Perfection Vs Good Enough: நேரத்தை வீணடிக்கும் பரிபூரணவாதி! ஒரே நாளில் வேலையை முடிக்க சிம்பிள் வழி!

வெற்றியை நோக்கி பயணிக்கும்போது ஒவ்வொரு முயற்சியிலும் பரிபூரணம் இருந்தால் மட்டுமே நாம் திருப்தி அடைகிறோம். சிறியதாக ஒரு குறை இருந்தால், அவ்வளவுதான் பல கேள்விகளால் நம்மை நாமே கஷ்டப்படுத்திக்கொள்கிறோம்.

ஒரு வேலையைத் தொடங்கவே பயப்படுவது, சிறிய தவறுகளுக்காக நம்மையே தண்டித்துக் கொள்வது, திருத்தங்களை முடிவில்லாமல் செய்துக்கொண்டே நேரத்தை வீணடிப்பது... இவை அனைத்தும் பரிபூரணவாதிகளில் (Perfectionist) பொதுவாக காணப்படும் நடத்தைகள். ஆனால், உண்மையான முன்னேற்றத்திற்கும், நிம்மதியான வாழ்க்கைக்கும் ஒரு மந்திரம் உள்ளது: அதுதான் 'போதுமான அளவு நல்லது' (Good Enough) என்பதை மனதார ஏற்றுக்கொள்வது.

பரிபூரணவாதத்தின் ஆபத்துகள்

• பரிபூரணத்தை தேடிக்கொண்டே இருப்பது உங்களை ஒருபோதும் திருப்தியடைய விடாது. மன அழுத்தத்திற்கு வழிவகுக்கிறது.

• அனைத்தும் சரியாக இருக்க வேண்டும் என்ற எண்ணம், ஒரு வேலையைத் தொடங்கவே பயத்தை ஏற்படுத்தும். இதனால் பல வாய்ப்புகளை நாம் கோட்டை விடுகிறோம்.

• ஒரு வேலையை முடித்த பிறகும், "இன்னும் சிறப்பாகச் செய்திருக்கலாம்" என்று நினைத்து, மீண்டும் மீண்டும் அதே விஷயத்தைச் சரிசெய்வதில் நேரத்தை வீணடிக்கிறோம்.

• நாம் நம்மை மட்டுமல்லாமல், நம்மைச் சுற்றியுள்ளவர்களையும் கடுமையாக விமர்சிக்கத் தொடங்குகிறோம். இது உறவுகளைப் பாதித்து, மன ஆரோக்கியத்தைக் குலைக்கிறது.

• பரிபூரணம் என்பது அடைய முடியாத ஒரு மாயத்தோற்றம். இதை உணர்வதுதான் முதல் படி.

'போதுமான அளவு நல்லது' என்பதன் பொருள்

• 'போதுமான அளவு நல்லது' என்றால், தரத்தைக் குறைத்துக் கொள்வது என்று அர்த்தமல்ல. இலக்குகளை சரியாக அமைத்துக் கொள்வது என்பதாகும். இரண்டிற்கும் சிறுபடியே வித்தியாசமாகும்.

• ஒரு செயலின் நோக்கம் நிறைவேற்றப்பட்டு, அதன் எதிர்பார்ப்புகளைச் சரியான முறையில் பூர்த்தி செய்தால், அதுவே போதுமான அளவு நல்லது.

• அதாவது, ஒரு திட்டம் அதன் அடிப்படைத் தேவைகளைப் பூர்த்திசெய்து, அடுத்த கட்டத்திற்குச் செல்லத் தயாராக இருக்கும்போது, அதைப் பிடித்து வைத்துக் கொள்ளாமல் நகர்ந்து செல்வது.

• நீங்கள் ஒரு வேலையை 100% முழுமையாக்க முயன்றால், அது அதிக நேரத்தையும் சக்தியையும் எடுக்கும். ஆனால், 80% தரத்தை அடைந்த உடனேயே அடுத்த வேலையைத் தொடங்கும் போது, உங்களால் அதிக விஷயங்களை வெற்றிகரமாக முடிக்க முடியும்.

