கிச்சன் முதல் கார்டன் வரை... மைக்ரோ ஃபைபர் துணியின் இந்த மறுபக்கம் உங்களுக்குத் தெரியுமா?

பொதுவாக நாம் கடைகளுக்குச் செல்லும்போது வண்ணமயமான மைக்ரோ ஃபைபர் துணிகள் கட்டுகளாக விற்பனை செய்யப்படுவதைப் பார்த்திருப்போம். கார் துடைப்பதற்கும், கண்ணாடி ஜன்னல்களைச் சுத்தம் செய்வதற்கும் இது மிகச் சிறந்தது என்று மட்டுமே நாம் நினைத்துக்கொண்டிருக்கிறோம். ஜப்பானியர்களால் கண்டுபிடிக்கப்பட்ட இந்த மென்மையான துணி, கடந்த சில தசாப்தங்களாகத் துப்புரவு உலகில் ஒரு முக்கிய இடத்தைப் பிடித்துள்ளது. 

ஆனால் இதன் மென்மைத் தன்மை மற்றும் நீரை உறிஞ்சும் திறன் ஆகியவை, இதை வெறும் துடைக்கும் துணியாக மட்டும் இல்லாமல், வீட்டின் பல்வேறு தேவைகளுக்குப் பயன்படும் ஒரு அத்தியாவசியப் பொருளாக மாற்றியுள்ளன. சமையலறை முதல் வீட்டுத் தோட்டம் வரை இந்தத் துணியைக் கொண்டு நாம் செய்யக்கூடிய சில விசித்திரமான, பயனுள்ள வேலைகளைப் பற்றி பார்க்கலாம் வாங்க.

சமையலறை!

சமையல் செய்யும்போது சூடான பாத்திரங்களை இறக்கத் துணி தேடுவது வழக்கம். சில நேரங்களில் கிளவுஸ் அல்லது பிடிப்பான் கிடைக்காதபோது, இந்த மைக்ரோ ஃபைபர் துணியை நான்காக மடித்துப் பயன்படுத்தலாம். இது வெப்பத்தைத் தாங்கும் திறன் கொண்டது என்பதால், கை சுடாமல் பாதுகாப்பாகப் பாத்திரங்களைக் கையாள முடியும். 

அதேபோல, பாத்திரம் கழுவும் சிங்க்கிற்குப் பின்னால் எப்போதுமே தண்ணீர் தேங்கி, அந்த இடம் ஈரமாகவே இருக்கும். அதைத் தடுக்க, ஒரு மைக்ரோ ஃபைபர் துணியை மடித்து அந்த விளிம்பில் வைத்துவிடலாம். அது சிந்தும் நீரைத் தேங்கவிடாமல் உடனுக்குடன் உறிஞ்சிக் கொள்வதால், பூஞ்சை பிடிப்பது மற்றும் துர்நாற்றம் வீசுவது தவிர்க்கப்படும்.

செடிகள்!

தோட்டம் வளர்ப்பவர்களுக்கு இது ஒரு வரப்பிரசாதம். கொடி வகைச் செடிகள் அல்லது தக்காளிச் செடிகள் வளரும்போது, அவற்றை முட்டுக் கம்புகளுடன் சேர்த்துக் கட்ட வேண்டும். சணல் அல்லது கம்பிகளைப் பயன்படுத்தினால் செடியின் தண்டு நசுங்க வாய்ப்புள்ளது. அதற்குப் பதிலாக மைக்ரோ ஃபைபர் துணியை நீண்ட கீற்றுகளாக வெட்டிப் பயன்படுத்தலாம். இது மிகவும் மென்மையாக இருப்பதால் செடிகளைக் காயப்படுத்தாது. மேலும், கடுமையான பனிக்காலத்தில் சிறிய நாற்றுகள் கருகிவிடாமல் இருக்க, இந்தத் துணியைக் கொண்டு போர்த்திப் பாதுகாக்கலாம்.

பூச்சிகளை விரட்ட!

தோட்டத்தில் பறக்கும் பூச்சிகள் மற்றும் ஈக்களின் தொல்லை அதிகமாக இருந்தால், ரசாயன மருந்துகளைப் பயன்படுத்த வேண்டியதில்லை. சர்க்கரைத் தண்ணீரை லேசாக இந்தத் துணியில் தெளித்து, செடிகளுக்கு அருகில் கட்டித் தொங்கவிடலாம். பூச்சிகள் அந்த இனிப்பால் ஈர்க்கப்பட்டுத் துணியில் ஒட்டிக்கொள்ளும். இதனால் செடிகள் பூச்சிகளிடமிருந்து தப்பிக்கும்.

வண்ணம் திட்ட! 

 வீட்டிற்குப் பெயிண்ட் அடிக்கும்போது அல்லது வார்னிஷ் பூசும்போது தவறுதலாகத் தரையிலோ அல்லது மற்ற இடங்களிலோ பட்டுவிடலாம். அதைத் துடைக்கச் சாதாரணத் துணிகளைப் பயன்படுத்தினால், அதில் உள்ள நூல்கள் அல்லது துகள்கள் பெயிண்ட்டில் ஒட்டிக்கொண்டு அசிங்கமாகத் தெரியும். ஆனால் மைக்ரோ ஃபைபர் துணி எந்தத் துகள்களையும் உதிர்க்காது என்பதால், வர்ணம் பூசும் வேலைகளுக்கு இது மிகச் சிறந்தது. குறிப்பாக மேட் ஃபினிஷ் உள்ள சுவர்களைச் சுத்தம் செய்ய இது மிகவும் பாதுகாப்பானது.

மண் அரிப்பு!

பூந்தொட்டிகளின் அடியில் உள்ள துளைகள் வழியாகத் தண்ணீர் வெளியேறும்போது, அதனுடன் சேர்ந்து மண்ணும் வெளியேறித் தரையை அசுத்தப்படுத்தும். இதைத் தடுக்க, தொட்டியின் அடியில் மண்ணைப் போடுவதற்கு முன்பு, ஒரு மைக்ரோ ஃபைபர் துண்டுத் துணியை விரித்துவிட்டு அதன் மேல் மண்ணைக் கொட்டலாம். இது அதிகப்படியான நீரை மட்டும் வெளியேற்றும், ஆனால் மண்ணை வெளியேற விடாது.

உங்கள் வீட்டில் பழைய மைக்ரோ ஃபைபர் துணி இருந்தால், அதைத் தூக்கி எறியாமல் மேலே சொன்ன முறைகளில் பயன்படுத்திப் பாருங்கள். இது உங்கள் வேலையை எளிதாக்குவதோடு, பணத்தையும் மிச்சப்படுத்தும் என்பதில் சந்தேகமில்லை.