ஆன்லைன் ஷாப்பிங் - ஏமாந்துடாதீங்க மக்களே! இந்த 6 விஷயங்கள் உங்களுக்கான வழிகாட்டி!

இன்றைய காலக்கட்டத்தில் ஆன்லைன் ஷாப்பிங் என்பது தவிர்க்க முடியாத ஒன்றாக மாறியுள்ளது. குறிப்பாக ஃபேஷன் ட்ரெஸ்களை ஆன்லைனில் வாங்குவது ஒருபுறம் வசதியாக இருந்தாலும், மறுபுறம் சரியான தேர்வுகளைச் செய்யாதிருந்தால் ஏமாற்றங்களையும் ஏற்படுத்தும். இந்நிலையில் ஆன்லைனில் ஷாப்பிங் செய்யும் போது சில முக்கிய அம்சங்களை கவனத்தில் கொள்வது அவசியம்.

 1. இணையதளத்தின் நம்பகத்தன்மை

நீங்கள் ஷாப்பிங் செய்யும் இணையதளம் நம்பகமானதா என்பதை உறுதிப்படுத்திக் கொள்ள வேண்டும். பாதுகாப்பான இணையதளங்கள் பொதுவாக https:// என தொடங்கும்.

பிரபலமான மற்றும் நன்கு அறியப்பட்ட இணையதளங்களை பயன்படுத்துவது பாதுகாப்பாக இருக்கும். புதிய அல்லது தெரியாத தளங்களில் வாங்கும் முன், வாடிக்கையாளர் மதிப்புரைகள், தொடர்பு விவரங்கள், ரிட்டர்ன் மற்றும் பிரைவசி பாலிசி ஆகியவற்றை சரிபார்க்க வேண்டும்.

 2. தயாரிப்பு விவரங்கள் மற்றும் படங்கள்

வாங்க விரும்பும் பொருளின் விவரங்களை முழுமையாக படிக்க வேண்டும். அளவு, பொருள், நிறம், பராமரிப்பு வழிமுறைகள் போன்றவை மிகவும் முக்கியமானவை.

ஒவ்வொரு பிராண்டிற்கும் அளவுகளில் வித்தியாசம் இருக்கலாம். எனவே, அளவுசார்ந்த சைஸ் சார்ட்டை (size chart) கவனமாகப் பார்த்து உங்கள் அளவுடன் ஒப்பிட்டு தேர்வு செய்ய வேண்டும்.

3. வாடிக்கையாளர் மதிப்புரைகள் (Customer Review)

பிற வாடிக்கையாளர்கள் பொருளைப் பற்றி எழுதிய மதிப்புரைகள் மிகவும் பயனுள்ளதாக இருக்கும். பொருளின் தரம், அளவு, நிறம், டெலிவரி அனுபவம் ஆகியவற்றைப் பற்றிய நேரடி கருத்துகளை இவை வழங்கும்.

மதிப்புரைகளில் வரும் புகைப்படங்கள், பொருளின் உண்மையான தோற்றம் பற்றிய தெளிவான புரிதலை அளிக்கும். ஒரு பொருளுக்கு அதிகமான எதிர்மறை மதிப்புரைகள் இருந்தால், அதனை வாங்காமல் தவிர்க்கலாம்.

4. விலை மற்றும் சலுகைகள்

ஒரே பொருளை பல இணையதளங்களில் ஒப்பிட்டு பார்த்து வாங்குவது நல்லது. வெவ்வேறு தளங்களில் விலை மாறுபடும்.

சலுகைகள், தள்ளுபடிகள் ஆகியவற்றை பயன்படுத்திக் கொள்ளலாம். ஆனால், சலுகைகளுக்குப் பின்னால் குறைபாடுள்ள பொருட்கள் இருக்கக்கூடும் என்பதையும் நினைவில் கொள்ள வேண்டும்.

ஷிப்பிங் கட்டணங்கள் மற்றும் பிற செலவுகளையும் முன்னதாக தெரிந்து கொள்ளுங்கள்.

5. ரிட்டர்ன் மற்றும் ரீஃபண்ட் பாலிசி

வாங்கிய பொருளை திருப்பி அனுப்ப வேண்டிய நிலை ஏற்படக்கூடும் என்றால் அந்த தளத்தின் ரிட்டர்ன் மற்றும் ரீஃபண்ட் பாலிசிகளை முன்கூட்டியே தெரிந்து கொள்ள வேண்டும்.

ரிட்டர்ன் கால அவகாசம், ஷிப்பிங் செலவுகள் உள்ளிட்ட விவரங்களைத் தெரிந்து கொள்ளுங்கள். பொருள் சேதமடைந்திருந்தாலோ அல்லது தவறாக வந்திருந்தாலோ, உடனடியாக வாடிக்கையாளர் சேவையுடன் தொடர்புகொள்ளுங்கள்.

6. கட்டண முறை மற்றும் பாதுகாப்பு

பாதுகாப்பான கட்டண முறைகளை மட்டுமே பயன்படுத்த வேண்டும். கிரெடிட் கார்டு, டெபிட் கார்டு அல்லது நம்பகமான ஆன்லைன் பேமென்ட் கேட்வேகள் பாதுகாப்பானவை.

முக்கியமாக, பொது வைஃபை (Public Wi-Fi) பயன்படுத்தும் சமயத்தில் உங்கள் வங்கி விவரங்கள் அல்லது  தனிப்பட்ட தகவல்களை பயன்படுத்த வேண்டாம்.

ஆன்லைன் ஃபேஷன் ஷாப்பிங் என்பது நேரம் மற்றும் முயற்சியை மிச்சப்படுத்தும் ஒரு நவீன வசதியாக இருந்தாலும், தொழில்நுட்ப உலகில் அதன் பாதுகாப்பும் அவசியம். மேற்கண்ட வழிகாட்டுதல்களை பின்பற்றி, உங்களுக்கு ஏற்ற சிறந்த பொருட்களை தேர்ந்தெடுத்து, சிக்கனமாகவும், பாதுகாப்பாகவும் உங்கள் ஷாப்பிங் அனுபவத்தை மகிழ்ச்சியானதாக மாற்றிக் கொள்ளலாம்.