பூமி தேவியின் புதல்வன் 'நரகாசுரன்' வீழ்ந்தது ஏன்? - ஓர் ஆன்மீகப் பார்வை!

இந்துமதப் புராணங்களில் பல்வேறு அரசர்கள், தேவதைகள், அசுரர்கள் பற்றிய கதைகள் இடம் பெறுகின்றன. அவற்றில் முக்கியமான ஒன்றாக நரகாசுரனின் கதை கருதப்படுகிறது. நரகாசுரன் பிறப்பில் நல்லவனாக இருந்தாலும், பின்னர் அகங்காரம் மற்றும் தீய செயல்களின் காரணமாக வீழ்ச்சியடைந்தான். இந்தக் கதை தர்மத்தின் வெற்றி மற்றும் அதர்மத்தின் தோல்வியை எடுத்துரைக்கும் முக்கியமான புராணச் சம்பவமாகும்.

நரகாசுரனின் பிறப்பு: நரகாசுரனின் உண்மையான பெயர் பௌமன் அல்லது பௌமாசுரன் ஆகும். “பௌமன்” என்றால் “பூமியின் மகன்” என்று பொருள். புராணங்களின்படி, பூமி தேவி மற்றும் வராக அவதாரம் எடுத்த விஷ்ணு இவர்களுக்கு மகனாகப் பிறந்தவனே நரகாசுரன். பூமி தேவியின் வேண்டுகோளின்படி, நரகாசுரன் மிகுந்த வலிமையும் நீண்ட ஆயுளும் பெற்றான். மேலும், “தன் தாயால் மட்டுமே அவன் கொல்லப்பட முடியும்” என்ற அரிய வரமும் கிடைத்தது. இந்த வரம் அவனை மிகுந்த தன்னம்பிக்கையுடனும் பெருமையுடனும் வாழவைத்தது.

ஆரம்பத்தில் நல்லாட்சி: தொடக்கத்தில் நரகாசுரன் நல்ல அரசனாக இருந்தான். அவன் மக்கள் நலனை கருத்தில் கொண்டு ஆட்சி செய்தான். அவன் தலைநகரம் “ப்ரக்ஜ்யோதிரிஷபுரம்” (இன்றைய அசாம் பகுதி) என்று சொல்லப்படுகிறது. ஆரம்பத்தில் அவன் நீதி மற்றும் ஒழுக்கத்துடன் ஆட்சி செய்ததால் மக்கள் மகிழ்ச்சியாக வாழ்ந்தனர்.

அகங்காரம் மற்றும் வீழ்ச்சி: அதிகாரம் கிடைத்த பிறகு நரகாசுரனின் மனநிலை மாறியது. தீய நண்பர்களின் சேர்க்கையும் அகங்காரமும் அவனை மாற்றின. இந்திரன் மற்றும் தேவர்களுக்கு தொல்லை கொடுத்தான் தேவி அதிதி அவர்களின் குண்டலங்களை பறித்தான். பல அரசர்களின் மகள்களை சிறையில் அடைத்தான் (சுமார் 16,000 பெண்கள் என கூறப்படுகிறது). இவ்வாறு அவன் கொடிய அசுரனாக மாறினான். மக்களின் சாபமும் தேவர்களின் துயரமும் அதிகரித்தது.

கிருஷ்ணருடன் நடந்த மாபெரும் போர்: நரகாசுரனின் கொடுமைகளைத் தாங்க முடியாமல் தேவர்கள் கிருஷ்ணர் அவர்களை நாடினர். அப்போது கிருஷ்ணர் தனது துணைவியான சத்யபாமா அவர்களுடன் போருக்கு புறப்பட்டார். சத்யபாமா அவர்கள் பூமி தேவியின் அவதாரம் எனக் கருதப்படுகிறார். இதனால் “தன் தாயால் மட்டுமே கொல்லப்படுவான்” என்ற வரம் நிறைவேறும் நிலை ஏற்பட்டது. போரில், நரகாசுரனின் படைகள் அழிக்கப்பட்டன பல்வேறு அஸ்திர-சஸ்திரங்கள் பயன்படுத்தப்பட்டன. இறுதியில் சத்யபாமாவின் அம்பால் நரகாசுரன் வீழ்ந்தான். இதனால் உலகம் நிம்மதியடைந்தது.

மரண தருவாயில் நரகாசுரன் தனது தவறுகளை உணர்ந்தான். அவன் கிருஷ்ணரிடம் ஒரு வேண்டுகோள் வைத்தான்: “என் மரண நாள் மகிழ்ச்சியுடன் கொண்டாடப்பட வேண்டும்.” அதன்படி, நரகாசுரன் வதம் செய்யப்பட்ட நாள் நரக சதுர்த்தசி எனவும், தீபங்களால் கொண்டாடப்படும் தீபாவளி பண்டிகையின் ஒரு பகுதியாகவும் அமைந்தது. இது இருளை அகற்றி ஒளியை வரவேற்கும் நாளாக கருதப்படுகிறது. இது “அதர்மத்தின் இருள் அகன்று, தர்மத்தின் ஒளி பரவியது” என்பதைக் குறிக்கிறது. அதனால், நரகாசுரன் கதை தீபாவளி கொண்டாட்டத்தின் முக்கியமான புராண பின்னணியாக உள்ளது.

நரகாசுரனின் கதை மனித வாழ்க்கைக்கு ஒரு ஒப்புமையாக கருதப்படுகிறது. நல்ல வழியில் பிறந்தாலும், தவறான தேர்வுகள் வாழ்க்கையை மாற்றிவிடும் என்பதை இது உணர்த்துகிறது.

நரகாசுரன் பிறப்பால் நல்லவன்; ஆனால் அகங்காரம் மற்றும் அதிகாரத்தின் போதையில் அவன் வீழ்ச்சியடைந்தான். இறுதியில் தர்மத்தின் சக்தி அவனை அழித்தது.

இந்தக் கதை நமக்கு புகட்டும் பாடம்: நல்ல பண்புகள் நிலைத்திருக்க வேண்டும்; அகங்காரம் வாழ்க்கையை அழிக்கும் என்பது.