• முக்கியமான வேலைகளில் மட்டுமே முழு கவனத்தைச் செலுத்த வேண்டும். முக்கியமற்ற வேலைகளை சீக்கிரம் முடித்துவிட்டு நகர்வது புத்திசாலித்தனம். உதாரணமாக, ஒரு மின்னஞ்சலின் வடிவம் சரியாக இருக்க வேண்டியது கட்டாயம் என்பதில்லை; ஆனால், அதன் உள்ளடக்கத்தின் தெளிவு மிக அவசியம்.

வாழ்க்கையை மாற்றும் அணுகுமுறை

'போதுமான அளவு நல்லது' என்ற அணுகுமுறையை ஏற்றுக்கொள்வது உங்களின் தனிப்பட்ட மற்றும் தொழில்முறை வாழ்க்கையில் நிம்மதியைக் கொண்டுவரும்.

1. விரைவாகத் தொடங்குங்கள்

பரிபூரணத்தை எதிர்நோக்காமல், ஒரு வேலையை ஆரம்ப நிலையை உருவாக்குவதில் கவனம் செலுத்துங்கள். ஒரு தொடக்கப் பதிவை உருவாக்குவது, அதைத் திருத்துவதை விட எப்போதும் எளிதானது. "தவறு செய்தாலும் பரவாயில்லை, ஆனால் ஆரம்பித்தாக வேண்டும்" என்ற மனப்பான்மையே உங்களுக்கு உற்சாகம் அளிக்கும்.

2. தவறை நண்பனாக ஏற்கவும்

தவறுகள் வெற்றிக்கான வழியில் இருக்கும் மைல்கற்கள். ஒரு தவறு நேரும்போது, அதற்காக உங்களைத் தண்டிக்காமல், 'இதில் இருந்து நான் என்ன கற்றுக் கொண்டேன்?' என்று உங்களையே கேட்டுக் கொள்ளுங்கள். பரிபூரணவாதிகள் தவறுகளைக் கண்டு அஞ்சுவார்கள்; ஆனால், போதுமான அளவு நல்லது என்று வாழ்பவர்கள் தவறுகளைக் கற்றலுக்கான வாய்ப்பாகப் பயன்படுத்துவார்கள்.

3. காலக்கெடுவை மதித்தல்

ஒரு வேலையை அதற்காக ஒதுக்கப்பட்ட காலக்கெடுவிற்குள் முடிப்பதில் கவனம் செலுத்துங்கள். காலக்கெடு முடிந்து விட்டால், அது 90% தரத்துடன் இருந்தாலும், அதைச் சமர்ப்பிக்கப் பழகுங்கள். இது உங்களின் நேர மேலாண்மைத் திறனை மேம்படுத்தும்.

4. சவாலை எதிர்கொள்ளுங்கள்

உங்கள் வாழ்க்கையில் ஒரு சோதனை முயற்சியாக, சிறிய வேலைகளை (உதாரணமாக, ஒரு பவர் பாயிண்ட் ஸ்லைடு, ஒரு சமையல் குறிப்பு, ஒரு தினசரி அறிக்கை) 'போதுமான அளவு நல்லது' என்ற தரத்துடன் வேகமாக முடிக்க முயற்சிக்கவும்.

இந்த அணுகுமுறை உங்களை மன அழுத்தத்தில் இருந்து விடுவித்து, வாழ்க்கையை அதிக மகிழ்ச்சியுடனும், நிம்மதியுடனும் வாழ உதவும். வாழ்க்கை என்பது ஒரு பயணம், ஒரு போட்டி அல்ல. ஒவ்வொரு நொடியும் பரிபூரணமாக இருக்கத் தேவையில்லை. நாம் செய்யும் செயல்கள் அதன் இலக்கை அடைந்தால், அதுவே போதுமான அளவு நல்லதுதான்!