தொட்டதெல்லாம் துலங்க விஜயதசமி! உங்கள் வாழ்க்கையை மாற்றும் ஆன்மீக ரகசியங்கள்!

விஜயதசமி விசேஷ தகவல்கள்:

பெயர் விளக்கம்: 'விஜய்' என்றால் வெற்றி என்றும், 'தசம்' என்றால் பத்து என்றும் பொருளாகும்.

தீமை அழிவு: அன்னை துர்கை மகிஷாசுரனை வதம் செய்து தர்மத்தைக் காத்த நாளாகவும், ராமன் ராவணனை வென்ற நாளாகவும் இது போற்றப்படுகிறது. இந்நாளில் விஜயதசமி வழிபாட்டு தொடங்கப்படும் எந்தவொரு புதிய காரியமும் தடையின்றி வெற்றி பெறும் என்ற நம்பிக்கை உள்ளது. 

* குற்றாலம் திருக்குற்றாலநாதர் கோவிலில் பராசக்தி பீடம் உள்ளது. இங்கு நவராத்திரி விஜயதசமியன்று, முரசு, மத்தளம், சங்கநாதம் முழங்க, சிறப்பு வழிபாடு நடைபெறும். இதில் கலந்து கொள்பவர்கள், எதிலும் வெற்றி வாய்ப்பு பெறுவார்கள் என்பது நம்பிக்கை.

* தூத்துக்குடி மாவட்டம் குலசேகரன் பட்டினத்தில் நவராத்திரி விழா விஜயதசமி அன்று கடற்கரையில் நடைபெறும் மகிஷாசுர வதம் நிகழ்ச்சி பிரசித்தி பெற்றது. 

* மகிஷாசுரனுடன் போரிட்டு அன்னை சாமுண்டீஸ்வரி அவனை வதம் செய்த நாளே விஜயதசமி என்று தேவி மகாத்மியம் கூறுகிறது.

* அரசர்கள் காலத்தில் விஜயதசமி அன்று சிம்மாசனம், வெண்கொற்றக் குடை, படைக் கலன்கள் ஆகியவற்றிற்கு பூஜை நடத்துவது வழக்கம்.

 * பாண்டவர்கள் வன்னி மரத்தில் வைத்திருந்த ஆயுதங்களை விஜயதசமியன்று எடுத்துச் சென்று போரிட்டு, மகாபாரத போரில் வெற்றி பெற்றனர்.

* வட இந்தியாவில் சில இடங்களில், ராமன், ராவணனை வதம் செய்த நாளாக விஜயதசமியை, ராமலீலா என்னும் பெயரில் விழாவாக நடத்துகின்றனர்.

* வாயு பகவான் த்ரேதா யுகத்தில் ஸ்ரீராம சேவைக்காக அனுமனாகவும், துவாபர யுகத்தில் கிருஷ்ணர் சேவைக்காக பீம சேனராகவும், கலியுகத்தில் வேத வியாசர் சேவைக்காக மத்துவாச்சாரியாராகவும் அவதாரம் செய்த தினம் விஜயதசமி ஆகும்.

* கன்னியாகுமரி பகவதி அம்மன் கோவில் கிழக்கு வாசல் கதவு விஜயதசமி, கார்த்திகை விழா ஆகிய தினங்களில் மட்டுமே திறக்கப்படுகிறது. 

* கூத்தனூர் சரஸ்வதி தேவி கோவிலில் விஜயதசமியன்று கலைஞர்கள் தங்கள் கலைத்திறமையை தேவிக்கு அர்ப்பணம் செய்கின்றனர்.

* மாங்காடு காமாட்சி அம்மன் கோவில் அர்த்த மேருவுக்கு சந்தனம், புனுகு சாற்றி குங்குமம் இட்டு, பூஜிக்கின்றனர். விஜயதசமியன்று எட்டுவித மூலிகைகளால் ஆன அஷ்ட கந்தமும், அதன் மேல் தங்கக் கவசமும் சாற்றப்படுகின்றன.

* ராமன், ராவணனுடன் போரிட விஜயதசமியே உகந்த நாள் என்று கருதி, அன்று புறப்பட்டதாக வால்மீகி ராமாயணம் கூறுகிறது.

* சத்ரபதி சிவாஜி மன்னர், விஜயதசமி அன்றுதான் இந்து தர்மத்தைக் காக்க, அன்னை பவானி அம்மன் முன்னிலையில் உறுதி எடுத்துக் கொண்டார் என்கிறது வரலாறு.

* விஜயதசமியன்று வன்னி மரத்தை வழிபடுவது சிறப்பு. பெருமாள் கோவில்களில் சுவாமி குதிரை வாகனத்தில் எழுந்தருளி வன்னி மரத்தை சுற்றி வருவது வழக்கம்.

* அக்ஷராப்யாஷம் என்ற குழந்தைகளுக்கு கல்வி கற்றுக் கொடுக்கும் நிகழ்ச்சியை ஆரம்பிப்பது விஜயதசமி அன்றுதான்.

நாட்டின் பல்வேறு பகுதிகளில் கொண்டாடப்படும் விஜயதசமி நன்னாளின் தனித்துவமான பண்பாட்டு மற்றும் ஆன்மீக சிறப்புகளை அறிந்து, பண்டிகையை முழுமையான ஆன்மீக உணர்வோடு கொண்டாடும் வாய்ப்பைப் பெறுவீர்கள்.