டாய்லெட்டில் பூண்டு: பைத்தியக்காரத்தனமா? அல்லது புத்திசாலித்தனமா?

Garlic in the toilet: கழிப்பறை சுத்தம் என்பது ஆரோக்கியத்தின் அடிப்படை. இதற்காகக் கடைகளில் விற்கும் விதவிதமான டாய்லெட் கிளீனர்கள், வாசனை திரவியங்கள் எனப் பணத்தைக் கொட்டி வாங்குகிறோம். ஆனால், என்னதான் தேய்த்துக் கழுவினாலும், சில நேரங்களில் கண்ணுக்குத் தெரியாத ஒரு விதமான துர்நாற்றம் கழிப்பறையில் வீசிக்கொண்டே இருக்கும். 

இதற்குத் தீர்வு நம் சமையலறையிலேயே இருக்கிறது, அதுவும் ஒரு பூண்டுப் பல் போதும். கேட்பதற்கு விசித்திரமாக இருந்தாலும், இதன் பின்னால் இருக்கும் அறிவியல் காரணம் உங்களை ஆச்சரியப்படுத்தும்.

நாம் உணவின் ருசிக்காகவும், மருத்துவ குணத்திற்காகவும் பயன்படுத்தும் பூண்டில், கிருமிகளை அழிக்கும் சக்தி இயற்கையாகவே உள்ளது. பூண்டை நசுக்கும்போது, அதிலிருந்து 'அலிசின்' (Allicin) என்ற ஒரு வேதிப்பொருள் வெளிப்படுகிறது. இது ஒரு இயற்கையான 'ஆன்டி-பயாட்டிக்' மற்றும் பூஞ்சை எதிர்ப்பியாகச் செயல்படுகிறது. 

கழிப்பறையில் துர்நாற்றம் ஏற்படுவதற்கு முக்கியக் காரணமே, நாம் கண்ணால் பார்க்க முடியாத இடங்களில் ஒளிந்திருக்கும் பாக்டீரியாக்களும், பூஞ்சைகளும் தான். இந்த அலிசின், அந்தக் கிருமிகளின் வளர்ச்சியைத் தடுத்து, துர்நாற்றத்தை விரட்டுகிறது.

எப்படிப் பயன்படுத்துவது? இதைச் செய்வதற்குப் பெரிய வேலை மெனக்கெடல்கள் எதுவும் தேவையில்லை. வாரத்தில் இரண்டு அல்லது மூன்று நாட்கள் இதைச் செய்தாலே போதும்.

1. இரவு தூங்கச் செல்வதற்கு முன், இரண்டு அல்லது மூன்று பூண்டு பற்களை எடுத்துக் கொள்ளுங்கள்.

2. அதை அப்படியே முழுதாகப் போடாமல், தோலை உரித்துவிட்டுச் லேசாக நசுக்கிக் கொள்ளுங்கள். 

3. இந்த நசுக்கிய பூண்டு பற்களைக் கழிப்பறைத் தொட்டிக்குள் போட்டு விடுங்கள்.

4. இரவு முழுவதும் அது அப்படியே இருக்கட்டும். காலை எழுந்தவுடன், பிரஷ்ஷால் ஒரு முறை தேய்த்துவிட்டு ஃப்ளஷ் செய்து விடுங்கள்.

5. இன்னும் சிறந்த பலன் கிடைக்க, நசுக்கிய பூண்டை வெந்நீரில் போட்டு, அந்த நீரை ஊற்றியும் விடலாம்.

கறைகள் போகுமா? இங்கு நாம் ஒரு விஷயத்தைத் தெளிவாகப் புரிந்து கொள்ள வேண்டும். பூண்டு என்பது கிருமி நாசினி மட்டுமே தவிர, கறை நீக்கி அல்ல. உப்புத் தண்ணீர் படிந்து, கழிப்பறையில் மஞ்சள் நிறத்தில் உப்புக்கறை இருந்தால், அதை பூண்டால் நீக்க முடியாது. அதற்கு வினிகர் அல்லது சிட்ரிக் ஆசிட் போன்ற அமிலத்தன்மை கொண்ட பொருட்களைத்தான் பயன்படுத்த வேண்டும். பூண்டு, கண்ணுக்குத் தெரியாத கிருமிகளை அழித்து, அறையைத் துர்நாற்றமில்லாமல் வைத்துக்கொள்ள மட்டுமே உதவும்.

கர்ப்பிணிகள், குழந்தைகள் உள்ள வீடுகளில் வீரியம் மிக்க ரசாயனங்களைப் பயன்படுத்தத் தயங்குபவர்களுக்கு இது ஒரு சிறந்த மாற்றாகும். அதேபோல், செப்டிக் டேங்க் வைத்திருப்பவர்கள் அதிகப்படியான பிளீச்சிங் பவுடர் அல்லது ஆசிட் ஊற்றினால், உள்ளே இருக்கும் நல்ல பாக்டீரியாக்கள் அழிந்துவிடும். ஆனால், பூண்டு இயற்கையானது என்பதால் செப்டிக் டேங்க் அமைப்பிற்குப் பெரிய பாதிப்பை ஏற்படுத்தாது.