அடுத்த நாள் சூப்பரா அமையணுமா.. நைட் படுக்கப்போகும் முன் இத பண்ணிப் பாருங்க!

காலையில் சீக்கிரமாக எழுந்து சுறுசுறுப்பாக வேலைகளை செய்ய வேண்டும் என்று நாம் அனைவரும் ஆசைப்படுகிறோம். ஆனால் பல நேரங்களில் அது நடைமுறையில் சாத்தியமாவதில்லை. இதற்கு காரணம் நமது சோம்பேறித்தனம் அல்ல, முந்தைய நாள் இரவில் நாம் செய்யும் சில தவறுகள் தான். உங்களின் அடுத்த நாள் எப்படி இருக்க வேண்டும் என்பதை உங்களின் இன்றைய இரவுப் பழக்கங்கள் மட்டுமே முழுமையாக தீர்மானிக்கின்றன.

அதாவது உங்களின் ஒழுக்கம் காலையில் அல்ல, இரவிலேயே உடைந்து விடுகிறது. தேவையில்லாமல் மொபைல் போன் நோண்டுவது, அதிக நேரம் தேவையில்லாமல் யோசிப்பது என நமது நேரத்தை நாமே வீணாக்குகிறோம். இதை மாற்றி உங்கள் வாழ்க்கையை அடுத்த கட்டத்திற்கு கொண்டு செல்ல சில எளிய வழிமுறைகளை நாம் இப்போது பார்க்கலாம்.

ஸ்கிரீன் டைமிற்கு ஒரு கட்!

தூங்குவதற்கு ஒரு மணி நேரத்திற்கு முன்பாகவே டிஜிட்டல் திரைகளுக்கு முற்றுப்புள்ளி வைப்பது மிக முக்கியம். மொபைல் மற்றும் லேப்டாப் திரைகளில் இருந்து வரும் நீல ஒளி நமது மூளையை ஏமாற்றி மெலடோனின் என்ற உறக்க ஹார்மோன் சுரப்பதை பெருமளவு தடுத்து விடுகிறது. இதனால் தான் உடலுக்கு சோர்வு இருந்தாலும் நமக்கு தூக்கம் வருவதில்லை.

இதற்கு பதிலாக புத்தகங்கள் படிப்பது அல்லது மெல்லிய இசையை கேட்பது போன்ற மனதை அமைதிப்படுத்தும் செயல்களில் ஈடுபடலாம். இது உங்கள் மூளைக்கு ஓய்வுக்கான சிக்னலை அனுப்பி ஆழ்ந்த உறக்கத்திற்கு உங்களை தானாகவே தயார் செய்யும். நீல ஒளியை தடுக்கும் கண்ணாடிகளை பயன்படுத்துவதும் ஒரு சிறந்த மாற்று வழியாகும்.

விடியலுக்கான பக்கா பிளான்!

பெரும்பாலான மக்கள் படுக்கையில் படுத்தபடியே நாளை என்ன செய்வது என்று யோசித்து மண்டையை குடைந்து கொள்வார்கள். இது மூளையை விழிப்பு நிலையிலேயே வைத்து தூக்கத்தை விரட்டி அடித்துவிடும். இதை தவிர்க்க, தூங்குவதற்கு முன்பாகவே அடுத்த நாள் செய்ய வேண்டிய மிக முக்கியமான மூன்று வேலைகளை ஒரு பேப்பரில் தெளிவாக எழுதி வைத்து விடுங்கள்.

இப்படி செய்வதால் காலையில் எழுந்தவுடன் என்ன செய்வது என்ற குழப்பம் இருக்காது. உங்கள் இலக்குகள் தெளிவாக இருப்பதால் தேவையற்ற மன உளைச்சல் குறைந்து மனம் சாந்தமாக இருக்கும். மன அமைதி இருந்தாலே நல்ல தூக்கம் தானாகவே கண்களை தழுவும் என்பது மறுக்க முடியாத அறிவியல் உண்மையாகும்.

அரைகுறை வேலைகளுக்கு தீர்வு!

பகலில் நாம் எளிதாக முடித்திருக்க வேண்டிய சில சிறு வேலைகளை செய்யாமல் விட்டிருப்போம். உளவியல் ரீதியாக இதனை ஜெய்கார்னிக் விளைவு (Zeigarnik Effect) என்று சொல்வார்கள். இந்த அரைகுறை வேலைகளை நமது மூளை மறக்காமல் இரவு முழுவதும் நினைவூட்டி நமக்கு மிகப்பெரிய தொந்தரவை கொடுத்துக் கொண்டே இருக்கும்.

இதை தவிர்க்க, உடனடியாக முடிக்கக் கூடிய சிறு வேலைகளை தூங்கும் முன் முடித்து விடுங்கள். முடியாதவற்றை அடுத்த நாள் எப்போது செய்வீர்கள் என்று தெளிவாக குறித்து வைத்துக் கொள்ளுங்கள். இப்படி செய்யும்போது மூளையின் சுமை குறைந்து நிம்மதியான உறக்கம் எந்த தடையுமின்றி உங்களை வந்தடையும்.

சீரான தூக்கத்தின் ரகசியம்!

தினமும் ஒரே நேரத்தில் தூங்கச் சென்று, ஒரே நேரத்தில் விழிப்பதை வாடிக்கையாக கொள்ள வேண்டும். நமது உடல் சர்க்காடியன் ரிதம் எனப்படும் இயற்கையான கடிகாரத்தின் படியே முழுமையாக இயங்குகிறது. நேரம் தவறி தூங்குவது இந்த சுழற்சியை பாதித்து நாள் முழுவதுமான சோர்வை நமக்கு ஏற்படுத்திவிடும்.

ஒரு சில நாட்கள் மட்டும் இதை செய்துவிட்டு பெரிய அற்புதம் நடக்கும் என்று எதிர்பார்க்க கூடாது. தொடர்ந்து சில வாரங்கள் இதை பயிற்சி செய்யும்போது, ஆழ்ந்த உறக்கமும் நிம்மதியான மனநிலையும் உங்களுக்கு நிச்சயம் கிடைக்கும். சிறப்பான இரவு பழக்கங்கள் மூலம் உங்களின் நாளை இன்றே உங்கள் கட்டுப்பாட்டிற்குள் கொண்டு வாருங்கள்.