இரவில் தூங்கும்போது லூஸ் ஹேரில் தூங்குறீங்களா? அச்சச்சோ… போச்சு!
சிலர் முடி உதிர்வைக் குறைக்கவும், கூந்தல் சிக்கலாகாமல் இருக்கவும் இரவில் முடியைக் கட்டிக்கொள்வார்கள். வேறு சிலரோ, கூந்தலுக்கு ஓய்வு தேவை என்று அவிழ்த்து விடுவார்கள். இதில் எது சரியானது, உங்கள் கூந்தல் ஆரோக்கியத்திற்கு எது நல்லது என்பதைப் பற்றி இந்தப் பதிவில் பார்ப்போம்.
இரவில் முடி கட்டுவதன் நன்மைகள்:
இரவில் தூங்கும்போது, தலையணையில் புரளும்போது முடி எளிதில் சிக்கலாகலாம். குறிப்பாக நீளமான கூந்தல் உள்ளவர்களுக்கு இது பெரிய பிரச்சனை. முடியைக் கட்டித் தூங்குவது இந்தச் சிக்கலைக் கணிசமாகக் குறைக்கும்.
சிக்கல் குறைவதால், முடி உடைந்து உதிர்வது குறையும். தலையணையில் தேய்மானம் ஏற்படுவதையும் கட்டுப்படுத்தலாம்.
தூங்கும்போது முடி தலையணையுடன் உராய்வதால் ஏற்படும் சேதத்தைக் குறைக்கலாம். குறிப்பாகப் பட்டு தலையணை உறைகளைப் பயன்படுத்தாதவர்களுக்கு இது முக்கியம்.
முடிமுகத்தில் படாமல் இருப்பதால், சருமத்தில் எண்ணெய் பசை மற்றும் அழுக்குகள் சேர்வதைத் தடுக்கலாம், இது முகப்பரு பிரச்சனையை குறைக்க உதவும்.
இரவில் முடி கட்டுவதன் தீமைகள்:
முடி கட்டுவது நல்லதுதான் என்றாலும், தவறான முறையில் கட்டினால் அதுவே உங்கள் கூந்தலுக்குப் பெரும் தீங்கு விளைவிக்கும். முடியை மிகவும் இறுக்கமாகக் கட்டுவது மயிர்க்கால்களில் அதிக அழுத்தத்தை ஏற்படுத்தும். இது 'டிராக்ஷன் அலோபீசியா' (Traction Alopecia) எனப்படும் முடி உதிர்வுக்கு வழிவகுக்கும், இதில் முடி அதன் வேர்களில் இருந்து நிரந்தரமாக சேதமடையலாம்.
குளித்தவுடன் முடி உலருவதற்கு முன் கட்டுவது மிகவும் தவறு. ஈரமான முடி மிகவும் பலவீனமாக இருக்கும். ஈரமான கூந்தலைக் கட்டுவதால் பூஞ்சை தொற்று, பொடுகு மற்றும் முடி உடைதல் ஏற்படலாம்.
இரவில் முடி கட்டும் சரியான முறை:
முடியை மிகவும் தளர்வாகப் பின்னல் போடுவது அல்லது ஒரு தளர்வான கொண்டை போடுவது சிறந்தது. தலையில் அழுத்தம் கொடுக்காமல் பார்த்துக்கொள்ளுங்கள்.
ரப்பர் பேண்டுகளுக்குப் பதிலாக, மிருதுவான துணி பேண்டுகளைப் பயன்படுத்துங்கள். இவை முடியில் உராய்வைக் குறைக்கும்.
முடி முழுமையாக உலர்ந்த பிறகு மட்டுமே கட்டவும். தினமும் ஒரே இடத்தில் முடி கட்டுவதைத் தவிர்க்கவும். முடியின் வெவ்வேறு பகுதிகளில் அழுத்தம் ஏற்படாமல் இருக்க, சில சமயங்களில் தளர்வான பின்னல், சில சமயங்களில் கொண்டை என மாற்றிக் கொள்ளலாம்.
இரவில் முடி கட்டுவது நல்லதுதான், ஆனால் சரியான முறையில் செய்ய வேண்டும். இறுக்கமாகக் கட்டாமல், முடி உலர்ந்த பிறகு தளர்வாகக் கட்டுவதன் மூலம் உங்கள் கூந்தலைச் சேதத்திலிருந்து பாதுகாத்து ஆரோக்கியமாக வைத்திருக்க முடியும்.
