளை உங்களுக்கு இது குறித்து லேசான பயம் இருந்தால், இரவு தூங்கும் போது மட்டும் ரவுட்டரை சுவிட்ச் ஆஃப் செய்து வைத்துவிட்டு நிம்மதியாக உறங்குங்கள்.

மைக்ரோவேவ் ஓவன் உணவை விஷமாக்கும்!

மைக்ரோவேவ் ஓவனில் உணவை சூடுபடுத்தினால் அந்த உணவில் கதிர்வீச்சு கலந்துவிடும் என்ற ஒரு பெரிய கட்டுக்கதை உலவி வருகிறது. ஓவன் என்பது வெறும் மின்காந்த அலைகளை வைத்து உணவில் உள்ள நீர்ச்சத்தை சூடுபடுத்தும் ஒரு சாதனம் மட்டுமே. அதனுடைய கதவு சரியாக மூடப்பட்ட நிலையில் அதை பயன்படுத்தும் போது அதிலிருந்து எந்த ஒரு ஆபத்தான கதிர்வீச்சும் வெளியேறாது.

தொழில்நுட்பம் நமது அன்றாட வேலைகளை சுலபமாக்க மனிதன் கண்டுபிடித்த ஒரு அற்புதமான கருவி. தேவையற்ற வதந்திகளை நம்பி இந்த சாதாரண சாதனங்களை பார்த்து நாம் பயப்பட வேண்டிய அவசியமே கிடையாது. எந்த ஒரு பொருளையும் சரியான முறையில் ஒரு குறிப்பிட்ட அளவோடு பயன்படுத்தினால் அது நமக்கு எப்போதுமே பாதுகாப்பானது தான். 

விழிப்புணர்வோடு இருப்போம், வதந்திகளைப் புறக்கணிப்போம்.