வார்த்தைகளால் மலரும் உறவுகள்: வாழ்வை அழகாக்கும் அன்புச் சொற்கள்!

மனித வாழ்க்கையின் உயிர்நாடி உறவுகளே ஆகும். பணம் புகழ் பதவி எல்லாம் காலத்தின் ஓட்டத்தில் மாறிவிடலாம். ஆனால் அன்பால் பிணைக்கப்பட்ட உறவுகள் மட்டுமே மனிதனை வாழ்நாள் முழுவதும் தாங்கி நிறுத்துகின்றன. அந்த உறவுகளை மலரச் செய்யவும் வாடச் செய்யவும் வல்ல விசை நம் வார்த்தைகளே என்பதே வாழ்க்கையின் மெளனமான உண்மை.

மனித உறவுகள் கண்ணாடியைப் போன்றவை. நாம் எப்படி அணுகுகிறோமோ அதேபோல் அவை நமக்கு நம்மையே திரும்பக் காட்டுகின்றன. மென்மையான வார்த்தைகள் மனங்களை இணைக்கும் கடுமையான பேச்சுகள் மனங்களில் தூரத்தை உருவாக்கும். சொல்லும் கருத்து ஒன்றாக இருந்தாலும் சொல்லும் பாணியே உறவின் திசையை தீர்மானிக்கிறது.

வீட்டில் தினமும் நடக்கும் சின்னச் சின்ன சம்பவங்களே இதற்குச் சிறந்த சான்றுகள். ஒரு பாராட்டு கலந்த வார்த்தை முகத்தில் ஒளியை ஏற்றும்; ஒரு கடுமையான வாக்கியம் அதே மனத்தில் நிழலை பரப்பும். கணவன் மனைவி பெற்றோர் பிள்ளைகள் என்ற எல்லா உறவுகளிலும் இனிய மொழி அன்பின் பாலமாக மாறுகிறது.

பணிச்சூழலிலும் இதன் முக்கியத்துவம் அளவிட முடியாதது. அவசரமும் அழுத்தமும் நிறைந்த நேரங்களில் ஒரு நிதானமான சொல் பல முரண்பாடுகளை அமைதியாக கரைத்துவிடும். பிள்ளைகளிடம் பேசும் வார்த்தைகள் அவர்களின் எதிர்காலத்தின் விதைகளை விதைக்கின்றன. ஊக்கமளிக்கும் சொற்கள் தன்னம்பிக்கையை வளர்க்கும்; கடுமையான சொற்கள் மனதை சுருக்கிவிடும்.

நம் முன்னோர்கள் வார்த்தைகளின் வலிமையை வாழ்க்கை நெறியாக பின்பற்றினார்கள். பகைவனையும் புன்னகையுடன் வரவேற்றார்கள்; தவறுகளையும் பொறுமையுடன் கடந்து சென்றார்கள். அந்த மனப்பான்மையே அவர்களை உயர்ந்த மனிதர்களாக மாற்றியது.

எதிர்மறை எண்ணங்களும் கடுமையான வார்த்தைகளும் உறவுகளை மெதுவாக சிதைக்கின்றன. இனிய சொற்களும் நேர்மறை அணுகுமுறையும் வாழ்க்கையை ஒளிரச்செய்கின்றன.

ஆகவே பேசுவதற்கு முன் ஒரு நொடி யோசித்து ஒரு புன்னகையுடன் நல்ல வார்த்தைகளைத் தேர்ந்தெடுப்போம்.

வார்த்தைகளால் மலரும் உறவுகளே மனித வாழ்க்கையின் உண்மையான வெற்றியாக மலருகின்றன. அந்த வெற்றியே மனதிற்கு அமைதியை அளிக்கிறது. அமைதியே மனிதனை நல்ல முடிவுகளுக்கு அழைத்துச் செல்கிறது. நல்ல வார்த்தை ஒருவரின் நாளை மாற்றும் சக்தி கொண்டது என்பதை நாம் மறக்கக்கூடாது.

ஒரு சின்ன அன்புச்சொல் உடைந்த மனதை சீர்செய்யும்; ஒரு புன்னகை தளர்ந்த உறவுக்கு புதிய உயிர்கொடுக்கும். வார்த்தைகள் பூக்களைப் போன்றவை; பராமரித்தால் மணம் பரவும், அலட்சியம் செய்தால் வாடும். எனவே நம் நாவை அன்பின் பாதையில் நடத்துவோம்; மனதை மென்மையாக்குவோம்; உறவுகளை மாண்புடன் காக்குவோம். இவ்வாறு வாழ்ந்தால் வாழ்க்கை ஒரு இனிய பாடலாக மாறும். ஒவ்வொரு நாளும் ஒரு புதிய நம்பிக்கையை பிறக்கச் செய்யும். அந்த நம்பிக்கையே மனிதனை உயர்த்தும் மெய்யான மோட்டிவேஷன் ஆகும்.

அதனால் இன்று முதல் ஒவ்வொரு வார்த்தையையும் ஒளியுடன் பேசுவோம், அன்புடன் நடப்போம், புரிதலுடன் வாழ்வோம். உறவுகளை ஒரு புனித பொக்கிஷமாக பாதுகாப்போம். அவையே நம் வாழ்க்கையின் அழகிய அடையாளமாக என்றென்றும் திகழும் என்பதில் ஐயமில்லை. இதுவே மனித வாழ்வின் முழுமையான இலக்கு மற்றும் நிலையான மகிழ்ச்சி என்ற உண்மையை நமக்கு உணர்த்துகிறது.