லக்கி மூங்கில் செடி அடிக்கடி வாடிப் போகிறதா.. நீங்கள் செய்யும் இந்த பெரிய தவறுகள் தான் காரணம்!

இன்றைய காலகட்டத்தில் வீடுகள் மற்றும் அலுவலகங்களில் அழகுக்காகவும் அதிர்ஷ்டத்திற்காகவும் வளர்க்கப்படும் செடிகளில் லக்கி மூங்கில் (Lucky Bamboo)  வளர்க்கப்படுகின்றன. பார்ப்பதற்கு மூங்கில் போல இருந்தாலும் இது உண்மையான மூங்கில் இனம் கிடையாது. இதன் உண்மையான தாவரவியல் பெயர் டிரசீனா சாண்டேரியானா (Dracaena Sanderiana) என்பதாகும். 

சீனர்களின் பாரம்பரிய ஃபெங் சுய் சாஸ்திரப்படி இந்த செடியை வீட்டில் வைப்பது செல்வத்தையும் நேர்மறை ஆற்றலையும் ஈர்க்கும் என மக்கள் ஆழமாக நம்புகின்றனர். இதை பராமரிப்பது மிகவும் எளிதான காரியம் என்று பலரும் நினைத்து ஒரு கண்ணாடி பாட்டிலில் போட்டு வைத்து விடுகிறார்கள்.

ஆனால், நாம் அறியாமல் செய்யும் சில சின்னச் சின்ன தவறுகளால் இந்த செடி சீக்கிரமாகவே மஞ்சள் நிறமாக மாறி வாடிவிடும். இதை எப்படி சரியாக வளர்ப்பது, எதைத் தவிர்க்க வேண்டும் என்பதைப் பற்றி இந்தப் பதிவில் பார்க்கலாம்.

வளர்க்கும் முறைகள்!

இந்த செடியின் சிறப்பம்சமே இதை தண்ணீர் மற்றும் மண் என இரண்டிலும் மிக சுலபமாக வளர்க்க முடியும். நீங்கள் இதை தண்ணீரில் வளர்க்க ஆசைப்பட்டால், ஒரு அழகான கண்ணாடி குடுவையில் செடியின் வேர்கள் மட்டும் மூழ்கும் அளவிற்கு தண்ணீர் வைத்தால் போதுமானது. 

அதோடு சில வண்ண கூழாங்கற்களை தொட்டியில் போட்டால் செடி சாய்ந்து விடாமல் நேராக நிற்க நல்ல பிடிமானம் கிடைக்கும். ஒருவேளை மண்ணில் வளர்க்க நினைத்தால், தண்ணீர் அதிகம் தேங்காத வகையில் நல்ல வடிகால் வசதி கொண்ட சாதாரண செடி தொட்டியை பயன்படுத்த வேண்டும். மண்ணில் வளரும் செடிகள் சற்று வேகமாக வளரும் தன்மையை கொண்டிருக்கும்.

சூரிய ஒளி!

லக்கி மூங்கில் செடிக்கு நேரடி சூரிய ஒளி என்பது எப்போதுமே பெரிய எதிரி ஆகும். இதை ஜன்னல் ஓரத்தில் லேசான அல்லது மறைமுகமான வெளிச்சம் படும் இடத்தில் வைப்பது தான் மிகவும் சிறந்தது. கடுமையான வெயில் நேரடியாக செடியின் மீது பட்டால் அதன் பச்சைப் பசேலென்ற இலைகள் உடனடியாக கருகி மஞ்சள் நிறமாக மாறிவிடும். அதனால் வீட்டின் ஹால் அல்லது அலுவலக மேசைகளில் வளர்க்க இது ஒரு அருமையான இன்டோர் பிளான்ட் தேர்வாக அமையும்.

தவிர்க்க வேண்டிய தவறுகள்!

நாம் செய்யும் மிகப்பெரிய முதல் தவறு சாதாரண குழாய் நீரை அப்படியே இந்த செடிக்கு பயன்படுத்துவது தான். குழாய் தண்ணீரில் கலக்கப்பட்டிருக்கும் குளோரின் மற்றும் ப்ளூரைடு போன்ற ரசாயனங்கள் இந்த மென்மையான செடியின் வேர்களை மெல்ல மெல்ல அழித்துவிடும். அதனால் எப்போதுமே சுத்திகரிக்கப்பட்ட குடிநீர் அல்லது மழைநீரை பயன்படுத்துவது மிகச் சிறந்த பலனைத் தரும். அதேபோல குறைந்தது பத்து நாட்களுக்கு ஒரு முறையாவது பழைய தண்ணீரை மாற்றிவிட்டு புதிய தண்ணீரை ஊற்ற வேண்டியது கட்டாயம் ஆகும்.

அடுத்தபடியாக அளவுக்கு அதிகமாக உரம் போடுவதை கண்டிப்பாக தவிர்க்க வேண்டும். லக்கி மூங்கிலுக்கு மிகக் குறைந்த அளவிலான சத்துக்களே போதுமானது. செடி வேகமாக வளர வேண்டும் என்று கடைகளில் விற்கும் அதிகப்படியான திரவ உரங்களை ஊற்றினால் செடி முற்றிலுமாக கருகிவிடும். இரண்டு மாதங்களுக்கு ஒருமுறை ஓரிரு சொட்டுகள் மட்டுமே உரம் அளிப்பது போதுமானதாகும்.

லக்கி மூங்கில், வீட்டின் அமைதியையும் அழகையும் பல மடங்கு கூட்டும் ஒரு அற்புதமான செடி. இலைகள் ஏதேனும் மஞ்சளாக மாறினால் அதை உடனடியாக நறுக்கி விடுவது செடியின் ஒட்டுமொத்த ஆரோக்கியத்தை பாதுகாக்கும். மேலே கூறப்பட்டுள்ள இந்த குறிப்புகளை உங்கள் மனதில் பதித்துக் கொண்டு பராமரித்து வந்தால், உங்கள் வீட்டு லக்கி மூங்கில் செடி எப்போதும் பசுமையோடும் செழிப்போடும் இருக்கும்.