பகைவர்களிடத்திலும் அன்பு காட்டுங்கள்: மகான்களின் உபதேசம்!

அமைதியான வாழ்வுக்கு அடிப்படையாய் உள்ளது அன்புடைமை ஆகும். ஆனந்தமாக வாழ்வதற்கு அன்பைக் கூட்டவேண்டும். அன்பே உயிர். அன்பே இன்பம். இதற்கு நேர்மாறாக அவரவர் மகிழ்ச்சியை கெடுக்கும் தன்மை பொறாமைக்கு உண்டு. ஆகவே ஆனந்தத்தை எரித்துவிட்டு மறுவேலை பார்க்கும் பொறாமையை பொறுமையே இல்லாமல் தூக்கிப்போட வேண்டும்.

ஒவ்வொரு குடும்பத்திலும் பல்வேறு குணம் படைத்தவர்களையும் மாறுபட்ட எண்ணங்கள் கொண்டவர்களையும் காணமுடியும். அனைவரிடமும் இன்முகம் காட்டி, இன் சொல் பேசி அவர்கள் விரும்பியபடியே நடந்து அவர்கள் உள்ளத்தை கவர்கின்றவர்களும் இருக்கிறார்கள். அன்பினால் எதையும் சாதித்துவிடலாம். ஆனால் பொறாமையினால் ஏற்படும் துன்பங்கள், கஷ்டங்கள் ஏராளம். இதனால் எவ்வளவோ பேரின் வாழ்க்கை ஏன் வரலாற்று நிகழ்ச்சிகள் கூட மாறி இருக்கின்றன.

பஞ்ச பாண்டவர்களின் மீது துரியோதனன் கொண்ட பொறாமையினால்தான் மகாபாரதப் போர் நடந்தது. இறுதியில் துரியோதனன் பொறாமையினாலேயே அழிந்துபோனான்.

மாவீரர்களுள் ஒருவரான நெப்போலியன் சிறையில் இருந்தபோது, "வாள், அன்பு எனும் இருபெரும் சக்திகளே உலகை ஆண்டு வருகின்றன. இவற்றுள் அன்பே உயர்வு வாய்ந்தது என்றும் அதனை பயன்படுத்தியவர்களே அமர வாழ்வு வாழ்கிறவர்கள் என்றும் வரலாறு உணர்த்துகிறது" என்று கூறினார்.

பாரதியார் 'பகைவனுக்கருள்வாய்' என்றார். ஏசுபிரானோ 'பகைவர்களிடத்தில் அன்பு காட்டுங்கள் 'என்றார். "பிறர் சிந்தும் கண்ணீரை துடைத்து வருவதே, பெரிய மனிதர்களின் வாழ்க்கை குறிக்கோள்" என்று எமர்சன் கூறியுள்ளார். அன்புடையவர்கள் பிறர் துன்பப்படும்போது கண்ணீர் மல்கி நிற்பர். மக்களின் துயரத்தை துடைக்க தம்மையே மறந்து அயராது உழைப்பர்.

வடலூர் வள்ளலார், 'வாடிய பயிரைக் கண்டபோதெல்லாம் வாடினேன்' என்றார். படரக் கொழு கொம்பில்லாது தத்தளித்த முல்லைக் கொடிக்கு ஆதரவாக தனது தேரையே நிறுத்திச் சென்றான் பாரி வள்ளல். மயில் குளிரால் வருந்துவதைக் கண்ட பேகன் தன் போர்வையே அதற்கு போர்த்திச் சென்றான்.

லியோ டால்ஸ்டாய், 'எவரையும் வெற்றிக்கொள்ள உதவும் சிறந்த வலையே அன்பு வலை. சிலந்தி தன் வாயிலிருந்து உமிழும் நூலை கொண்டு பின்னும் வலை போல, நாமெல்லாம் அன்பு வலையை பின்ன வேண்டும்' என்றார். பிறர் மீது அன்பு காட்டுவதால் உங்களை மகிழ்ச்சி சூழ்ந்து கொள்ளும்.ஒருவித ஆனந்தம் உங்கள் உள் மனதில் இழையோடி நிலைத்து நிற்கும். அந்த நிலையை அனுபவிப்பதே ஒரு மாபெரும் மகிழ்ச்சியாகும்.

ஆனால், இதற்கு மாறாக துன்பத்தை அளிக்க வல்லது பொறாமை. இத்தகைய பொறாமை, புற்றுநோய்போல வெளியில் தெரியாமல் உள்ளுக்குள்ளேயே இருந்து உயிருக்கு கூட ஆபத்து விளைவிக்கும். அதனால் அன்பைக் கூட்டி ஆனந்தம் பெறுங்கள். பொறாமையை பொசுக்கி பூரிப்பை பெறுங்கள்.