வாஷிங் மெஷின் அடிக்கடி ரிப்பேர் ஆகுதா? அப்போ இந்த விஷயத்தை மாத்துங்க!

உங்க வீட்டில வாஷிங் மெஷின் இருக்கா? அது அடிக்கடி பழுதாகுதா? அப்போ இந்த பதிவு உங்களுக்கு தான். நமது வீட்டு வேலைகளை மிகவும் சுலபமாக்க பல நவீன மின்னணு சாதனங்கள் நமக்கு பெரிதும் பயன்படுகின்றன. அதில் வீடுகளில் தினசரி ஆடைகளை சுத்தம் செய்ய உதவும் வாஷிங் மெஷின் இல்லத்தரசிகளிடம் மிக முக்கியமான இடத்தை பிடித்துள்ளது. ஆனால் இதனை நாம் சரியான முறையில் பராமரிக்காவிட்டால் பல தேவையில்லாத பழுதுகள், தேவையற்ற செலவுகள் நமக்கு தொடர்ந்து ஏற்படும்.

அன்றாட வாழ்வில் சலவை செய்யும்போது பலரும் அறியாமல் செய்யும் சில சிறு தவறுகள் இயந்திரத்தின் ஆயுளை பாதியாக குறைத்துவிடுகின்றன. அத்தகைய தவறுகளை திருத்தி எப்படி பாதுகாப்பாக பயன்படுத்துவது என்பதை இங்கு பார்க்கலாம்.

துணிகளை தரம் பிரிக்கும் முறை!

எல்லா வகையான ஆடைகளையும் மொத்தமாக ஒருசேர போட்டு துவைப்பது மிகப்பெரிய பாதிப்புகளை ஏற்படுத்தும். வெள்ளை நிற ஆடைகள் மற்றும் சாயம் போகும் வண்ண ஆடைகளை எப்போதுமே தனித்தனியாக பிரித்து தான் சுத்தம் செய்ய வேண்டும். அவ்வாறு செய்யாவிட்டால் வண்ண துணிகளின் சாயம் வெள்ளை ஆடைகளில் ஒட்டி அதன் ஒட்டுமொத்த அழகையும் பொலிவையும் முழுமையாக கெடுத்துவிடும்.

அதேபோல ஆடைகளில் உள்ள எண்ணெய் காபி அல்லது மை போன்ற பிடிவாதமான கறைகளை நேரடியாக அப்படியே இயந்திரத்தில் போடவே கூடாது. அந்த கறைகளை முதலில் தனியாக கைகளால் சிறிது தேய்த்து சுத்தம் செய்த பிறகே உள்ளே போட வேண்டும். இதனால் ஆடைகளின் நிறம் மங்காமல் நீண்ட நாள் உழைக்கும் மற்றும் கறைகள் நிரந்தரமாக துணிகளில் தங்கிவிடுவதும் முற்றிலுமாக தடுக்கப்படும்.

அதிக சுமை வேண்டாம்!

நேரத்தை மிச்சப்படுத்த நினைத்து இயந்திரத்திற்குள் துணிகளை அளவுக்கு அதிகமாக அடைத்து வைப்பதை நாம் கண்டிப்பாக தவிர்க்க வேண்டும். அதிக சுமை ஏற்றினால் ஆடைகள் சுழல போதிய இடமில்லாமல் அழுக்குகள் சரியாக போகாது. அதுமட்டுமின்றி இது இயந்திரத்தின் மோட்டார் மற்றும் டிரம் பகுதியின் மீது அதீத அழுத்தத்தை கொடுத்து அவற்றை மிக விரைவாகவே பழுதடைய செய்து பெரிய செலவை வைக்கும்.

Washing Machine வாங்கும் போது கருத்தில் கொள்ள வேண்டிய 5 விஷயங்கள்!

துணிகள் மிகவும் பளிச்சென்று மாற வேண்டும் என்பதற்காக அதிகப்படியான டிடர்ஜென்ட் பவுடர் பயன்படுத்துவது மிகவும் தவறான  செயலாகும். இது உள்ளே சோப்பு படிமங்களை அதிக அளவில் உருவாக்கி கிருமிகள் வளர வழிவகுக்கும். மேலும் துணிகளிலும் பிசுபிசுப்பு தன்மையை ஏற்படுத்திவிடும். எப்போதுமே ஆடைகளின் அளவிற்கு ஏற்ப சரியான அளவில் சோப்பு திரவத்தை பயன்படுத்துவது தான் புத்திசாலித்தனம்.

சலவை முடிந்தவுடன் ஈரமான துணிகளை பல மணி நேரம் உள்ளேயே அப்படியே மூடி வைத்திருக்க கூடாது. உடனே வெளியே எடுத்து காய வைத்துவிட்டு இயந்திரத்தின் கதவை சிறிது நேரம் திறந்து வைக்க வேண்டும். இதன் மூலம் ஈரப்பதம் காய்ந்து உள்ளே கெட்ட வாடை மற்றும் பூஞ்சைகள் உருவாவதை உறுதியாக தடுக்கலாம். இது போன்ற சிறு விஷயங்களில் நாம் தினமும் கவனம் செலுத்துவது மிகவும் அவசியமாகும்.

மாதத்திற்கு ஒருமுறை Lint Filter பகுதியை கட்டாயம் நாம் சுத்தம் செய்ய வேண்டும். அங்கு சேரும் நூல் இழைகளை அகற்றுவது இயந்திரத்தின் திறனை பல மடங்கு அதிகரிக்கும். மேலே கூறப்பட்ட இந்த எளிய வழிமுறைகளை நீங்கள் தொடர்ந்து பின்பற்றினால் உங்களின் வாஷிங் மெஷின் நீண்ட வருடங்களுக்கு எந்தவொரு பழுதும் இன்றி மிக சிறப்பாக உங்களுக்கு உழைக்கும். உங்களின் விலையுயர்ந்த ஆடைகளும் பாதுகாப்பாக இருக்கும். உங்களின் வாஷிங் மெஷின் பராமரிப்பு செலவும் வெகுவாக குறையும்.