திருமலை திருப்பதிக்கு அழகு சேர்க்கும் 7 அம்சங்கள் எவை தெரியுமா?

திருப்பதி திருமலை திருத்தலத்துக்கு பெருமை சேர்க்கும் ஏழு விஷயங்கள் நம்மை பிரம்மிக்க வைக்கின்றன. அந்த ஏழு விஷயங்கள் என்னவென்பதை இந்தப் பதிவில் பார்ப்போம்!

ஏழு மலைகள்: திருப்பதி வேங்கடவன் கோயில் கொண்டுள்ள சப்தகிரி எனப்படும் ஏழு மலைகளின் பெயர்கள் கருடாத்ரி, வ்ருஷபாத்ரி, அஞ்சனாத்ரி, நீலாத்ரி, சேஷாத்ரி, வேங்கடாத்ரி, நாராயணத்ரி ஆகியவையாகும்.

ஏழு நாமங்கள்: பெயரற்ற பரம்பொருளாம் பெருமாளை அடியார்களால் பல்வேறு நாமங்களால் அழைத்தாலும் திருமலை வாசலுக்கு ஏழு முக்கியப் பெயர்கள் இருக்கின்றன. அவை: ஏழுமலையான், திருவேங்கடமுடையான், திருவேங்கடநாதன், வேங்கடேசன், வேங்கடேஸ்வரன், சீனிவாசன், பாலாஜி.

ஏழு தீர்த்தங்கள்: திருப்பதியில் உள்ள முக்கியத்துவம் பெற்ற தீர்த்தங்கள் 108 இருந்தாலும் அவற்றில் குறிப்பிடத்தக்கவையாக ஏழு தீர்த்தங்கள் உள்ளன. அவை: குமார தீர்த்தம், தும்புரு தீர்த்தம், ராமகிருஷ்ண தீர்த்தம், ஆகாச கங்கை, பாண்டு தீர்த்தம், பாப விநாசன தீர்த்தம், சுவாமி புஷ்கரணி தீர்த்தம் ஆகியவைதான் ஏழு தீர்த்தங்கள்.

ஏழு தலை ஆதிசேஷன்: ஆயிரம் தலைகள் கொண்ட ஆதிசேஷனது ஏழு தலைகள்தான் ஏழுமலைகளாக விளங்கி வருவதாக ஐதீகம். பிரம்மோத்ஸவத்தில் கொடியேற்றத்திற்கு பிறகு வேங்கடவன் பெத்தசேஷ வாகனம் என்ற ஏழு தலை நாக வாகனத்தில் திரு வீதி உலா வருவது வழக்கம்.

ஏழு மகிமைகள்: திருமலை வாசனின் பெருமைக்கு அணிகலனாக ஏழு மகிமைகள் உள்ளன. அவை: சீனிவாச மகிமை, க்ஷேத்ர மகிமை, தீர்த்த மகிமை, பக்தர்கள் மகிமை, கோவிந்த நாமத்தின் மகிமை, பகுளா தேவியின் மகிமை, பத்மாவதியின் மகிமை ஆகியவை ஆகும்.

ஏழு கலச ராஜகோபுரம்: திருவேங்கடம் சன்னிதியில் நிர்மாணிக்கப்பட்டுள்ள ராஜகோபுரத்திற்கு சப்த லோகங்களுடன் தொடர்பு கொள்வது போல ஏழு கலசங்கள் இருப்பது குறிப்பிடத்தக்கது.

ஏழு முக்கிய இடங்கள்: கோவிந்தராஜர் சன்னிதி, பூவராகர் சன்னிதி, திருச்சானூர் கோயில், ஸ்ரீ பேடி ஆஞ்சனேயர் கோயில், ஸ்ரீவாரி சிகர தரிசனம், சிலாதோரண பாறைகள், ஸ்ரீவாரி பாதாள மண்டப கோயில் ஆகியவை திருப்பதியில் நாம் அவசியமாக தரிசிக்க வேண்டிய ஏழு இடங்கள் ஆகும்.