கூட்டத்துல இருப்பீங்க ஆனா மனசு ஒட்டாது... புதுசா வந்திருக்கும் இந்த ரகம் நீங்களா என பாருங்கள்!

உலகத்தில் உள்ள மனிதர்களைப் பொதுவாக இரண்டு வகையாகப் பிரிப்பார்கள். ஒன்று அதிகமாகப் பேசும், எல்லோருடனும் கலகலப்பாகப் பழகும் 'Extrovert' வகையினராக இருப்பார்கள். அல்லது யாருடனும் அதிகம் பேசாமல், தனிமையை விரும்பும் 'Introvert' வகையினராக இருப்பார்கள். ஆனால் உங்களை நீங்கள் கவனித்துப் பார்த்தால், இந்த இரண்டு வட்டத்திற்குள்ளும் நீங்கள் சிக்கிக்கொள்ள மாட்டீர்கள். 

உங்களுக்குத் தனிமையும் பிடிக்கும், அதே சமயம் மனிதர்களிடம் பழகுவதும் பிடிக்கும். ஆனால் ஏதோ ஒரு வகையில் இந்தக் கூட்டத்திலிருந்து நீங்கள் அந்நியப்பட்டு நிற்பது போன்ற உணர்வு உங்களுக்குள் இருந்துகொண்டே இருக்கும். அப்படிப்பட்டவர் நீங்கள் என்றால், உளவியல் உலகம் உங்களுக்காகவே ஒரு புதிய பெயரைக் கண்டுபிடித்துள்ளது. அதுதான் 'ஓட்ரோவர்ட்' (Otrovert).

இது ஒரு ஸ்பானிஷ் வார்த்தையான 'ஓட்ரோ' மற்றும் லத்தீன் வார்த்தையான 'வெர்ட்' என்பதிலிருந்து உருவானது. இதற்கு 'மற்றொன்று' அல்லது 'வேறு திசையில் திரும்புபவர்' என்று பொருள். டாக்டர் ராமி காமின்ஸ்கி என்பவர் அறிமுகப்படுத்திய இந்த வார்த்தை, சமூகத்தில் உள்ள மற்றவர்களுடன் ஒத்துப் போகாமல், தனக்கென ஒரு தனிப்பாதையில் சிந்திப்பவர்களைக் குறிக்கிறது. இவர்கள் சமூக விரோதிகள் கிடையாது, அதே சமயம் சமூகத்தோடு ஒட்டி உறவாடுபவர்களும் கிடையாது. இவர்கள் கூட்டத்திற்குள் இருந்தாலும், அந்தக் கூட்டத்தின் மனநிலையோடு இணையாதவர்கள்.

இவர்களிடம் இருக்கும் மிக முக்கியமான குணம், எதையும் கண்மூடித்தனமாகப் பின்பற்ற மாட்டார்கள். பள்ளிப் பெற்றோர் ஆசிரியர் கழகக் கூட்டம், அரசியல் ஊர்வலங்கள் அல்லது அலுவலகப் பார்ட்டிகள் எனப் பலரும் கூடும் இடங்களில் இவர்கள் கலந்துகொள்ளத் தயங்குவார்கள். அதற்குக் காரணம் அவர்களுக்குப் பயம் கிடையாது. தங்கள் தனித்துவத்தை இழந்துவிட்டு, ஒரு குழுவின் அடையாளத்தோடு தங்களை இணைத்துக்கொள்ள இவர்களுக்குப் பிடிக்காது. எல்லோரும் செய்கிறார்கள் என்பதற்காக ஒரு வேலையைச் செய்வது இவர்களுக்கு அறவே பிடிக்காத விஷயம்.

தனிமை!

ஒரு பெரிய திருமண மண்டபத்திலோ அல்லது பார்ட்டியிலோ இவர்களைப் பார்த்தால், இவர்கள் மிக இயல்பாகவே நடந்துகொள்வார்கள். ஆனால் உள்ளுக்குள் அவர்கள் ஒருவிதமான தனிமையை உணர்வார்கள். நூறு பேர் இருக்கும் இடத்தில், மேலோட்டமாக 'ஸ்மால் டாக்' பேசுவதை விட, யாராவது ஒருவரைப் பிடித்து மணிக்கணக்கில் ஆழ்ந்த விஷயங்களைப் பேசுவதையே இவர்கள் விரும்புவார்கள். ஆயிரம் பேர் இருந்தாலும், தங்களைப் புரிந்து கொள்ளும் அந்த ஒரு நபரையே இவர்களின் கண்கள் தேடும்.

இவர்கள் எந்த ஒரு குறிப்பிட்ட குழுவிற்கும் விசுவாசமாக இருக்க மாட்டார்கள். இந்தத் தன்மை இவர்களைச் சிறந்த தலைவர்களாக மாற்றுகிறது. ஒரு பிரச்சனையை அந்தக் குழுவின் கண்ணோட்டத்தில் பார்க்காமல், வெளியாட்களாக இருந்து நடுநிலையோடு பார்க்கும் திறன் இவர்களுக்கு உண்டு. இவர்கள் எந்த ஒரு கூட்டமைப்பிலும் சிக்காத சுதந்திரப் பறவைகள்.

எனவே, சமூகத்தின் எதிர்பார்ப்புகளுக்குள் உங்களைத் திணிக்காமல், உங்கள் தனித்துவத்தைக் கொண்டாடுங்கள். நீங்கள் ஒரு 'ஓட்ரோவர்ட்' என்பதில் பெருமை கொள்ளுங்கள்.